Letter of Jeremiah 1
The Letter of Jeremiah
܀ ܐܓܪܬܐ ܕܐܪܡܝܐ ܢܒܝܐ ܐ ܀
1 ܦܶܚܡܳܐ ܕܫܰܕܰܪ ܐܶܪܰܡܝܳܐ ܠܰܫܒܰܝ̈ܳܐ ܕܶܐܫܬܒܺܝܘ ܠܒܳܒܶܠ: ܕܰܫܒܳܐ ܢܒܽܘܟܰܕܢܳܨܰܪ ܡܰܠܟܳܐ ܕܒܳܒܶܠ: ܠܰܡܚܰܘܳܝܽܘ ܐܶܢܽܘܢ ܐܰܝܟ ܕܶܐܬܦܩܶܕ ܡܶܢ ܡܳܪܝܳܐ. ܡܶܛܽܠ ܚܛܳܗ̈ܶܐ ܕܰܚܛܰܝܬܽܘܢ ܩܕܳܡ ܡܳܪܝܳܐ ܐܶܫܬܒܺܝܬܽܘܢ ܠܒܳܒܶܠ: ܡܶܢ ܢܒܽܘܟܰܕܢܳܨܰܪ ܡܰܠܟܳܐ ܕܒܳܒܶܠ.
2 ܡܳܐ ܕܥܰܠܬܽܘܢ ܠܒܳܒܶܠ: ܬܶܗܘܽܘܢ ܬܰܡܳܢ ܫܢܰܝ̈ܳܐ ܣܰܓܺܝ̈ܐܳܬܳܐ ܘܙܰܒܢܳܐ ܢܰܓܺܝܪܳܐ ܥܕܰܡܳܐ ܠܫܰܒܥܺܝܢ ܫܢܺܝ̈ܢ. ܘܡܶܢ ܒܳܬܰܪ ܫܰܒܥܺܝܢ ܫܢܺܝ̈ܢ ܐܰܦܶܩܟܽܘܢ ܡܶܢ ܬܰܡܳܢ ܒܰܫܠܳܡܳܐ.
3 ܗܳܫܳܐ ܕܶܝܢ ܗܳܐ ܚܳܙܶܝܢ ܐܢ̱ܬܽܘܢ ܒܒܳܒܶܠ ܐܰܠܳܗ̈ܶܐ ܕܣܺܐܡܳܐ ܘܰܕܕܰܗܒܳܐ ܘܰܕܩܰܝܣܳܐ ܘܰܕܟܺܐܦ̈ܶܐ: ܕܡܶܫܬܰܩܠܺܝܢ ܥܰܠ ܟܰܬܦ̈ܳܬܳܐ: ܘܰܡܚܰܘܶܝܢ ܕܰܚ̈ܠܳܬܳܐ ܠܥܰܡ̱̈ܡܶܐ.
4 ܐܶܙܕܰܗ݇ܪܘ ܗܳܟܺܝܠ ܕܰܠܡܳܐ ܐܳܦ ܐܰܢ̱ܬܽܘܢ ܬܶܬܕܰܡܽܘܢ ܠܗܽܘܢ ܠܥܰܡ̱̈ܡܶܐ. ܠܳܐ ܬܶܕܚܠܽܘܢ ܡܶܢܗܽܘܢ܆ ܘܠܳܐ ܬܶܙܽܘܥܽܘܢ.
5 ܟܰܕ ܬܶܚܙܽܘܢ ܟܶܢ̈ܫܶܐ ܣܰܓܺܝ̈ܐܶܐ ܩܕܳܡܰܝܗܽܘܢ ܘܒܶܣܬܰܪܗܽܘܢ ܕܣܳܓܕܺܝܢ ܠܗܽܘܢ: ܐܶܠܳܐ ܐ̱ܡܰܪܘ ܐܰܢ̱ܬܽܘܢ ܒܬܰܪ̈ܥܝܳܬܟܽܘܢ: ܠܳܟ ܗ̱ܽܘ ܡܳܪܝܳܐ ܘܳܠܶܐ ܠܡܶܣܓܰܕ ܒܰܠܚܽܘܕ.
6 ܡܶܛܽܠ ܕܡܰܠܰܐܟܶܗ ܕܡܳܪܝܳܐ ܥܰܡܟܽܘܢ ܗ̱ܽܘ. ܘܗܽܘ ܢܶܬܒܰܥ ܢܰܦ̈ܫܳܬܟܽܘܢ.
7 ܠܶܫܳܢܳܐ ܓܶܝܪ ܐܺܝܬ ܠܗܽܘܢ ܕܰܓܠܺܝܦ ܒܝܰܕ ܢܰܓܳܪܳܐ. ܘܰܩܪܺܝܡܺܝܢ ܒܕܰܗܒܳܐ ܘܰܒܣܺܐܡܳܐ. ܘܠܳܐ ܡܶܫܟܚܺܝܢ ܠܰܡܡܰܠܳܠܽܘ. ܡܶܛܽܠ ܕܰܣܪ̈ܺܩܶܐ ܐܶܢܽܘܢ ܘܡܺܝ̈ܬܶܐ.
8 ܘܰܐܝܟ ܕܫܰܦܺܝܪ ܨܶܒܬܳܐ ܠܰܒܬܽܘܠܬܳܐ: ܗܳܟܰܢܳܐ ܫܳܩܠܺܝܢ ܕܰܗܒܳܐ.
