Jesus Sirach 26
The Book of Jesus Sirach
܀ ܝܫܘܥ ܒܪ ܐܣܝܪܐ ܟܘ ܀
1 ܐܰܢ̱ܬܬܳܐ ܛܳܒܬܳܐ ܛܽܘܒܰܘܗܝ ܠܒܰܥܠܳܗ̇. ܡܶܛܽܠ ܕܝܰܘ̈ܡܳܬܳܐ ܕܚܰܝܰܘ̈ܗܝ ܐܰܥܦܺܝܢ ܐܶܢܽܘܢ.
2 ܐܰܢ̱ܬܬܳܐ ܛܳܒܬܳܐ ܬܶܬܺܝܗܶܒ ܠܓܰܒܪܳܐ ܕܕܳܚܶܠ ܡܶܢ ܡܳܪܝܳܐ: ܚܠܳܦ ܥܒܳܕܰܘ̈ܗܝ ܛܳܒ̈ܶܐ.
3 ܐܰܢ̱ܬܬܳܐ ܚܰܝܠܬܳܢܺܝܬܳܐ ܬܒܰܣܶܡ ܒܰܥܠܳܗ̇: ܘܰܫܢܰܝ̈ ܚܰܝܰܘ̈ܗܝ ܒܚܰܕܽܘܬܳܐ ܢܫܰܠܶܡ.
4 ܐܶܢ ܥܰܬܺܝܪ ܗܽܘ: ܘܶܐܢ ܡܶܣܟܺܝܢ ܠܶܒܶܗ ܛܳܒ ܒܟܽܠܥܶܕܳܢ: ܘܰܐܦܰܘ̈ܗܝ ܢܰܗܺܝܪ̈ܳܢ.
5 ܡܶܢ ܬܠܳܬ ܙܳܥ ܠܶܒܝ. ܘܡܶܢ ܐܰܪܒܰܥ ܣܰܓܺܝ ܕܶܚܠܶܬ.
6 ܪܛܽܘܢܝܳܐ ܕܰܟܢܽܘܫܬܳܐ ܒܣܽܘܓܳܐܐ ܕܥܰܡܳܐ.
7 ܘܰܡܚܽܘܬܳܐ ܕܠܶܫܳܢܳܐ. ܟܽܠܗܶܝܢ ܐܰܟܚܕܳܐ. ܢܺܝܪܳܐ ܩܰܫܝܳܐ ܐܰܢ̱ܬܬܳܐ ܒܺܝܫܬܳܐ. ܘܡܰܢ ܕܰܡܣܰܝܒܰܪ ܠܳܗ̇: ܐܰܝܟ ܥܶܩܰܪܒܳܐ.
8 ܪܽܘܓܙܳܐ ܪܰܒܳܐ ܐܰܢ̱ܬܬܳܐ ܪܰܘܳܝܬܳܐ ܘܦܰܗܳܝܬܳܐ.
9 ܕܗܺܝ ܨܰܥܪܳܗ̇ ܠܳܐ ܡܟܰܣܝܳܐ.
10 ܙܳܢܝܽܘܬܳܗ̇ ܕܰܐܢ̱ܬܬܳܐ ܒܰܡܪܳܡܽܘܬ ܥܰܝ̈ܢܶܝܗ̇. ܘܡܶܢ ܓܒܺܝ̈ܢܶܝܗ̇ ܬܶܬܺܝܕܰܥ.
11 ܥܰܠ ܚܨܺܝܦܬܳܐ ܐܰܣܓܳܐ ܢܳܛܽܘܖ̈ܶܐ. ܡܶܛܽܠ ܕܠܰܝܬ ܠܳܗ̇ ܢܝܳܚܳܐ ܐܶܠܳܐ ܐܶܢ ܓܶܢܒܰܬ.
12 ܒܳܬܰܪ ܚܨܺܝܦܰܬ ܥܰܝ̈ܢܶܐ ܗܰܪܛ. ܘܠܳܐ ܬܶܫܬܰܘܚܰܪ ܕܰܠܡܳܐ ܬܕܰܓܶܠ ܒܳܟ.
13 ܐܰܝܟ ܨܰܗܝܳܐ ܕܥܳܐܶܠ ܡܶܢ ܐܽܘܪܚܳܐ. ܘܦܽܘܡܶܗ ܦܬܺܝܚ ܠܡܰܝ̈ܳܐ ܩܰܪܺܝܖ̈ܶܐ. ܘܡܶܢ ܟܽܠ ܡܺܝ̈ܢ ܫܳܬܶܐ. ܘܥܰܠ ܟܽܠ ܩܺܝܣ ܡܶܣܬܡܰܟ. ܘܰܩܕܳܡ ܟܽܠ ܓܶܐܪܳܐ ܦܬܺܝܚ ܩܛܺܪܩܶܗ. ܗܳܟܰܢܳܐ ܗ̱ܝ ܐܰܢ̱ܬܬܳܐ ܓܰܝܳܪܬܳܐ. ܕܰܠܟܽܠܢܳܫ ܦܬܺܝܚ ܪܰܚܡܳܗ̇.
