Joshua 24
The Book of Joshua
܀ ܝܫܘܥ ܒܪ ܢܘܢ ܟܕ ܀
1 ܘܟܰܢܶܫ ܝܶܫܽܘܥ ܠܟܽܠܗܽܘܢ ܫܰܒ̈ܛܶܐ ܕܺܝܣܪܳܐܶܝܠ ܠܰܫܟܺܝܡ. ܘܰܩܪܳܐ ܠܩܰܫܺܝ̈ܫܶܐ ܕܺܝܣܪܳܐܶܝܠ. ܘܰܠܖ̈ܺܝܫܳܢܰܝܗܽܘܢ ܘܰܠܕܰܝܳܢܰܝ̈ܗܽܘܢ. ܘܰܠܣܳܦܖ̈ܰܝܗܽܘܢ. ܘܩܳܡܘ ܩܕܳܡ ܡܰܫܟܰܢ ܙܰܒܢܳܐ ܩܕܳܡ ܐܰܠܳܗܳܐ.
2 ܘܶܐܡܰܪ ܝܶܫܽܘܥ ܠܟܽܠܶܗ ܥܰܡܳܐ. ܗܳܟܰܢܳܐ ܐܳܡܰܪ ܡܳܪܝܳܐ ܐܰܠܳܗܳܐ ܕܺܝܣܪܳܐܶܝܠ. ܒܥܶܒܪܳܐ ܕܢܰܗܪܳܐ ܝܺܬܒܘ ܗܘܰܘ ܐܰܒܳܗܰܝ̈ܟܽܘܢ ܡܶܢ ܥܳܠܰܡ. ܬܳܪܳܚ ܐܰܒܽܘܗܝ ܕܰܐܒܪܳܗܳܡ. ܘܰܐܒܽܘܗܝ ܕܢܳܚܽܘܪ. ܘܦܳܠܚܺܝܢ ܗܘܰܘ ܬܰܡܳܢ ܠܰܐܠܳܗ̈ܶܐ ܐ̱ܚܖ̈ܳܢܶܐ.
3 ܘܕܶܒܪܶܬ ܠܰܐܒܪܳܗܳܡ ܐܰܒܽܘܟܽܘܢ ܡܶܢ ܥܶܒܪܳܐ ܕܢܰܗܪܳܐ. ܘܗܰܠܶܟܬܗ ܒܟܽܠܳܗ̇ ܐܰܪܥܳܐ ܕܰܟܢܰܥܢ. ܘܰܐܣܓܺܝܬ ܙܰܪܥܶܗ. ܘܝܶܗܒܶܬ ܠܶܗ ܠܺܐܝܣܚܳܩ.
4 ܘܝܶܗܒܶܬ ܠܺܐܝܣܚܳܩ ܠܝܰܥܩܽܘܒ ܘܰܠܥܺܣܽܘ. ܘܝܶܗܒܶܬ ܠܥܺܣܽܘ ܝܽܘܪܬܢܳܐ ܛܽܘܪܳܐ ܕܣܳܥܺܝܪ. ܘܝܰܥܩܽܘܒ ܘܰܒܢܰܘ̈ܗܝ ܢܚܶܬܘ ܠܡܶܨܪܶܝܢ.
5 ܘܫܰܕܪܶܬ ܠܡܽܘܫܶܐ ܘܠܰܐܗܪܽܘܢ. ܘܰܡܚܺܝܬ ܠܡܶܨܖ̈ܳܝܶܐ. ܘܬܶܕܡܖ̈ܳܬܳܐ ܥܶܒܕܶܬ ܒܰܝܢܳܬܗܽܘܢ. ܘܡܶܢ ܒܳܬܰܪ ܗܳܝܕܶܝܢ ܐܰܦܶܩܬܟܽܘܢ.