9 ܘܚܳܫܠܺܝܢ ܟܠܺܝ̈ܠܶܐ: ܘܣܳܝܡܺܝܢ ܒܪ̈ܺܝܫܶܐ ܕܰܐܠܳܗܰܝ̈ܗܽܘܢ. ܝܺܕܺܝܥܳܐ ܗ̱ܝ ܕܶܝܢ ܕܡܳܐ ܕܟܽܘܡܖ̈ܰܝܗܽܘܢ ܒܳܣܡܺܝܢ: ܡܪܺܝܡܺܝܢ ܕܰܗܒܳܐ ܘܣܺܐܡܳܐ ܡܶܢ ܐܰܠܳܗܰܝ̈ܗܽܘܢ: ܘܰܥܠܰܝܗܽܘܢ ܡܰܦܩܺܝܢ.
10 ܘܝܳܗܒܺܝܢ ܡܶܢܶܗ ܡܶܢ ܥܒܳܕܳܐ ܠܙܳܢܺܝܬܳܐ. ܘܰܡܨܰܒܬܺܝܢ ܠܗܽܘܢ ܐܰܝܟ ܒܢܰܝ̈ܢܳܫܳܐ ܒܰܠܒܽܘ̈ܫܶܐ: ܘܠܰܐܠܳܗ̈ܶܐ ܕܕܰܗܒܳܐ ܘܰܕܣܺܐܡܳܐ ܘܰܕܩܰܝܣܳܐ.
11 ܗܶܢܽܘܢ ܕܶܝܢ ܠܳܐ ܡܶܬܦܰܪܩܺܝܢ ܡܶܢ ܫܽܘܚܬܳܐ ܘܡܶܢ ܚܒܳܠܳܐ. ܠܳܒܫܺܝܢ ܠܒܽܘܫܳܐ ܕܰܐܪܓܘܳܢܳܐ.
12 ܘܡܳܪܩܺܝܢ ܐܰܦܰܝ̈ܗܽܘܢ ܡܶܛܽܠ ܚܶܠܳܐ ܕܣܳܠܶܩ ܥܠܰܝܗܽܘܢ ܡܶܢ ܒܰܝܬܳܐ.
13 ܘܫܰܒܛܳܐ ܐܰܚܺܝܕ ܐܰܝܟ ܓܰܒܪܳܐ ܕܰܝܳܢܳܐ ܕܰܐܬܪܳܐ: ܗܳܢܳܐ ܕܠܰܐܝܠܶܝܢ ܕܚܳܛܶܝܢ ܒܶܗ ܠܡܰܘܒܳܕܽܘ ܠܳܐ ܡܶܫܟܰܚ.
14 ܘܰܐܚܰܝܕ ܚܰܪܒܳܐ ܒܝܰܡܺܝܢܶܗ: ܘܢܳܪܓܳܐ ܒܣܶܡܳܠܶܗ. ܘܢܰܦܫܶܗ ܡܶܢ ܩܪܳܒܳܐ ܘܡܶܢ ܠܳܣܛܳܝ̈ܶܐ ܠܳܐ ܡܶܫܟܰܚ ܠܰܡܫܰܘܙܳܒܽܘ. ܕܡܶܢ ܗܳܠܶܝܢ ܢܶܬܝܰܕܥܽܘܢ ܕܠܳܐ ܗܘܰܘ ܐܰܠܳܗ̈ܶܐ. ܠܳܐ ܬܶܕܚܠܽܘܢ ܠܗܽܘܢ.
15 ܐܰܝܟܰܢܳܐ ܓܶܝܪ ܕܡܳܐܢܳܐ ܕܦܰܚܳܪܳܐ ܡܳܐ ܕܶܐܬܬܒܰܪ ܠܰܝܬ ܒܶܗ ܚܰܫܚܽܘ.
16 ܗܳܟܰܢܳܐ ܐܶܢܽܘܢ ܐܰܠܳܗܰܝ̈ܗܽܘܢ. ܙܳܩܦܺܝܢ ܠܗܽܘܢ ܒܒ̈ܳܬܶܐ. ܥܰܝ̈ܢܰܝܗܽܘܢ ܡܰܠ̈ܝܳܢ ܥܰܦܪܳܐ: ܡܶܢ ܚܶܠܳܐ ܕܪ̈ܶܓܠܰܝܗܽܘܢ ܕܰܐܝܠܶܝܢ ܕܥܳܐܠܺܝܢ ܘܰܕܢܳܦܩܺܝܢ.
17 ܘܰܐܝܟ ܐ̱ܢܳܫ ܕܡܶܬܚܰܝܰܒ ܡܶܢ ܡܰܠܟܳܐ: ܗܳܟܰܢܳܐ ܡܬܰܚܡܺܝܢ ܕܪ̈ܳܥܰܝܗܽܘܢ ܐܰܝܟ ܡܚܰܝ̈ܒܶܐ ܠܡܰܘܬܳܐ. ܒܳܬܰܝ̈ܗܽܘܢ ܡܫܰܪܪܺܝܢ ܟܽܘܡܖ̈ܰܝܗܽܘܢ. ܘܳܐܚܕܺܝܢ ܒܣܽܘܟܖ̈ܶܐ ܘܰܒܡܽܘܟ̈ܠܶܐ: ܕܠܳܐ ܢܶܓܢܒܽܘܢ ܐܶܢܽܘܢ ܠܶܣܛܳܝ̈ܶܐ.
18 ܘܰܫܪ̈ܳܓܶܐ ܣܰܓܺܝ̈ܐܶܐ ܡܰܢܗܪܺܝܢ ܠܗܽܘܢ ܠܰܐܝܠܶܝܢ ܕܥܰܝܢܰܝ̈ܗܽܘܢ ܠܳܐ ܚܳܙ̈ܝܳܢ.
19 ܐܺܝܬܰܝܗܽܘܢ ܕܶܝܢ ܐܰܝܟ ܩܳܪ̈ܝܳܬܳܐ ܕܡܶܢ ܒܰܝܬܳܐ. ܘܠܶܒܗܽܘܢ ܫܳܛܶܐ ܘܛܳܥܶܐ. ܘܡܶܬܚܰܒܠܺܝܢ ܡܶܢ ܝܰܕ ܖ̈ܰܚܫܳܐ ܕܰܐܪܥܳܐ. ܘܡܶܬܰܐܟܠܺܝܢ ܗܶܢܽܘܢ ܘܰܠܒܽܘܫܰܝ̈ܗܽܘܢ. ܘܠܳܐ ܝܳܕܥܺܝܢ.
20 ܕܰܐܡܫܰܚܪ̈ܳܢ ܐܰܦܰܝ̈ܗܽܘܢ ܘܽܐܘ̈ܟܳܡܳܢ ܡܶܢ ܬܶܢܳܢܳܐ ܕܣܳܠܶܩ ܡܶܢ ܒܰܝܬܳܐ ܥܰܠ ܓܽܘܫܡܗܽܘܢ.
21 ܘܥܰܠ ܪ̈ܺܝܫܰܝܗܽܘܢ ܝܳܬܒܺܝܢ ܦܖ̈ܰܚܕܽܘܕܶܐ ܘܰܣܢܽܘܢ̈ܝܳܬܳܐ: ܘܢܰܥ̈ܒܶܐ ܐܰܟܚܕܳܐ ܘܳܐܦ ܓܽܘܡܪ̈ܳܪܶܐ.
22 ܘܡܶܢ ܗܳܠܶܝܢ ܬܶܫܬܰܘܕܥܽܘܢ ܕܠܳܐ ܗܘܰܘ ܐܰܠܳܗ̈ܶܐ. ܘܠܳܐ ܬܶܕܚܠܽܘܢ ܠܗܽܘܢ.
23 ܕܰܗܒܳܐ ܓܶܝܪ ܕܰܩܪܺܝܡ ܥܠܰܝܗܽܘܢ ܠܫܽܘܦܪܳܐ: ܐܶܢܗܽܘ ܕܐ̱ܢܳܫ ܠܳܐ ܢܶܡܪܩܺܝܘܗ̱ܝ ܡܶܢ ܫܽܘܚܬܶܗ: ܠܳܐ ܡܰܒܪܶܩ. ܐܳܦܠܳܐ ܟܰܕ ܡܶܬܦܰܫܪܺܝܢ ܗ̱ܘܰܘ ܡܰܪܓܫܺܝܢ ܗ̱ܘܰܘ.
24 ܡܶܛܽܠ ܕܒܰܕܡܰܝ̈ܳܐ ܣܰܓܺܝ̈ܶܐܐ ܙܒܺܝܢܺܝܢ. ܘܪܽܘܚܳܐ ܠܰܝܬ ܒܗܽܘܢ.
25 ܥܰܠ ܟܰܬܦ̈ܳܬܳܐ ܡܶܫܬܰܩܠܺܝܢ. ܡܶܛܽܠ ܕܠܳܐ ܡܗܰܠܟܺܝܢ. ܘܰܡܚܰܘܶܝܢ ܒܶܗܬܰܬܗܽܘܢ ܠܰܒܢܰܝ̈ܢܳܫܳܐ. ܢܶܒܗܬܽܘܢ ܕܶܝܢ ܐܳܦ ܡܫܰܡܫܳܢܰܝ̈ܗܽܘܢ.
26 ܡܶܛܽܠ ܕܶܐܢ ܢܶܦܠܽܘܢ ܥܰܠ ܐܰܪܥܳܐ: ܠܳܐ ܡܶܫܟܚܺܝܢ ܠܰܡܩܳܡ. ܐܳܦܠܳܐ ܐܶܢ ܐ̱ܢܳܫ ܢܶܙܩܽܘܦ ܐܶܢܽܘܢ: ܢܶܬܬܙܺܝܥܽܘܢ. ܐܳܦܠܳܐ ܐܶܢ ܡܶܨܛܠܶܐ: ܡܶܫܟܰܚ ܠܡܶܬܬܰܪܳܨܽܘ. ܐܶܠܳܐ ܐܰܝܟ ܡܺܝ̈ܬܶܐ ܣܳܝܡܺܝܢ ܠܗܽܘܢ ܡܶܐܟ̈ܠܳܬܳܐ.
