1 Maccabees 1
The First Book of Maccabees
܀ ܐ ܡܩܒܝ̈ܐ ܐ ܀
1 ܘܰܗܘܳܐ ܡܶܢ ܒܳܬܰܪ ܕܰܩܛܰܠ ܐܰܠܶܟܣܰܢܕܪܽܘܣ ܒܰܪ ܦܺܝܠܺܝܦܳܘܣ ܡܰܩܶܕܽܘܢܳܝܳܐ ܕܰܢܦܰܩ ܡܶܢ ܐܰܪܥܳܐ ܟܶܬܳܝ̈ܶܐ: ܘܰܡܚܳܝܗܝ ܘܩܰܛܠܶܗ ܠܕܳܪܝܽܘܫ ܡܰܠܟܳܐ ܕܦܳܪ̈ܣܳܝܶܐ ܘܰܕܡܳܕܳܝ̈ܶܐ: ܘܰܐܡܠܶܟ ܚܠܳܦܰܘܗܝ. ܠܽܘܩܕܰܡ ܕܶܝܢ ܐܰܡܠܶܟ ܒܗܶܠܳܕܳܐ.
2 ܘܰܥܒܰܕ ܩܪ̈ܳܒܶܐ ܪܰܘܪ̈ܒܶܐ. ܘܶܐܚܰܕ ܚܶܣܢ̈ܶܐ ܣܰܓܺܝ̈ܐܶܐ. ܘܩܰܛܶܠ ܠܡܰܠ̈ܟܶܝܗ̇ ܕܰܐܪܥܳܐ.
3 ܘܶܐܙܰܠ ܥܕܰܡܳܐ ܠܣܰܘܦܶܝ̈ܗ̇ ܕܰܐܪܥܳܐ. ܘܰܢܣܰܒ ܒܶܙܬܳܐ ܕܥܰܡ̈ܡܶܐ ܣܰܓܺܝ̈ܐܶܐ. ܘܫܶܠܚܰܬ ܘܶܐܬܬܢܺܝܚܰܬ ܐܰܪܥܳܐ ܩܕܳܡܰܘܗܝ. ܘܶܐܫܬܰܩܠ ܘܶܐܬܬܪܺܝܡ ܠܶܒܶܗ.
4 ܘܟܰܢܶܫ ܠܶܗ ܚܰܝܠܳܐ ܥܰܫܺܝܢܳܐ ܘܣܰܓܺܝܐܳܐ: ܘܶܐܫܬܰܠܰܛ ܥܰܠ ܥܰܡ̈ܡܶܐ ܘܥܰܠ ܐܶܡܘ̈ܳܬܳܐ ܘܥܰܠ ܛܪ̈ܽܘܢܶܐ. ܘܰܗܘܰܘ ܠܶܗ ܡܰܣܩܰܝ̈ ܡܰܕܰܐܬܳܐ.
5 ܘܡܶܢ ܒܳܬܰܪ ܗܳܠܶܝܢ. ܢܦܰܠ ܐܰܠܶܟܣܰܢܕܪܽܘܣ ܥܰܠ ܥܰܪܣܶܗ. ܘܺܝܕܰܥ ܕܡܳܐܶܬ ܠܶܗ.
6 ܘܰܩܪܳܐ ܠܥܰܒܕܰܘ̈ܗܝ ܡܫܰܒ̈ܚܶܐ. ܗܳܠܶܝܢ ܕܶܐܬܪܰܒܺܝܘ ܥܰܡܶܗ ܡܶܢ ܛܰܠܝܽܘܬܶܗ: ܘܦܰܠܓܳܗ̇ ܠܗܽܘܢ ܡܰܠܟܽܘܬܶܗ ܥܰܕ ܗܽܘ ܚܰܝ.
7 ܘܰܐܡܠܶܟ ܐܰܠܶܟܣܰܢܕܪܽܘܣ ܬܰܪܬܰܥܶܣܖ̈ܶܐ ܫܢܺܝ̈ܢ ܘܡܺܝܬ.