6 ܘܰܐܦܩܶܬ ܠܰܐܒܳܗܰܝ̈ܟܽܘܢ ܡܶܢ ܡܶܨܪܶܝܢ. ܘܰܐܝܬܺܝܬ ܐܶܢܽܘܢ ܠܝܰܡܳܐ. ܘܰܪܕܰܦܘ ܡܶܨܖ̈ܳܝܶܐ ܒܳܬܰܪ ܐܰܒܳܗܰܝ̈ܟܽܘܢ. ܒܩܳܖ̈ܽܘܟܐ ܘܰܒܦܰܖ̈ܳܫܶܐ ܠܝܰܡܳܐ ܕܣܽܘܦ.
7 ܘܰܓܥܰܘ ܐܰܒܳܗܰܝ̈ܟܽܘܢ ܠܘܳܬ ܡܳܪܝܳܐ. ܘܰܥ̣ܒܰܕ ܚܶܫܽܘܟܐ ܒܰܝܢܳܬܗܽܘܢ ܠܡܶܨܖ̈ܳܝܶܐ. ܘܦܰܠܶܓ ܡܳܪܝܳܐ ܝܰܡܳܐ ܕܣܽܘܦ. ܘܰܐܥܒܰܪ ܠܰܐܒܳܗܰܝ̈ܟܽܘܢ ܒܓܰܘܶܗ. ܘܰܐܝܬܝܶܗ ܠܝܰܡܳܐ ܥܰܠ ܡܶܨܪܶܝܢ ܘܟܰܣܺܝ ܐܶܢܽܘܢ. ܘܰܚܙܰܝ̈ ܥܰܝܢܰܝ̈ܟܽܘܢ ܡܶܕܶܡ ܕܥܶܒܕܶܬ ܠܡܶܨܖ̈ܳܝܶܐ. ܘܰܐܝܬܺܝܬܟܽܘܢ ܠܡܰܕܒܪܳܐ. ܘܺܝܬܒܬܽܘܢ ܒܡܰܕܒܪܳܐ ܝܰܘ̈ܡܳܬܐ ܣܰܓܺܝ̈ܐܶܐ.
8 ܘܰܐܝܬܺܝܬܟܽܘܢ ܠܰܐܪܥܳܐ ܕܳܐܡܽܘܖ̈ܳܝܶܐ ܕܝܳܬܒܺܝܢ ܒܥܶܒܪܳܐ ܕܝܽܘܪܕܢܳܢ. ܘܶܐܬܟܰܬܰܫܘ ܥܰܡܟܽܘܢ. ܘܰܐܫܠܡܶܬ ܐܶܢܽܘܢ ܒܺܐܝ̈ܕܰܝܟܽܘܢ. ܘܰܐܘܒܕܶܬ ܐܶܢܽܘܢ ܡܶܢ ܩܕܳܡܰܝܟܽܘܢ. ܘܺܝܪܶܬܬܽܘܢ ܐܰܪܥܗܽܘܢ.
9 ܘܩܳܡ ܒܳܠܳܩ ܒܰܪ ܨܶܦܽܘܪ ܡܰܠܟܳܐ. ܕܡܽܘܐܳܒܳܝ̈ܶܐ. ܘܶܐܬܟܰܬܰܫ ܥܰܡ ܝܺܣܪܳܐܶܝܠ. ܘܫܰܕܰܪ ܩܪܳܐ ܠܒܶܠܥܳܡ ܒܰܪ ܒܥܽܘܪ ܠܰܡܠܳܛܽܘܬܟܽܘܢ.
10 ܘܠܳܐ ܨܒܺܝܬ ܠܡܶܫܡܥܶܗ ܠܒܶܥܠܳܡ. ܘܰܡܒܰܪܳܟܘ ܒܰܪܶܟܬܟܽܘܢ ܘܦܰܨܺܝܬܟܽܘܢ ܡܶܢ ܐܺܝܕܰܘ̈ܗܝ.