27 ܡܶܢ ܕܶܒܚ̈ܳܬܗܽܘܢ ܕܶܝܢ ܕܰܡܩܰܪܒܺܝܢ ܠܗܽܘܢ: ܟܽܘܡܖ̈ܰܝܗܽܘܢ ܐܳܟܠܺܝܢ ܠܗܶܝܢ. ܘܢܶܫܰܝ̈ܗܽܘܢ ܡܶܬܠܰܥ̈ܒܳܢ ܡܶܢܗܶܝܢ. ܘܡܶܕܶܡ ܠܡܶܣ̈ܟܺܢܶܐ ܘܰܠܒܳܝ̈ܫܶܐ ܠܳܐ ܝܳܗܒܺܝܢ ܡܶܢ ܕܶܒܚܰܝ̈ܗܽܘܢ.
28 ܘܰܐܢ̱ܬܬܳܐ ܒܟܶܦܣܳܗ̇ ܘܰܒܚܰܝܽܘܬܳܗ̇ ܘܰܒܛܰܢܦܽܘܬܳܗ̇ ܡܶܬܩܰܪܒܳܐ ܠܗܽܘܢ. ܬܶܕܥܽܘܢ ܕܶܝܢ ܡܶܢ ܗܳܠܶܝܢ ܕܠܳܐ ܗܘܰܘ ܐܰܠܳܗ̈ܶܐ. ܘܠܳܐ ܬܶܕܚܠܽܘܢ ܠܗܽܘܢ.
29 ܐܰܝܟܰܢܳܐ ܓܶܝܪ ܢܶܬܩܪܽܘܢ ܐܰܠܳܗ̈ܶܐ: ܕܗܳܐ ܢܶܫ̈ܶܐ ܡܰܬܩ̈ܢܳܢ ܠܗܽܘܢ ܠܰܐܠܳܗ̈ܶܐ ܕܕܰܗܒܳܐ ܘܰܕܟܶܣܦܳܐ ܘܰܕܩܰܝܣܳܐ.
30 ܘܰܒܡܰܘܬܰܒܗܽܘܢ ܟܽܘܡܖ̈ܶܐ ܡܰܘܬܒܺܝܢ ܠܗܽܘܢ: ܟܰܕ ܡܨܰܪܶܝܢ ܢܰܚܬܰܝ̈ܗܽܘܢ: ܘܪ̈ܺܝܫܰܝܗܽܘܢ ܓܙܺܝܙܺܝܢ: ܘܰܓܙܺܝܙܺܝܢ ܕܰܩܢܰܝ̈ܗܽܘܢ ܘܰܓܪܺܝܥܺܝܢ: ܘܰܓܠܶܝܢ ܪ̈ܺܝܫܰܝܗܽܘܢ.
31 ܘܢܳܗܡܺܝܢ ܒܰܩܥܳܬܳܐ ܩܕܳܡ ܐܰܠܳܗܰܝ̈ܗܽܘܢ ܐܰܝܟ ܐ̱ܢܳܫܺܝ̈ܢ ܥܰܠ ܫܳܪܽܘܬ ܡܺܝ̈ܬܶܐ.
32 ܘܡܶܢ ܠܒܽܘܫܰܝ̈ܗܽܘܢ ܢܳܣܒܺܝܢ ܟܽܘܡܖ̈ܶܐ: ܘܡܰܠܒܫܺܝܢ ܢܶܫܶܝ̈ܗܽܘܢ ܘܰܒܢܰܝ̈ܗܽܘܢ.
33 ܐܳܦܠܳܐ ܐܶܢ ܐ̱ܢܳܫ ܢܶܥܒܶܕ ܠܗܽܘܢ ܒܺܝܫܬܳܐ ܐܰܘ ܛܳܒܬܳܐ: ܡܶܫܟܚܺܝܢ ܕܢܶܦܪܥܽܘܢܳܝܗ̱ܝ. ܐܳܦܠܳܐ ܡܰܠܟܳܐ ܡܶܫܟܚܺܝܢ ܕܰܢܩܺܝܡܽܘܢ ܐܰܘ ܕܢܶܥܒܕܽܘܢ.
34 ܗܳܟܰܢܳܐ ܐܳܦܠܳܐ ܥܽܘܬܪܳܐ ܐܳܦܠܳܐ ܟܶܣܦܳܐ ܡܶܫܟܚܺܝܢ ܠܡܶܬܰܠ ܠܐ̱ܢܳܫ. ܘܶܐܢ ܐ̱ܢܳܫ ܢܕܰܪ ܠܗܽܘܢ ܢܶܕܪܳܐ ܘܠܳܐ ܢܶܦܪܥܺܝܘܗ̱ܝ: ܠܳܐ ܢܶܬܒܥܽܘܢܶܗ.
35 ܠܒܰܪܢܳܫܳܐ ܡܶܢ ܡܰܘܬܳܐ ܠܳܐ ܢܶܦܪܩܽܘܢ. ܘܠܳܐ ܠܰܒܨܺܝܪܳܐ ܡܶܢ ܥܰܫܺܝܢܳܐ ܢܦܰܨܽܘܢ.
36 ܘܰܠܓܰܒܪܳܐ ܣܰܡܝܳܐ ܠܳܐ ܡܶܫܟܚܺܝܢ ܠܡܶܬܰܠ ܠܶܗ ܚܙܳܬܳܐ. ܘܰܠܒܳܝܫܳܐ ܡܶܢ ܐܰܢܰܢܩܺܝ ܠܳܐ ܢܰܦܩܽܘܢ.