8 ܘܶܐܚܰܕܘ ܥܰܒܕܰܘ̈ܗܝ ܟܽܠ ܚܰܕ ܚܰܕ ܡܶܢܗܽܘܢ ܐܰܬܪܶܗ.
9 ܘܰܩܛܰܪܘ ܟܽܠܗܽܘܢ ܬܳܓ̈ܶܐ ܡܶܢ ܒܳܬܰܪ ܡܰܘܬܶܗ: ܐܳܦ ܒܢܰܝ̈ܗܽܘܢ ܡܶܢ ܒܳܬܪܗܽܘܢ ܫܢܰܝ̈ܳܐ ܣܰܓܺܝ̈ܐܳܬܳܐ. ܘܰܐܣܓܺܝܘ ܒܺܝ̈ܫܳܬܳܐ ܥܰܠ ܐܰܪܥܳܐ.
10 ܘܰܢܦܰܩ ܡܶܢܗܽܘܢ ܥܶܩܳܪܳܐ ܕܰܚܛܺܝܬܳܐ: ܐܰܢܛܝܰܟܳܘܣ ܐܰܦܺܝܦܰܢܳܘܣ. ܒܪܶܗ ܕܰܐܢܛܺܝܰܟܳܘܣ ܡܰܠܟܳܐ: ܗܰܘ ܕܺܐܝܬܰܘܗܝ ܗܘܳܐ ܗܡܰܝܪܳܐ ܒܪܽܘܡܺܝ: ܘܰܐܡܠܶܟ ܒܰܫܢܰܬ ܡܳܐܐ ܘܰܬܠܳܬܺܝܢ ܘܰܫܒܰܥ ܕܡܰܠܟܽܘܬܳܐ ܕܝܰܘ̈ܢܳܝܶܐ.
11 ܒܗܳܢܽܘܢ ܝܰܘ̈ܡܳܬܳܐ: ܢܦܰܩܘ ܡܶܢ ܝܺܣܪܳܐܶܝܠ ܐ̱ܢܳܫ̈ܳܐ ܒܢܰܝ̈ ܥܰܘܠܳܐ. ܘܰܐܦܺܝܣܘ ܠܣܰܓܺܝ̈ܐܶܐ ܟܰܕ ܐܳܡܪܺܝܢ ܠܗܽܘܢ: ܢܺܐܙܰܠ ܘܰܢܩܺܝܡ ܩܝܳܡܳܐ ܥܰܡ ܥܰܡ̈ܡܶܐ ܗܳܠܶܝܢ ܕܰܚܕܺܝܪܺܝܢ ܠܰܢ. ܡܶܛܽܠ ܕܡܶܢ ܝܰܘܡܳܐ ܕܰܦܪܰܫܢ ܡܶܢܗܽܘܢ. ܐܶܫܟܰܚܢ ܒܺܝ̈ܫܳܬܳܐ ܣܰܓܺܝ̈ܐܳܬܳܐ.
12 ܘܫܶܦܪܰܬ ܡܶܠܬܳܐ ܒܥܰܝܢܰܝ̈ܗܽܘܢ.
13 ܘܶܐܬܚܰܫܰܒܘ ܐ̱ܢܳܫ̈ܳܐ ܡܶܢ ܥܰܡܳܐ. ܘܶܐܙܰܠܘ ܠܘܳܬܡ ܡܰܠܟܳܐ. ܘܝܰܗܒ ܠܗܽܘܢ ܡܰܠܟܳܐ ܫܽܘܠܛܳܢܳܐ: ܕܢܶܥܒܕܽܘܢ ܐܰܝܟ ܢܳܡܽܘܣܳܐ ܕܥܰܡ̈ܡܶܐ.
14 ܘܰܒܢܰܘ ܒܢܰܝ̈ ܥܰܘܠܳܐ: ܐܶܣܛܰܕܺܝܽܘܢ ܒܽܐܘܪܺܫܠܶܡ ܐܰܝܟ ܢܳܡܽܘܣܗܽܘܢ ܕܥܰܡ̈ܡܶܐ.