11 ܘܰܥܒܰܪܬܽܘܢ ܝܽܘܪܕܢܳܢ. ܘܶܐܬܰܝܬܽܘܢ ܠܺܐܝܪܺܝܚܽܘ. ܘܶܐܬܟܰܬܰܫܘ ܥܰܡܟܽܘܢ ܓܰܒܖ̈ܶܐ ܕܺܐܝܪܺܝܚܽܘ. ܘܳܐܡܽܘܖ̈ܳܝܶܐ. ܘܰܟܢܰܥܢܳܝ̈ܶܐ. ܘܦܰܖ̈ܙܳܝܶܐ. ܘܚܺܝܬܝ̈ܶܐ. ܘܓܰܖ̈ܓܽܘܣܳܝܶܐ. ܘܚܳܘܳܝ̈ܶܐ. ܘܝܳܒܽܘܣܳܝ̈ܶܐ ܘܰܐܫܠܡܶܬ ܐܶܢܽܘܢ ܒܺܐܝ̈ܕܰܝܟܽܘܢ.
12 ܘܫܰܕܪܶܬ ܩܕܳܡܰܝܟܽܘܢ ܕܶܒܽܘܖ̈ܝܳܬܳܐ. ܘܰܐܘܒܕܶܬ ܡܶܢ ܩܕܳܡܰܝܟܽܘܢ ܬܪܶܝܢ ܡܰܠܟܰܝ̈ܗܽܘܢ. ܕܳܐܡܽܘܖ̈ܳܝܶܐ. ܠܳܐ ܒܣܰܝܦܰܝ̈ܟܽܘܢ. ܐܳܦܠܳܐ ܒܩܶܫ̈ܬܳܬܟܽܘܢ.
13 ܘܝܶܗܒܶܬ ܠܟܽܘܢ ܐܰܪܥܳܐ ܕܠܳܐ ܠܺܐܝܬܽܘܢ ܒܳܗ̇. ܘܩܽܘܖ̈ܝܳܐ ܕܠܳܐ ܒܢܰܝܬܽܘܢ. ܘܺܝܬܒܬܽܘܢ ܒܗܶܝܢ. ܘܟܰܖ̈ܡܶܐ ܘܙܰܝ̈ܬܶܐ ܕܠܳܐ ܢܨܰܒܬܽܘܢ. ܗܳܐ ܐܳܟܠܺܝܢ ܐ̱ܢܬܽܘܢ.
14 ܡܶܟܺܝܠ ܕܚܰܠܘ ܡܶܢ ܡܳܪܝܳܐ. ܘܦܽܘܠܚܽܘܗܝ. ܒܬܰܡܺܝܡܽܘܬܳܐ ܘܰܒܩܽܘܫܬܳܐ. ܘܰܐܥܒܰܪܘ ܡܶܢ ܠܶܒܟܽܘܢ ܐܰܠܳܗ̈ܶܐ ܢܽܘܟܖ̈ܳܝܶܐ. ܕܰܦܠܰܚܘ ܐܰܒܳܗܰܝ̈ܟܽܘܢ ܒܥܶܒܪܳܐ ܕܢܰܗܪܳܐ ܘܰܒܡܶܨܪܶܝܢ. ܘܰܐܢ̱ܬܽܘܢ ܦܠܽܘܚܘ ܠܡܳܪܝܳܐ.
15 ܘܶܐܢ ܒܺܝܫ ܗܽܘ ܒܥܰܝܢܰܝ̈ܟܽܘܢ ܠܡܶܦܠܰܚ ܠܡܳܪܝܳܐ. ܓܒܰܘ ܠܟܽܘܢ ܝܰܘܡܳܢܳܐ ܠܡܰܢ ܦܳܠܚܺܝܢ ܐ̱ܢܬܽܘܢ. ܐܶܢ ܠܰܐܠܳܗ̈ܶܐ ܕܰܦܠܰܚܘ ܐܰܒܳܗܰܝ̈ܟܽܘܢ ܒܥܶܒܪܳܐ ܕܢܰܗܪܳܐ. ܘܶܐܢ ܠܰܐܠܳܗ̈ܶܐ ܕܳܐܡܽܘܖ̈ܳܝܶܐ ܕܥܳܡܪܺܝܢ ܐ̱ܢܬܽܘܢ ܒܰܐܪܥܗܽܘܢ. ܐܶܢܳܐ ܕܶܝܢ ܘܰܒܢܰܝ̈ ܒܰܝܬܝ. ܠܡܳܪܝܳܐ ܗܽܘ ܐܰܠܳܗܳܐ ܦܳܠܚܺܝܢ ܚܢܰܢ.