37 ܥܰܠ ܐܰܪ̈ܡܠܳܬܳܐ ܠܳܐ ܡܪܰܚܡܺܝܢ. ܘܠܳܐ ܠܝܰܬܡ̈ܶܐ ܡܰܛܶܐܒܺܝܢ. ܘܠܳܐ ܠܡܶܣ̈ܟܺܢܶܐ ܡܦܰܪܢܣܺܝܢ.
38 ܠܟܺܐܦ̈ܶܐ ܕܫܰܕ̈ܝܳܢ ܒܛܽܘܪܳܐ ܕܳܡܶܝܢ ܐܰܠܳܗ̈ܶܐ ܕܩܰܝܣܳܐ ܘܰܕܣܺܐܡܳܐ ܘܰܕܕܰܗܒܳܐ. ܡܫܰܡܫܳܢܰܝ̈ܗܽܘܢ ܕܶܝܢ ܢܶܒܗܬܽܘܢ: ܕܝܳܕܥܺܝܢ ܕܚܰܫܚܽܘ ܠܰܝܬ ܒܗܽܘܢ. ܘܡܰܛܥܶܝܢ ܒܗܽܘܢ ܠܰܒܢܰܝ̈ܢܳܫܳܐ.
39 ܐܰܝܟܰܢܳܐ ܕܢܶܬܝܰܕܥܽܘܢ ܕܰܐܠܳܗ̈ܶܐ ܐܶܢܽܘܢ.
40 ܕܗܳܐ ܐܳܦ ܟܰܠ̈ܕܳܝܶܐ ܫܳܝܛܺܝܢ ܠܗܽܘܢ. ܕܡܳܐ ܕܰܚܙܰܘ ܦܺܐܩܳܐ ܕܠܳܐ ܡܶܫܟܰܚ ܠܰܡܡܰܠܳܠܽܘ: ܡܩܰܪܒܺܝܢ ܠܶܗ ܠܘܳܬ ܐܰܦܰܝ̈ ܬܰܪܥܳܐ. ܘܒܶܥܶܝܢ ܕܰܢܡܰܠܶܠ: ܘܢܶܩܪܶܐ ܐܰܝܟ ܕܡܶܫܟܰܚ ܠܡܶܕܰܥ.
41 ܘܠܳܐ ܡܶܫܟܚܺܝܢ ܗܶܢܽܘܢ ܕܢܶܕܥܽܘܢ ܠܡܶܫܒܰܩ ܐܶܢܽܘܢ. ܣܽܘܟܳܠܳܐ ܓܶܝܪ ܠܰܝܬ ܒܗܽܘܢ.
42 ܢܶܫ̈ܶܐ ܕܶܝܢ ܡܨܰܒ̈ܬܳܢ ܒܚܰܒ̈ܠܶܐ ܘܝܳܬܒ̈ܳܢ ܒܽܐܘܪ̈ܚܳܬܳܐ. ܘܣܳܝ̈ܡܳܢ ܒܶܣ̈ܡܶܐ ܦܺܐܖ̈ܶܐ.
43 ܡܳܐ ܕܶܝܢ ܕܶܐܬܢܰܓܕܰܬ ܚܕܳܐ ܡܶܢܗܶܝܢ ܡܶܢ ܐ̱ܢܳܫ ܡܶܢ ܥܳܒܽܘܖ̈ܶܐ ܕܬܶܫܟܰܒ ܥܰܡܶܗ: ܡܚܰܣܕܳܐ ܠܰܚܒܰܪܬܳܗ̇ ܘܳܐܡܪܳܐ. ܕܠܳܐ ܐܰܫܘܝܶܟܝ ܐܰܟܘܳܬܝ. ܐܳܦܠܳܐ ܒܠܳܗ̇ ܐܶܬܦܣܶܩ.
44 ܟܽܠܡܶܕܶܡ ܕܶܝܢ ܕܡܶܬܥܒܶܕ ܠܗܽܘܢ ܣܪܺܝܩ ܗ̱ܽܘ. ܐܰܝܟܰܢܳܐ ܗܳܟܺܝܠ ܢܶܗܕܽܘܢ ܥܠܰܝܗܽܘܢ: ܕܰܐܠܳܗ̈ܶܐ ܐܶܢܽܘܢ. ܐܰܘ ܐܰܝܟܰܢܳܐ ܢܶܬܩܪܽܘܢ ܐܰܠܳܗ̈ܶܐ.
45 ܕܒܺܐܝܕܰܝ̈ ܢܰܓܳܪܳܐ ܘܩܰܝܢܳܝܳܐ ܐܶܬܥܒܶܕܘ. ܐܶܠܳܐ ܐܰܝܟ ܕܨܳܒܶܝܢ ܐܽܘܡܳܢܰܝ̈ܗܽܘܢ ܥܳܒܕܺܝܢ ܠܗܽܘܢ.
46 ܐܳܦ ܗܳܢܽܘܢ ܕܶܝܢ ܐܽܘܡܳܢܰܝ̈ܗܽܘܢ ܠܳܐ ܡܟܰܬܪܺܝܢ ܙܰܒܢܳܐ ܣܰܓܺܝܳܐܐ.
47 ܐܰܝܟܰܢܳܐ ܗܳܟܺܝܠ ܡܶܫܟܚܳܐ ܕܗܳܢܽܘܢ ܕܰܥܒܰܕܘ ܢܶܗܘܽܘܢ ܐܰܠܳܗ̈ܶܐ. ܫܒܰܩܘ ܓܶܝܪ ܕܰܓܳܠܽܘܬܳܐ ܘܚܶܣܕܳܐ ܠܰܐܝܠܶܝܢ ܕܡܶܬܝܰܠܕܺܝܢ.