15 ܘܰܢܓܰܕܘ ܠܗܽܘܢ ܠܥܽܘܪܠܽܘܬܳܐ: ܘܰܐܪܚܶܩܘ ܡܶܢ ܕܺܝܰܬܺܝܩܺܝ ܩܰܕܺܝܫܬܳܐ. ܘܶܐܬܚܰܠܰܛܘ ܒܥܰܡ̈ܡܶܐ ܘܶܐܨܛܒܺܝܘ ܠܡܶܥܒܰܕ ܒܺܝ̈ܫܳܬܳܐ.
16 ܘܶܐܬܥܰܬܕܰܬ ܘܶܐܬܛܰܝܒܰܬ ܡܰܠܟܽܘܬܳܐ ܩܕܳܡ ܐܰܢܛܝܰܟܳܘܣ. ܘܰܨܒܳܐ ܕܢܰܡܠܶܟ ܐܳܦ ܥܰܠ ܐܰܪܥܳܐ ܕܡܶܨܪܶܝܢ. ܐܰܝܟܰܢܳܐ ܕܢܰܡܠܶܟ ܥܰܠ ܬܰܪ̈ܬܰܝܗܶܝܢ ܡܰܠܟ̈ܘܳܬܳܐ.
17 ܘܥ̣ܰܠ ܐܰܢܛܝܰܟܳܘܣ ܠܡܶܨܪܶܝܢ ܒܚܰܝܠܳܐ ܥܰܫܺܝܢܳܐ ܘܪܰܒܳܐ. ܒܡܰܪ̈ܟܒܳܬܳܐ ܘܰܒܦܺܝ̈ܠܶܐ ܘܰܒܦܰܪ̈ܳܫܶܐ ܘܰܒܬܶܫܒܽܘܚܬܳܐ ܪܰܒܬܳܐ.
18 ܘܰܥܒܰܕ ܩܪܳܒܳܐ ܥܰܡ ܦܛܽܘܠܡܶܐܘܳܣ ܡܰܠܟܳܐ ܕܡܶܨܪܶܝܢ. ܘܶܐܙܕܟܺܝ ܦܛܽܘܠܡܶܐܘܳܣ ܡܶܢ ܩܕܳܡܰܘܗܝ. ܘܰܥܪܰܩܘ ܘܰܢܦܰܠܘ ܩܛܺܝ̈ܠܶܐ ܣܰܓܺܝ̈ܐܶܐ.
19 ܘܶܐܚܰܕܘ ܡܕܺܝ̈ܢܳܬܳܐ ܥܰܫܺܝ̈ܢܳܬܳܐ ܕܡܶܨܪܶܝܢ. ܘܰܢܣܰܒܘ ܒܶܙܬܳܐ ܕܰܐܪܥܳܐ ܕܡܶܨܪܶܝܢ.
20 ܘܰܗܦܰܟ ܐܰܢܛܝܰܟܳܘܣ ܡܶܢ ܒܳܬܰܪ ܕܰܡܚܳܗ̇ ܠܡܶܨܪܶܝܢ. ܒܰܫܢܰܬ ܡܳܐܐ ܘܰܐܪܒܥܺܝܢ ܘܰܬܠܳܬ. ܘܰܣܠܶܩ ܐܳܦ ܥܰܠ ܝܺܣܪܳܐܶܝܠ ܘܶܐܬܳܐ ܠܽܐܘܪܺܫܠܶܡ ܒܚܰܝܠܳܐ ܥܰܫܺܝܢܳܐ.
21 ܘܥ̣ܰܠ ܒܶܝܬ ܡܰܩܕܫܳܐ ܒܫܽܘܒܗܳܪܳܐ. ܘܰܢܣܰܒ ܠܡܰܕܒܚܳܐ ܕܕܰܗܒܳܐ ܘܠܰܡܢܳܪܬܳܐ ܕܢܽܘܗܪܳܐ. ܘܰܠܟܽܠܗܽܘܢ ܡܳܐܢܰܝ̈ ܬܽܘܩܳܢܳܗ̇.