14 ܡܰܘܗܰܒܬܶܗ ܕܡܳܪܝܳܐ ܐܰܢ̱ܬܬܳܐ ܛܳܒܬܳܐ. ܘܠܰܝܬ ܕܡܰܝ̈ܳܐ ܠܰܒܨܺܝܪܽܘܬ ܓܰܓܰܪܬܳܐ.
15 ܛܰܝܒܽܘܬܳܐ ܥܰܠ ܛܰܝܒܽܘܬܳܐ: ܐܰܢ̱ܬܬܳܐ ܒܰܗܽܘܬܬܳܢܺܝܬܳܐ.
16 ܘܠܰܝܬ ܡܰܬܩܳܠܳܐ ܠܰܒܨܺܝܪܽܘܬ ܦܽܘܡܳܐ.
17 ܐܰܝܟ ܫܶܡܫܳܐ ܕܕܳܢܰܚ ܒܰܪܩܺܝܥܳܐ ܕܰܫܡܰܝܳܐ: ܗܳܟܰܢܳܐ ܫܽܘܦܪܳܗ̇ ܕܰܐܢ̱ܬܬܳܐ ܛܳܒܬܳܐ ܒܡܰܘܬܰܒ ܒܰܝܬܳܗ̇.
18 ܐܰܝܟ ܫܪܳܓܳܐ ܕܡܰܢܗܰܪ ܥܰܠ ܡܢܳܪܬܳܐ ܕܩܽܘܕܫܳܐ. ܗܳܟܰܢܳܐ ܫܽܘܦܪܳܐ ܕܰܐܢ̱ܬܬܳܐ ܛܳܒܬܳܐ ܒܡܰܘܬܰܒ ܒܰܝܬܳܗ̇.
19 ܐܰܝܟ ܚܽܘܡܖ̈ܶܐ ܕܕܰܗܒܳܐ ܥܰܠ ܐܶܣܛܽܘܢܳܐ ܕܣܺܐܡܳܐ. ܝܳܐܝ̈ܳܢ ܥܶܩ̈ܒܳܬܳܗ̇ ܒܡܰܬܩܰܢ ܒܰܝܬܳܗ̇.
20 ܒܪܶܝ ܐܶܙܕܰܗܪ ܒܙܰܒܢܳܐ ܕܰܥܠܰܝܡܽܘܬܳܟ. ܘܠܳܐ ܬܶܬܶܠ ܠܢܽܘܟܪ̈ܳܝܶܐ ܚܰܝܠܳܟ. ܒܥܺܝ ܦܶܨܬܳܟ ܡܶܢ ܟܽܠ ܐܰܪܥ ܦܩܰܥܬܳܐ ܛܳܒܬܳܐ. ܠܡܶܙܪܥ ܙܰܪܥܳܟ ܒܬܰܘܠ̈ܕܳܬܳܟ ܬܟܺܝܠܳܐܺܝܬ. ܘܗܳܟܰܢܳܐ ܗܳܘ̈ܝܳܢ ܥܰܠ̈ܠܳܬܳܟ. ܘܠܳܐ ܟܰܪ ܕܗܽܘ ܬܶܗܘܶܐ ܫܰܪܒܬܳܟ. ܐܰܢ̱ܬܬܳܐ ܓܰܝܳܪܬܳܐ ܠܠܳܐ ܡܶܕܶܡ ܬܶܬܚܰܫܰܒ. ܐܰܢ̱ܬܰܬ ܓܰܒܪܳܐ ܕܶܝܢ ܐܰܝܟ ܡܰܓܕܠܳܐ ܗ̱ܝ ܕܡܰܘܬܳܐ ܠܰܐܝܠܶܝܢ ܕܡܶܬܕܰܒܩܺܝܢ ܠܳܗ̇ ܬܶܬܚܫܶܒ. ܐܰܢ̱ܬܬܳܐ ܪܰܫܺܝܥܬܳܐ ܒܰܡܢܳܬܶܗ ܕܓܰܒܪܳܐ ܥܰܘܳܠܳܐ ܬܶܬܺܝܗܶܒ. ܐܰܢ̱ܬܬܳܐ ܕܶܝܢ ܙܰܕܺܝܩܬܳܐ ܠܰܐܝܢܳܐ ܕܕܳܚܶܠ ܡܶܢ ܡܳܪܝܳܐ ܬܶܬܺܝܗܶܒ. ܠܰܐܢ̱ܬܬܳܐ ܐܰܝܕܳܐ ܕܠܳܐ ܒܳܗܬܳܐ: ܨܰܥܪܳܐ ܢܒܰܠܶܝܗ̇. ܒܰܪܬܳܐ ܕܶܝܢ ܐܶܣܟܺܡܬܳܢܺܝܬܳܐ ܐܳܦ ܡܶܢ ܒܰܥܠܳܗ̇ ܬܶܬܟܰܚܰܕ. ܐܰܢ̱ܬܬܳܐ ܕܶܝܢ ܕܠܳܐ ܒܶܗܬܬܳܐ: ܐܰܝܟ ܟܰܠܒܳܐ ܬܶܬܚܫܶܒ. ܘܰܐܝܕܳܐ ܕܕܳܚܠܳܐ ܡܶܢ ܡܪܳܝܳܐ: ܐܺܝܬ ܒܳܗ̇ ܒܶܗܬܬܳܐ. ܐܰܢ̱ܬܬܳܐ ܕܰܡܝܰܩܪܳܐ ܒܰܥܠܳܗ̇: ܠܟܽܠܢܳܫ ܚܰܟܺܝܡܬܳܐ ܬܶܬܚܫܶܒ. ܪܰܫܺܝܥܬܳܐ ܕܶܝܢ ܕܰܡܨܰܥܪܳܢܝܳܐ ܒܓܰܐܝܽܘܬܳܗ̇: ܠܟܽܠ ܐ̱ܢܳܫ ܬܶܬܺܝܕܰܥ. ܐܰܢ̱ܬܬܳܐ ܛܳܒܬܳܐ: ܛܽܘܒܰܘܗܝ ܠܒܰܥܠܳܗ̇. ܡܶܢܝܳܢܳܐ ܓܶܝܪ ܕܰܫܢܰܝ̈ܳܐ ܕܚܰܝܰܘ̈ܗܝ ܐܰܥܦܺܝܢ ܐܶܢܽܘܢ. ܚܶܪܝܳܢܳܐ ܕܰܐܢ̱ܬܬܳܐ ܒܡܰܟܺܝܟܽܘܬܳܐ ܗܽܘ. ܘܰܐܝܟ ܐܶܫܳܬܳܐ ܕܰܩܺܝܩܬܳܐ ܗܳܟܰܢܳܐ ܬܶܬܚܙܶܐ. ܐܰܢ̱ܬܬܳܐ ܩܰܗܠܳܢܺܝܬܳܐ ܘܦܰܟܺܝܗܬܳܐ: ܐܰܝܟ ܩܰܪܢܳܐ ܡܠܰܒܛܳܢܺܝܬܳܐ ܕܰܩܪܳܒܳܐ ܬܶܬܚܫܶܒ. ܕܢܰܦܫܳܐ ܕܶܝܢ ܕܟܽܠ ܒܰܪܢܳܫ ܕܺܐܝܬ: ܠܗܳܠܶܝܢ ܟܽܠܗܶܝܢ ܬܶܬܪܡܶܐ. ܒܰܫܓܽܘܫܝܳܐ ܕܰܩܪܳܒܳܐ: ܚܰܝ̈ܶܐ ܒܽܐܘܠܨܳܢܳܐ ܢܶܬܕܰܒܪܽܘܢ.
21 ܥܰܠ ܬܰܪܬܶܝܢ ܨܶܒ̈ܘܳܢ ܬܘܰܪ ܠܶܒܝ. ܘܥܰܠ ܬܠܳܬ ܣܰܓܺܝ ܐܶܬܒܐܶܫ ܠܺܝ.
22 ܥܰܠ ܓܰܒܪܳܐ ܒܰܪ ܚܺܐܖ̈ܶܐ ܕܶܐܬܡܰܣܟܰܢ ܘܶܐܨܛܪܶܟ. ܘܥܰܠ ܐ̱ܢܳܫ̈ܳܐ ܡܳܖ̈ܰܝ ܫܡܳܐ ܕܶܐܬܒܰܨܰܪܘ ܡܶܢ ܐܺܝܩܳܪܗܽܘܢ.
23 ܘܥܰܠ ܡܰܢ ܕܗܳܦܶܟ ܡܶܢ ܕܶܚܠܬܶܗ ܕܰܐܠܳܗܳܐ. ܠܥܳܒܶܕ ܥܰܘܠܳܐ ܐܰܫܠܡܽܘܗܝ ܠܝܰܘܡܳܐ ܕܩܶܛܠܳܐ.
24 ܒܩܰܫܝܽܘܬܳܐ ܪܰܒܬܳܐ ܡܶܬܦܰܨܶܐ ܬܰܓܳܪܳܐ ܡܶܢ ܚܛܳܗ̈ܶܐ. ܐܶܢ ܠܳܐ ܒܗܳܕܶܐ. ܒܗܳܕܶܐ ܡܶܬܬܩܶܠ. ܚܳܢܽܘܝܳܐ ܕܶܝܢ: ܠܳܐ ܡܶܙܕܰܕܰܩ ܡܶܢ ܚܛܳܗ̈ܶܐ.