48 ܡܳܐ ܓܶܝܪ ܕܢܺܐܬܶܐ ܥܠܰܝܗܽܘܢ ܩܪܳܒܳܐ ܘܒܺܝܫܬܳܐ: ܡܶܬܪܰܥܶܝܢ ܟܽܘܡܪ̈ܰܝܗܽܘܢ ܒܰܝܢܰܝܗܽܘܢ ܠܢܰܦܫܗܽܘܢ: ܕܰܐܝܟܳܐ ܢܛܰܫܽܘܢ ܐܶܢܽܘܢ ܥܰܡܗܽܘܢ.
49 ܐܰܝܟܰܢܳܐ ܗܳܟܺܝܠ ܠܳܐ ܘܳܠܶܐ ܠܡܶܕܰܥ ܕܠܳܐ ܗܘܰܘ ܐܰܠܳܗ̈ܶܐ: ܐܶܠܳܐ ܥܒܳܕ ܐܺܝܕܰܝ̈ܳܐ ܕܐ̱ܢܳܫ̈ܳܐ. ܘܠܳܐ ܡܫܰܘܙܒܺܝܢ ܢܰܦܫܗܽܘܢ ܡܶܢ ܩܪܳܒܳܐ: ܐܳܦܠܳܐ ܡܶܢ ܒܺܝܫܬܳܐ.
50 ܥܒܺܝ̈ܕܶܐ ܓܶܝܪ ܕܩܰܝܣܳܐ ܘܰܕܟܶܣܦܳܐ ܘܰܕܕܰܗܒܳܐ: ܢܶܬܝܰܕܥܽܘܢ ܠܰܐ̱ܚܪܳܝܬܳܐ ܠܟܽܠܗܽܘܢ ܥܰܡ̱̈ܡܶܐ ܕܕܰܓܳܠܽܘܬܳܐ ܐܶܢܽܘܢ. ܠܡܰܠܟܳܐ ܕܶܝܢ ܓܰܠܝܳܐܺܝܬ ܢܶܬܚܙܶܐ: ܕܠܳܐ ܗܘܰܘ ܐܰܠܳܗ̈ܶܐ. ܐܶܠܳܐ ܥܒܳܕ ܐܺܝܕܰܝ̈ܳܐ ܕܰܒܢܰܝ̈ܢܳܫܳܐ. ܘܡܶܕܶܡ ܡܶܢ ܥܒܳܕ̈ܶܐ ܕܰܐܠܳܗܳܐ ܠܰܝܬ ܒܗܽܘܢ.
51 ܗܳܐ ܠܟܽܠܢܳܫ ܝܺܕܺܝܥܳܐ ܗ̱ܝ ܗܳܕܶܐ: ܕܠܳܐ ܗ̱ܘܰܘ ܐܰܠܳܗ̈ܶܐ.
52 ܡܶܛܽܠ ܕܡܰܠܟܳܐ ܥܰܠ ܐܰܪܥܳܐ ܠܳܐ ܢܩܺܝܡܽܘܢ. ܘܠܳܐ ܕܢܰܒܶܐܫܽܘܢ ܘܢܶܦܪܩܽܘܢ ܡܶܫܟܚܺܝܢ. ܘܡܶܛܪܳܐ ܠܰܒܢܰܝ̈ܢܳܫܳܐ ܠܳܐ ܢܶܬܠܽܘܢ.
53 ܕܺܝܢܳܐ ܕܶܝܢ ܠܳܐ ܢܕܽܘܢܽܘܢ ܐܳܦܠܳܐ ܕܢܰܦܫܗܽܘܢ. ܐܳܦܠܳܐ ܠܰܛܠܺܝܡܳܐ ܢܶܫܟܚܽܘܢ ܠܰܡܦܰܨܳܝܽܘ ܡܶܢ ܡܰܢ ܕܥܰܫܺܝܢ ܡܶܢܶܗ: ܡܶܛܽܠ ܕܠܳܐ ܡܶܫܟܚܺܝܢ.
54 ܘܠܳܐ ܐܰܝܟ ܢܰܥ̈ܒܶܐ ܒܶܝܬ ܫܡܰܝܳܐ ܠܰܐܪܥܳܐ ܦܳܪܚܺܝܢ ܒܳܐܐܰܪ. ܗܳܐ ܓܶܝܪ ܡܳܐ ܕܶܢܦܠܰܬ ܢܽܘܪܳܐ ܒܒܰܝܬܳܐ ܕܰܐܠܳܗ̈ܶܐ: ܟܽܘܡܖ̈ܰܝܗܽܘܢ ܥܳܪܩܺܝܢ ܢܳܦܩܺܝܢ ܠܒܰܪ. ܘܰܡܫܰܘܙܒܺܝܢ ܢܰܦܫܗܽܘܢ. ܗܶܢܽܘܢ ܕܶܝܢ ܐܰܝܟ ܩܳܪ̈ܝܳܬܳܐ ܒܰܡܨܰܥܬܳܐ ܝܳܩܕܺܝܢ.
55 ܠܽܘܩܒܰܠ ܡܰܠܟܳܐ ܕܶܝܢ ܐܰܘ ܩܪܰܒܬܳܢܳܐ ܠܳܐ ܢܩܽܘܡܽܘܢ.