22 ܘܰܠܦܳܬܽܘܪܳܐ ܕܰܠܚܶܡ ܐܰܦ̈ܶܐ: ܘܰܠܢܽܘ̈ܩܳܝܶܐ: ܘܰܠܦܺܝܠܳܣ̈ܶܐ: ܘܰܠܡܳܐܢܰܝ̈ ܕܶܒܚ̈ܶܐ: ܘܩܽܘܪ̈ܒܳܢܶܐ ܕܕܰܗܒܳܐ: ܘܠܰܐܦܰܝ̈ ܬܰܪܥܳܐ ܘܠܰܟܠܺܝ̈ܠܶܐ: ܘܰܠܟܽܠܶܗ ܨܶܒܬܳܐ ܕܗܰܝܟܠܳܐ ܕܒܰܐܦܰܝ̈ ܗܰܝܟܠܳܐ. ܘܰܩܠܰܦ ܟܽܠܶܗ ܥܒܳܕܳܐ.
23 ܘܰܢܣܰܒ ܕܰܗܒܳܐ ܘܣܺܐܡܳܐ. ܘܰܠܟܽܠܗܽܘܢ ܡܳܐܢ̈ܶܐ ܕܪܶܓܬܳܐ. ܘܰܢܣܰܒ ܣܺܝ̈ܡܳܬܳܐ ܡܛܰܫ̈ܝܳܬܳܐ ܐܰܝܠܶܝܢ ܕܶܐܫܟܰܚ.
24 ܘܰܢܣܰܒ ܟܽܠܡܶܕܶܡ ܐܰܢܛܝܰܟܳܘܣ: ܘܶܐܙܰܠ ܠܰܐܪܥܶܗ. ܘܰܥܒܰܕ ܩܶܛܠܳܐ ܪܰܒܳܐ. ܘܡܰܠܶܠ ܒܫܰܒܗܪܳܢܽܘܬܳܐ ܪܰܒܬܳܐ.
25 ܘܳܗܘܳܐ ܐܶܒܠܳܐ ܪܰܒܳܐ ܒܺܝܣܪܳܐܶܝܠ ܒܟܽܠ ܒܶܝܬ ܡܰܥܡܪܗܽܘܢ.
26 ܘܶܐܬܬܰܢܰܚܘ ܪ̈ܺܝܫܳܢܶܐ ܘܣܳܒ̈ܶܐ ܘܰܥܠܰܝ̈ܡܶܐ. ܘܰܒܬܽܘ̈ܠܳܬܳܐ ܐܶܫܬܰܦܰܠ̈ܝ ܘܶܐܫܬܰܚܠܰܦ ܫܽܘܦܪܗܽܘܢ ܕܢܶܫ̈ܶܐ.
27 ܘܟܽܠ ܚܰܬܢܳܐ ܢܣܰܒ ܥܠܰܘܗܝ ܐܶܒܠܳܐ. ܘܰܕܝܳܬܒܳܐ ܒܓܰܘ ܓܢܽܘܢܳܐ ܐܶܬܰܐܒܠܰܬ.
28 ܘܶܐܬܬܙܺܝܥܰܬ ܐܰܪܥܳܐ ܥܰܠ ܥܳܡܽܘܪ̈ܶܝܗ̇. ܘܟܽܠܶܗ ܒܶܝܬ ܝܰܥܩܽܘܒ ܠܒܶܫܘ ܒܶܗܬܬܳܐ.
29 ܘܡܶܢ ܒܳܬܰܪ ܬܰܪܬܶܝܢ ܫܢܺܝ̈ܢ. ܫܰܕܰܪ ܐܰܢܛܝܰܟܳܘܣ ܡܰܠܟܳܐ ܪܺܝܫܳܐ ܕܰܬܒܰܥܬܳܐ ܕܡܰܕܰܐܬܳܐ ܒܰܐܪܥܳܐ ܕܺܝܗܽܘܕ. ܘܶܐܬܳܐ ܠܽܐܘܪܺܫܠܺܡ ܒܚܰܝܠܳܐ ܥܰܫܺܝܢܳܐ ܘܪܰܒܳܐ.