16 ܘܰܥܢܰܘ ܟܽܠܶܗ ܥܰܡܳܐ ܘܶܐܡܰܪܘ. ܚܳܣ ܠܰܢ ܕܢܶܫܒܽܘܩ ܠܡܳܪܝܳܐ. ܘܢܶܦܠܽܘܚ ܠܰܐܠܳܗ̈ܶܐ ܐ̱ܚܖ̈ܳܢܶܐ.
17 ܡܶܛܽܠ ܕܡܳܪܝܳܐ ܗܽܘ ܐܰܠܳܗܰܢ. ܗܰܘ ܕܰܐܣܩܰܢ ܡܶܢ ܐܰܪܥܳܐ ܕܡܶܨܪܶܝܢ ܡܶܢ ܒܶܝܬ ܥܰܒܕܽܘܬܐ. ܘܰܥܒܰܕ ܩܕܳܡܰܝܢ ܗܳܠܶܝܢ ܐܳܬܘ̈ܳܬܳܐ ܪܰܘܖ̈ܒܳܬܳܐ. ܘܢܰܛܪܰܢ ܒܟܽܠܳܗ̇ ܐܽܘܪܚܳܐ ܕܗܰܠܶܟܢ ܒܳܗ̇. ܘܰܒܟܽܠܗܽܘܢ ܥܰܡ̈ܡܶܐ ܕܰܥܒܰܪܢ ܒܰܝܢܳܬܗܽܘܢ.
18 ܘܰܐܘܒܶܕ ܐܶܢܽܘܢ ܡܳܪܝܳܐ ܐܰܠܳܗܰܢ ܠܟܽܠܗܽܘܢ ܥܰܡ̈ܡܶܐ ܗܳܠܶܝܢ. ܘܠܳܐܡܽܘܖ̈ܳܝܶܐ ܕܥܳܡܪܺܝܢ ܚܢܰܢ ܒܰܐܪܥܗܽܘܢ. ܐܰܘܒܶܕ ܐܶܢܽܘܢ ܡܳܪܝܳܐ ܡܶܢ ܩܕܳܡܰܝܢ. ܡܶܛܽܠ ܗܳܢܳܐ ܠܡܳܪܝܳܐ ܗܽܘ ܦܳܠܚܺܝܢ ܚܢܰܢ. ܡܶܛܽܠ ܕܗܽܘܝܽܘ ܐܰܠܳܗܳܐ ܒܰܠܚܽܘܕܘܗܝ. ܘܗܽܘܝܽܘ ܐܰܠܳܗܰܢ.
19 ܘܶܐܡܰܪ ܝܶܫܽܘܥ ܠܥܰܡܳܐ. ܚܙܰܘ ܕܶܝܢ ܕܰܠܡܳܐ ܠܳܐ ܡܶܫܟܚܺܝܢ ܐ̱ܢܬܽܘܢ ܠܡܶܦܠܰܚ ܠܡܳܪܝܳܐ. ܡܶܛܽܠ ܕܰܐܠܳܗܰܐ ܗ̱ܘ ܩܰܕܺܝܫܳܐ. ܘܰܐܠܳܗܰܐ ܗ̱ܘ ܛܰܢܳܢܳܐ. ܘܠܳܐ ܕܶܝܢ ܫܳܒܶܩ ܠܚܰܘܒܰܝ̈ܟܽܘܢ ܘܠܰܚܛܳܗܰܝ̈ܟܽܘܢ.