56 ܐܰܝܟܰܢܳܐ ܗܳܟܺܝܠ ܢܶܬܝܰܕܥܽܘܢ ܐܰܘ ܢܶܬܗܝܰܡܢܽܘܢ ܕܰܐܠܳܗ̈ܶܐ ܐܶܢܽܘܢ. ܕܗܳܐ ܐܳܦܠܳܐ ܡܶܢ ܓܰܢܳܒ̈ܶܐ ܐܳܦܠܳܐ ܡܶܢ ܠܶܣܛܳܝ̈ܶܐ ܡܨܶܝܢ ܕܰܢܫܰܘܙܒܽܘܢ ܢܰܦܫܗܽܘܢ: ܐܰܠܳܗ̈ܶܐ ܕܩܰܝܣܳܐ ܘܰܕܟܶܣܦܳܐ ܘܰܕܕܰܗܒܳܐ.
57 ܕܗܳܐ ܐܰܝܠܶܝܢ ܕܥܰܫܺܝܢܺܝܢ ܘܚܰܝܠܬܳܢܺܝܢ: ܫܳܩܠܺܝܢ ܕܰܗܒܳܐ ܘܟܶܣܦܳܐ ܘܰܠܒܽܘܫܳܐ ܕܰܥܠܰܝܗܽܘܢ ܘܳܐܙܺܠ̱ܝܢ. ܘܐ̱ܢܳܫ ܡܶܢܗܽܘܢ ܠܳܐ ܡܶܫܟܰܚ ܡܥܰܕܰܪ ܢܰܦܫܶܗ.
58 ܡܝܰܬܰܪ ܗ̱ܽܘ ܕܶܝܢ ܡܶܢܗܽܘܢ ܡܰܠܟܳܐ ܐܰܝܢܳܐ ܕܰܡܚܰܘܶܐ ܓܰܢ̱ܒܳܪܽܘܬܳܐ. ܘܡܳܐܢܳܐ ܕܚܽܘܫܳܚܳܐ ܕܺܐܝܬ ܒܰܒܝܬܳܐ ܕܡܶܬܚܰܫܰܚ ܒܶܗ ܡܳܪܶܗ: ܝܰܬܺܝܪ ܡܶܢ ܐܰܠܳܗ̈ܶܐ ܕܕܰܓܳܠܽܘܬܳܐ. ܘܰܡܝܰܬܰܪ ܗ̱ܽܘ ܬܰܪܥܳܐ ܕܢܳܛܰܪ ܠܡܳܪܶܗ: ܝܰܬܺܝܪ ܡܶܢ ܐܰܠܳܗ̈ܶܐ ܕܕܰܓܳܠܽܘܬܳܐ.
59 ܫܶܡܫܳܐ ܕܶܝܢ ܘܣܰܗܪܳܐ ܘܟܰܘܟ̈ܒܶܐ: ܐܺܝܬܰܝܗܽܘܢ ܡܰܢܗܪ̈ܳܢܶܐ ܒܰܫܡܰܝܳܐ ܥܰܠ ܐܰܪܥܳܐ. ܘܡܶܫܬܰܕܪܺܝܢ ܠܨܶܒ̈ܘܳܬܗܽܘܢ ܘܡܶܫܬܰܡܥܺܝܢ.
60 ܐܳܦ ܒܰܪܩܳܐ ܡܳܐ ܕܰܐܒܪܶܩ: ܗܕܺܝܪ ܗ̱ܽܘ ܛܳܒ. ܗܳܟܰܢܳܐ ܐܳܦ ܪܽܘܚܳܐ ܕܢܳܫܒܳܐ ܒܟܽܠܶܗ ܟܽܘܪܳܐ.
61 ܘܰܥܢܳܢ̈ܶܐ ܡܳܐ ܕܶܐܬܦܩܶܕ̈ܝ ܡܶܢ ܐܰܠܳܗܳܐ ܕܢܺܐܙܳܠ̱̈ܢ ܢܰܝܬܝ̈ܳܢ ܡܶܛܪܳܐ ܥܰܠ ܟܽܠܳܗ̇ ܬܺܒܶܝܠ: ܐܳܙܳܠ̱̈ܢ ܘܰܡܫܰܠ̈ܡܳܢ ܡܶܕܶܡ ܕܡܶܬܦܰܩ̈ܕܳܢ.
62 ܘܳܐܦ ܢܽܘܪܳܐ ܕܡܶܫܬܰܕܪܳܐ ܡܶܢ ܠܥܶܠ ܕܬܰܘܩܶܕ ܛܽܘܖ̈ܶܐ ܘܪ̈ܳܡܳܬܳܐ ܘܥܳܒ̈ܶܐ: ܥܳܒܕܳܐ ܡܶܕܶܡ ܕܶܐܬܦܩܶܕ ܠܳܗ̇. ܗܳܠܶܝܢ ܕܶܝܢ ܐܳܦܠܳܐ ܒܰܕܡܽܘܬܳܐ: ܐܳܦܠܳܐ ܒܚܰܝܠܳܐ: ܘܠܳܐ ܒܰܥܒܳܕܳܐ ܕܳܡܶܝܢ ܠܚܰܕ ܡܶܢ ܗܳܠܶܝܢ ܥܒܳܕ̈ܶܐ.