30 ܘܡܰܠܶܠ ܡ̈ܶܠܶܐ ܕܰܫܠܳܡܳܐ ܒܢܶܟܠܳܐ: ܘܗܰܝܡܢܽܘܗܝ. ܘܰܢܦܰܠ ܥܰܠ ܡܕܺܝܢܬܳܐ ܡܶܢ ܫܶܠܝܳܐ: ܘܰܡܚܳܗ̇ ܡܚܽܘܬܳܐ ܪܰܒܬܳܐ. ܘܶܐܒܰܕ ܥܰܡܳܐ ܣܰܓܺܝܐܳܐ ܡܶܢ ܝܺܣܪܳܐܶܝܠ.
31 ܘܰܢܣܰܒ ܒܶܙܬܳܐ ܕܰܡܕܺܝܢܬܳܐ: ܘܰܐܘܩܕܳܗ̇ ܒܢܽܘܪܳܐ. ܘܣܰܚܶܦ ܒܳܬܶܝ̈ܗ̇ ܘܰܠܫܽܘܪܳܐ ܟܰܕ ܚܳܕܰܪ.
32 ܘܰܫܒܳܐ ܢܶܫܰܝ̈ܗܽܘܢ ܘܰܒܢܰܝ̈ܗܽܘܢ ܘܰܒܥܺܝܪܗܽܘܢ. ܘܺܝܪܶܬܘ ܒܗܽܘܢ ܝܽܘܪܬܳܢܳܐ.
33 ܘܰܒܢܰܘ ܠܰܡܕܺܢܬܶܗ ܕܕܰܘܺܝܕ ܒܫܽܘܪܳܐ ܪܰܒܳܐ ܘܚܰܣܺܝܢܳܐ ܘܰܒܡܰܓܕ̈ܠܶܐ ܥܰܫܺܝ̈ܢܶܐ. ܘܰܗܘܳܬ ܠܗܽܘܢ ܠܡܶܪܕܳܐ.
34 ܘܰܐܘܬܶܒܘ ܒܳܗ̇ ܥܰܡܳܐ ܚܰܛܳܝܳܐ: ܐ̱ܢܳܫ̈ܳܐ ܥܳܒܕܰܝ̈ ܥܰܘܠܳܐ. ܘܶܐܬܥܰܫܰܢܘ ܒܳܗ̇.
35 ܘܣܳܡܘ ܒܳܗ̇ ܙܰܝܢܳܐ ܘܪ̈ܽܘܙܺܝܩܶܐ. ܘܟܰܢܶܫܘ ܟܽܠܳܗ̇ ܒܶܙܬܳܐ ܕܽܐܘܪܺܫܠܶܡ: ܘܣܳܡܘ ܬܰܡܳܢ.
36 ܘܰܗܘܳܬ ܠܦܰܚܳܐ ܪܰܒܳܐ. ܘܰܗܘܳܬ ܠܥܽܘܘܳܟܳܐ ܠܒܶܝܬ ܡܰܩܕܫܳܐ ܘܰܠܬܽܘܩܰܠܬܳܐ ܘܰܠܡܰܟ̈ܫܽܘܠܶܐ ܒܺܝ̈ܫܶܐ ܠܺܝܣܪܳܐܶܝܠ ܒܟܽܠܙܒܰܢ.
37 ܘܶܐܫܰܕܘ ܕܡܳܐ ܙܰܟܳܝܳܐ ܚܕܳܖ̈ܰܝ ܒܶܝܬ ܡܰܩܕܫܳܐ: ܘܛܰܡܐܘܽܗܝ ܠܒܶܝܬ ܡܰܩܕܫܳܐ.