20 ܕܰܠܡܳܐ ܬܶܫܒܩܽܘܢܶܗ ܠܡܳܪܝܳܐ. ܘܬܶܦܠܚܽܘܢ ܠܰܐܠܳܗ̈ܶܐ ܐ̱ܚܖ̈ܳܢܶܐ ܢܽܘܟܖ̈ܳܝܶܐ ܕܰܐܪܥܳܐ. ܘܢܶܗܦܽܘܟ ܡܳܪܝܳܐ ܠܡܰܒܐܳܫܽܘ ܠܟܽܘܢ. ܘܰܢܓܰܡܪܟܽܘܢ ܡܶܢ ܒܳܬܰܪ ܕܰܐܛܐܶܒ ܠܟܽܘܢ.
21 ܘܶܐܡܰܪܘ ܥܰܡܳܐ ܠܝܶܫܽܘܥ. ܠܳܐ ܗܳܘܶܐ ܠܰܢ ܦܽܘܠܚܳܢ ܐ̱ܚܪܺܝܢ. ܐܶܠܳܐ ܠܡܳܪܝܰܐ ܗ̱ܘ ܐܰܠܳܗܳܐ ܦܳܠܚܺܝܢܰܢ.
22 ܘܶܐܡܰܪ ܝܶܫܽܘܥ ܠܥܰܡܳܐ. ܣܳܗܕܺܝܢ ܐ̱ܢܬܽܘܢ ܒܢܰܦܫܟܽܘܢ. ܕܰܐܢ̱ܬܽܘܢ ܓܒܰܝܬܽܘܢ ܠܟܽܘܢ ܠܡܶܦܠܰܚ ܠܡܳܪܝܳܐ. ܘܳܐܡܪܺܝܢ ܠܶܗ ܣܳܗܕܺܝܢ ܚܢܰܢ.
23 ܐܳܡܰܪ ܠܗܽܘܢ ܝܶܫܽܘܥ. ܡܶܟܺܝܠ ܐܰܥܒܰܪܘ ܐܰܠܳܗ̈ܶܐ ܢܽܘܟܖ̈ܳܝܶܐ ܕܒܰܝܢܳܬܟܽܘܢ. ܘܰܐܬܩܶܢܘ ܠܶܒܟܽܘܢ ܠܘܳܬ ܡܳܪܝܳܐ ܐܰܠܳܗܳܐ ܕܺܝܣܪܳܐܶܝܠ.
24 ܘܶܐܡܰܪܘ ܥܰܡܳܐ ܠܝܶܫܽܘܥ. ܠܡܳܪܝܳܐ ܐܰܠܳܗܰܢ ܦܳܠܚܺܝܢ ܚܢܰܢ. ܘܰܒܩܳܠܶܗ ܫܳܡܥܺܝܢ ܚܢܰܢ.
25 ܘܰܐܩܺܝܡ ܝܶܫܽܘܥ ܕܺܝܰܬܺܝܩܺܝ ܠܥܰܡܳܐ ܒܶܗ ܒܝܰܘܡܳܐ ܗܰܘ. ܘܰܐܠܶܦ ܐܶܢܽܘܢ ܦܽܘܩ̈ܕܳܢܶܐ. ܘܕܺܝܢ̈ܶܐ. ܒܰܫܟܺܝܡ.
26 ܘܰܟܬܰܒ ܝܶܫܽܘܥ ܡ̈ܶܠܶܐ ܗܳܠܶܝܢ ܒܣܶܦܪܳܐ ܕܢܳܡܽܘܣܶܗ ܕܡܽܘܫܶܐ. ܘܰܢܣܰܒ ܟܺܐܦܳܐ ܪܰܒܬܳܐ. ܘܰܐܩܺܝܡܳܗ̇ ܬܚܶܝܬ ܒܶܛܡܬܳܐ ܕܒܶܝܬ ܡܰܩܕܫܶܗ ܕܡܳܪܝܳܐ.