63 ܡܶܛܽܠ ܗܳܢܳܐ ܐܰܝܟܰܢܳܐ ܢܶܬܩܪܽܘܢ ܐܰܘ ܢܶܣܒܪܽܘܢ ܥܠܰܝܗܽܘܢ ܕܰܐܠܳܗ̈ܶܐ ܐܶܢܽܘܢ: ܕܗܳܐ ܠܳܐ ܡܶܫܟܚܺܝܢ ܐܳܦܠܳܐ ܕܺܝܢܳܐ ܕܰܢܕܽܘܢܽܘܢ: ܘܠܳܐ ܕܢܰܛܶܐܒܽܘܢ ܘܠܳܐ ܕܢܰܒܶܐܫܽܘܢ ܠܰܒܢܰܝ̈ܢܳܫܳܐ.
64 ܕܰܥܘ ܗܳܟܺܝܠ ܕܠܳܐ ܗܘܰܘ ܐܰܠܳܗ̈ܶܐ. ܘܠܳܐ ܬܶܕܚܠܽܘܢ ܠܗܽܘܢ.
65 ܠܳܐ ܓܶܝܪ ܕܰܢܒܰܪܟܽܘܢ ܠܡܰܠܟܳܐ ܡܶܫܟܚܺܝܢ: ܘܠܳܐ ܕܰܢܠܽܘܛܽܘܢ.
66 ܘܳܐܬܘ̈ܳܬܳܐ ܠܥܰܡ̱̈ܡܶܐ ܒܰܫܡܰܝܳܐ ܠܳܐ ܢܚܰܘܽܘܢ. ܘܳܐܦܠܳܐ ܐܰܝܟ ܫܶܡܫܳܐ ܢܰܕܢܚܽܘܢ ܢܽܘܗܪܗܽܘܢ. ܘܠܳܐ ܡܰܢܗܪܺܝܢ ܐܰܝܟ ܣܰܗܪܳܐ.
67 ܚܰܝܘ̈ܳܬܳܐ ܕܒܰܪܳܐ ܡܝܰܬܪ̈ܳܢ ܐܶܢܶܝܢ ܡܶܢܗܽܘܢ. ܕܗܳܠܶܝܢ ܡܶܫܟ̈ܚܳܢ ܕܢܶܥܪ̈ܩܳܢ ܘܰܢܫܰܘ̈ܙܒܳܢ ܢܶܦܫܗܶܝܢ.
68 ܡܶܕܶܡ ܕܶܝܢ ܠܳܐ ܡܶܬܚܙܶܐ ܠܰܢ ܕܰܐܠܳܗ̈ܶܐ ܐܶܢܽܘܢ. ܡܶܛܽܠ ܗܳܢܳܐ ܠܳܐ ܬܶܕܚܠܽܘܢ ܡܶܢܗܽܘܢ.
69 ܐܰܝܟ ܥܰܪܙܳܠܳܐ ܓܶܝܪ ܕܡܰܩܛܝܳܐ ܕܡܶܕܶܡ ܠܳܐ ܢܳܛܰܪ: ܗܳܟܰܢܳܐ ܐܶܢܽܘܢ: ܐܳܦ ܐܰܠܳܗܰܝ̈ܗܽܘܢ ܕܩܰܝܣܳܐ ܘܰܕܟܶܣܦܳܐ ܘܰܕܕܰܗܒܳܐ. ܠܰܝܬ ܒܗܽܘܢ ܝܽܘܬܪܳܢ.
70 ܘܰܐܝܟ ܗܰܛܛܳܐ ܕܰܒܓܰܢܬܳܐ. ܕܟܽܠ ܦܳܪܰܚܬܳܐ ܥܠܰܘܗ̱ܝ ܝܳܬܒܳܐ: ܗܳܟܰܢܳܐ ܐܶܢܽܘܢ. ܘܰܠܡܺܝܬܳܐ ܕܰܫܕܶܐ ܒܚܶܫܽܘܟܳܐ: ܗܳܟܰܢܳܐ ܕܳܡܶܝܢ ܐܰܠܳܗܰܝ̈ܗܽܘܢ ܕܩܰܝܣܳܐ ܘܰܕܟܶܣܦܳܐ ܘܰܕܕܰܗܒܳܐ.
71 ܡܶܢ ܐܰܪܓܘܳܢܳܐ ܓܶܝܪ ܘܡܶܢ ܫܺܝܫܳܐ ܕܰܥܠܰܝܗܽܘܢ ܕܡܶܬܚܰܒܰܠ: ܕܬܶܕܥܽܘܢ ܕܠܳܐ ܗܘܰܘ ܐܰܠܳܗ̈ܶܐ. ܐܳܦ ܗܶܢܽܘܢ ܕܶܝܢ ܠܚܰܪܬܳܐ ܠܥܳܠܰܡ ܢܶܬܚܰܒܠܽܘܢ ܘܢܶܗܘܽܘܢ ܠܚܶܣܕܳܐ ܒܰܐܪܥܳܐ.
72 ܛܳܒ ܕܶܝܢ ܠܓܰܒܪܳܐ ܙܰܕܺܝܩܳܐ ܕܠܰܝܬ ܒܶܗ ܦܬܰܟܪܳܐ: ܕܪܰܚܺܝܩ ܡܢ ܚܶܣܕܳܐ: ܘܰܡܣܰܟܶܐ ܠܡܳܪܝܳܐ ܐܰܠܳܗܳܐ.