38 ܘܰܥܪܰܩܘ ܡܶܛܽܠܳܬܗܽܘܢ ܝܳܬܒܶܝ̈ܗ̇ ܕܽܐܘܪܺܫܠܶܡ. ܘܰܗܘܳܬ ܒܶܝܬ ܡܰܥܡܪܳܐ ܠܢܽܘܟܪܳܝܳܐ. ܘܰܗܘܳܬ ܢܽܘܟܪܳܝܬܳܐ ܠܝܰܠܕܶܝ̈ܗ̇. ܘܰܒܢܶܝ̈ܗ̇ ܫܰܒܩܽܘܗ̇.
39 ܘܒܶܝܬ ܡܰܩܕܫܳܗ̇ ܚܪܶܒ ܐܰܝܟ ܡܰܕܒܪܳܐ. ܥܰܕܥܺܐܕܶܝ̈ܗ̇ ܐܶܬܗܰܦܰܟܘ ܠܶܐܒܠܳܐ: ܘܫܰܒܶܝ̈ܗ̇ ܠܚܶܣܕܳܐ: ܘܺܐܝܩܳܪܳܗ̇ ܠܨܰܥܪܳܐ.
40 ܐܰܝܟ ܣܽܘܓܳܐܐ ܕܬܶܫܒܽܘܚܬܳܗ̇: ܗܳܟܰܢܳܐ ܣܓܺܝ ܨܰܥܪܳܗ̇. ܘܪܰܘܡܳܗ̇ ܐܶܬܗܦܶܟ ܠܡܽܘܟܳܟܳܐ.
41 ܘܰܟܬܰܒ ܐܰܢܛܝܰܟܳܘܣ ܡܰܠܟܳܐ ܠܟܽܠܳܗ̇ ܡܰܠܟܽܘܬܶܗ: ܕܢܶܗܘܽܘܢ ܟܽܠܗܽܘܢ ܥܰܡܳܐ ܚܰܕ.
42 ܘܰܕܢܶܫܒܽܘܩ ܟܽܠܢܳܫ ܢܳܡܽܘܣܶܗ. ܘܩܰܒܶܠܘ ܟܽܠܗܽܘܢ ܥܰܡ̈ܡܶܐ ܕܢܶܥܒܕܽܘܢ ܐܰܝܟ ܡܶܠܬܶܗ ܕܡܰܠܟܳܐ.
43 ܘܣܰܓܺܝ̈ܐܶܐ ܡܶܢ ܝܺܣܪܐܶܝܠ ܐܶܨܛܒܺܝܘ ܒܦܽܘܠܚܳܢܶܗ. ܘܕܰܒܰܚܘ ܠܰܦܬܰܟܖ̈ܰܘܗܝ: ܘܰܐܚܶܠܘ ܫܰܒܬܳܐ.
44 ܘܫܰܕܰܪ ܡܰܠܟܳܐ ܐܰܢܛܝܰܟܳܘܣ ܒܝܰܕ ܐܺܝܙܓܰܕܰܘ̈ܗܝ ܠܽܐܘܪܺܫܠܶܡ ܘܰܠܩܽܘܪ̈ܝܳܐ ܕܺܝܗܽܘܕܳܐ. ܕܢܺܐܙܽܠܘܢ ܒܳܬܰܪ ܢܳܡܽܘ̈ܣܶܐ ܢܳܘܟܪ̈ܳܝܶܐ ܕܰܐܪܥܳܐ.
45 ܘܰܕܢܶܬܟܠܽܘܢ ܕܶܒ̈ܚܶܐ ܘܢܽܘ̈ܩܳܝܶܐ ܘܩܽܘܪ̈ܒܳܢܶܐ ܡܶܢ ܒܶܝܬ ܡܰܩܕܫܳܐ: ܘܰܠܡܰܚܳܠܽܘ ܫܰܒ̈ܶܐ ܘܥܰܕܥܺܐܕ̈ܶܐ.
46 ܘܠܰܡܛܰܡܳܐܽܘ ܠܶܒܝܬ ܡܰܩܕܫܳܐ: ܘܩܽܘܕܫܳܐ.