27 ܘܶܐܡܰܪ ܝܶܫܽܘܥ ܠܟܽܠܶܗ ܥܰܡܳܐ. ܗܳܐ ܟܺܐܦܳܐ ܗܳܕܶܐ ܬܶܗܘܶܐ ܠܰܢ ܣܳܗܕܽܘܬܳܐ. ܡܶܛܽܠ ܕܗܺܝ ܫܶܡܥܰܬ ܟܽܠܗܶܝܢ ܡܶܠܰܘ̈ܗܝ ܕܡܳܪܝܳܐ ܕܡܰܠܶܠ ܥܰܡܰܢ. ܘܬܶܗܘܶܐ ܠܟܽܘܢ ܠܣܳܗܕܽܘܬܳܐ. ܕܠܳܐ ܬܟܰܕܒܽܘܢ ܒܡܳܪܝܳܐ ܐܰܠܳܗܟܽܘܢ.
28 ܘܡܶܢ ܒܳܬܰܪ ܕܦܰܩܶܕ ܝܶܫܽܘܥ ܠܥܰܡܳܐ. ܫܰܕܰܪ ܐܶܢܽܘܢ ܐ̱ܢܳܫ ܠܝܳܪܬܽܘܬܗ.
29 ܘܡܶܢ ܒܳܬܰܪ ܡ̈ܶܠܶܐ ܗܳܠܶܝܢ. ܡܺܝܬ ܝܶܫܽܘܥ ܒܰܪܢܽܘܢ ܥܰܒܕܶܗ ܕܡܳܪܝܳܐ. ܒܰܪ ܡܳܐܐ ܘܰܥܣܰܪ ܫܢܺܝ̈ܢ.
30 ܘܩܰܒܪܽܘܗܝ ܒܰܬܚܽܘܡܳܐ ܕܝܳܪܬܽܘܬܗ. ܒܬܰܡܢܰܬܣܪܰܚ ܕܰܒܛܽܘܪܳܐ ܕܰܐܦܪܶܝܡ. ܡܶܢ ܓܰܪܒܝܳܐ ܠܛܽܘܪܳܐ ܕܓܳܥܳܫ.
31 ܘܰܦܠܰܚ ܝܺܣܪܳܐܶܝܠ ܠܡܳܪܝܳܐ ܟܽܠܗܽܘܢ ܝܰܘ̈ܡܳܬܗ ܕܝܶܫܽܘܥ. ܘܟܽܠܗܽܘܢ ܝܰܘ̈ܡܳܬܐ ܕܩܰܫܺܝ̈ܫܶܐ ܕܰܚܝܰܘ ܢܽܘܓܪܳܐ ܒܳܬܰܪ ܝܶܫܽܘܥ. ܥܒܳܕܰܘ̈ܗܝ ܕܡܳܪܝܳܐ ܕܰܥܒܰܕ ܠܺܝܣܪܳܐܶܝܠ.
32 ܘܰܠܓܰܖ̈ܡܰܘܗܝ ܕܝܰܘܣܶܦ ܕܰܐܣܶܩܘ ܒܢܰܝ̈ ܝܺܣܪܳܐܶܝܠ ܡܶܢ ܡܶܨܪܶܝܢ. ܩܒܰܪܘ ܒܰܫܟܺܝܡ. ܒܦܳܠܓܽܘܬܳܐ ܕܚܰܩܠܳܐ ܕܰܙܒܰܢ ܝܰܥܩܽܘܒ ܡܶܢ ܚܡܽܘܪ ܐܰܒܽܘܗܝ ܕܰܫܟܺܝܡ ܒܡܳܐܐ ܢܩܰܘ̈ܳܢ. ܘܰܗܘܳܬ ܝܳܪܬܽܘܬܐ ܠܰܒܢܰܝ̈ ܝܰܘܣܶܦ.
33 ܘܶܐܠܺܝܥܳܙܳܪ ܟܳܗܢܳܐ ܒܰܪ ܐܰܗܪܽܘܢ ܟܳܗܢܳܐ ܡܺܝܬ. ܘܩܰܒܪܽܘܗܝ ܒܰܓܒܰܥܬܳܐ ܕܦܺܝܢܚܶܣ ܒܪܶܗ. ܕܶܐܬܝܰܗܒܰܬ ܠܶܗ ܒܛܽܘܪܳܐ ܕܰܐܦܪܶܝܡ.