47 ܘܰܕܢܶܒܢܽܘܢ ܥܠܰܘ̈ܳܬܳܐ ܘܒܶܝܬ ܦܬܰܟܖ̈ܶܐ: ܘܠܰܡܩܳܡܽܘ ܦܬܰܟܖ̈ܶܐ: ܘܠܰܡܢܰܟܳܣܽܘ ܚܙܺܝܖ̈ܶܐ ܘܰܒܥܺܝܪܳܐ ܛܰܡܐܰܬܳܐ.
48 ܘܰܠܡܶܫܒܰܩ ܒܢܰܝ̈ܗܽܘܢ ܟܰܕ ܠܳܐ ܓܙܺܝܪܺܝܢ: ܘܠܰܡܣܰܝܳܒܽܘ ܢܰܦ̈ܫܳܬܗܽܘܢ ܒܟܽܠ ܛܰܡܐܽܘܬܳܐ: ܘܰܠܡܰܚܳܠܽܘ ܐܶܢܽܘܢ.
49 ܐܰܝܟ ܕܢܶܛܥܽܘܢ ܢܳܡܽܘܣܳܐ: ܘܰܢܫܰܚܠܦܽܘܢ ܟܽܠܗܽܘܢ ܦܽܘܩܕܳܢ̈ܶܐ.
50 ܘܟܽܠ ܡܰܢܽܘ ܕܠܳܐ ܢܶܥܒܶܕ ܐܰܝܟ ܡܶܠܬܶܗ ܕܡܰܠܟܳܐ: ܢܡܽܘܬ.
51 ܘܰܐܝܟ ܟܽܠܗܽܘܢ ܗܳܠܶܝܢ ܦܶܬܓܳܡ̈ܶܐ ܟܬܰܒ ܠܟܽܠܳܗ̇ ܡܰܠܟܽܘܬܶܗ. ܘܰܐܩܺܝܡ ܩܰܝܽܘ̈ܡܶܐ ܥܰܠ ܟܽܠܶܗ ܥܰܡܳܐ. ܘܦܰܩܶܕ ܠܰܡܕܺܝ̈ܢܳܬܳܐ ܕܺܝܗܽܘܕܳܐ: ܠܰܡܕܰܒܳܚܽܘ ܠܟܽܠ ܡܕܺܝܢܳܐ ܘܰܡܕܺܝܢܳܐ.
52 ܘܶܐܬܟܰܢܰܫܘ ܠܘܳܬܗܽܘܢ ܣܰܓܺܝ̈ܐܶܐ ܡܶܢ ܥܰܡܳܐ: ܟܽܠ ܡܰܢܽܘ ܕܰܫܒܰܩ ܢܳܡܽܘܣܳܐ. ܘܰܥܒܰܕܘ ܒܺܝ̈ܫܳܬܳܐ ܣܰܓܺܝ̈ܐܳܬܳܐ ܒܺܐܪܥܳܐ.
53 ܘܣܳܡܽܘܗܝ ܠܺܝܣܪܳܐܶܝܠ ܒܡܰܛܫ̈ܝܳܬܳܐ ܒܟܽܠ ܒܶܝܬ ܥܪܽܘܩܝܗܽܘܢ.
54 ܘܰܒܚܰܡܫܰܥܶܣܪܳܐ ܒܝܰܪܚܳܐ ܒܟܳܢܽܘܢ ܩܕܶܡ. ܒܰܫܢܰܬ ܡܳܐܐ ܘܰܐܪܒܥܺܝܢ ܘܚܰܡܶܫ: ܒܢܰܘ ܛܰܡܐܽܘܬܳܐ ܕܚܽܘܪܒܳܐ ܥܰܠ ܡܰܕܒܚܳܐ ܘܒܰܡܕܺܝ̈ܢܳܬܳܐ ܕܺܝܗܽܘܕܳܐ: ܘܰܒܢܰܘ ܚܕܳܖ̈ܰܘܗܝ ܥܠܰܘ̈ܳܬܳܐ.
55 ܘܥܰܠ ܬܰܪ̈ܥܶܐ ܕܒ̈ܳܬܶܐ ܘܒܰܦ̈ܠܰܛܘܳܬܳܐ ܡܕܰܒܚܺܝܢ ܗܘܰܘ.
56 ܘܰܟܬܳܒ̈ܶܐ ܕܢܳܡܽܘܣܳܐ ܕܶܐܫܟܰܚܘ: ܣܰܕܶܩܘ ܘܰܐܘܩܶܕܘ ܐܶܢܽܘܢ ܒܢܽܘܪܳܐ.
57 ܘܟܽܠ ܐܰܝܟܳܐ ܕܡܶܫܬܟܰܚ ܗܘܳܐ ܟܬܳܒܳܐ ܕܢܳܡܽܘܣܳܐ: ܐܰܘ ܡܰܢܽܘ ܕܡܶܨܛܒܶܐ ܒܶܗ ܒܢܳܡܽܘܣܳܐ: ܗܳܢܳܐ ܗܘܳܐ ܓܙܳܪ ܕܺܝܢܳܐ ܕܡܰܠܟܳܐ: ܕܰܢܡܽܘܬ.
58 ܘܗܳܟܰܢܳܐ ܒܥܽܘܫܢܳܐ ܐܳܠܨܺܝܢ ܗܘܰܘ ܠܺܝܣܪܳܐܶܝܠ. ܠܟܽܠܗܽܘܢ ܐܰܝܠܶܝܢ ܕܡܶܫܬܰܟܚܺܝܢ ܗܘܰܘ ܒܰܡܕܺܝ̈ܢܳܬܳܐ ܒܟܽܠ ܝܺܪܰܚ ܒܺܝܪܰܚ.
59 ܘܰܒܚܰܡܫܳܐ ܘܥܶܣܪܺܝܢ ܒܝܰܪܚܳܐ: ܟܰܕ ܡܕܰܒܚܺܝܢ ܗܘܰܘ ܥܰܠ ܥܠܳܬܳܐ ܗܳܝ ܕܺܐܝܬ ܗܘܳܬ ܥܰܠ ܡܰܕܒܚܳܐ.
60 ܡܰܝܬܶܝܢ ܗܘܰܘ ܢܶܫ̈ܶܐ ܐܰܝܠܶܝܢ ܕܰܓܙܰܪ̈ܝ ܒܢܰܝ̈ܗܶܝܢ: ܘܡܰܩܛܠܺܝܢ ܗܘܰܘ ܠܗܶܝܢ ܐܰܝܟ ܦܽܘܩܕܳܢܳܐ.
61 ܟܰܕ ܬܶܠܝܢ ܗܘܰܘ ܒܢܶܝ̈ܗܶܝܢ ܒܨܰܘܖ̈ܰܝܗܶܝܢ. ܘܒܰܙܘ ܒܳܬܰܝ̈ܗܶܝܢ. ܘܠܰܐܝܠܶܝܢ ܕܰܓܙܰܪܘ ܐܶܢܽܘܢ ܩܰܛܶܠܘ ܐܶܢܽܘܢ.
62 ܘܣܰܓܺܝ̈ܐܶܐ ܡܶܢ ܝܺܣܪܳܐܶܝܠ ܐܶܬܚܰܝܰܠܘ ܘܶܐܬܥܰܫܰܢܘ: ܕܠܳܐ ܢܶܐܟܠܽܘܢ ܕܰܡܣܰܝܰܒ. ܘܰܓܒܰܘ ܠܗܽܘܢ ܕܰܢܡܽܘܬܽܘܢ ܘܠܳܐ ܕܢܶܣܬܰܝܒܽܘܢ ܒ: ܐܰܘ ܕܢܶܫܪܽܘܢ ܕܺܝܰܬܺܝܩܺܝ ܩܰܕܺܝܫܬܳܐ: ܘܡܺܝܬܘ.
63 ܘܰܗܘܳܐ ܪܽܘܓܙܳܐ ܪܰܒܳܐ ܒܺܝܣܪܳܐܶܝܠ.