Zephaniah 2
The Book of Zephaniah
܀ ܨܦܢܝܐ ܒ ܀
1 ܐܶܬܟܰܢܰܫܘ ܘܶܐܬܶܐܣܰܪܘ ܥܰܡܳܐ. ܕܠܳܐ ܪܕܳܐ.
2 ܘܥܰܕܠܳܐ ܬܶܗܘܢ ܐܰܝܟ ܥܽܘܪܳܐ ܕܥܳܒܰܪ. ܘܥܰܕܠܳܐ ܬܺܐܬܶܐ ܥܠܰܝܟܽܘܢ ܚܶܡܬܳܐ ܕܪܽܘܓܙܶܗ ܕܡܳܪܝܳܐ: ܥܰܕܠܳܐ ܢܺܐܬܶܐ ܥܠܰܝܟܽܘܢ ܝܰܘܡܳܐ ܕܪܽܘܓܙܶܗ ܕܡܳܪܝܳܐ.
3 ܒܥܰܐܗܝ ܠܡܳܪܝܳܐ ܟܽܠܟܽܘܢ ܡܰܟܺܝ̈ܟܶܝܗ̇ ܕܰܐܪܥܳܐ: ܘܰܥܒܶܕܘ ܕܺܝܢܳܐ: ܘܰܒܥܰܘ ܙܰܕܺܝܩܽܘܬܳܐ ܘܡܰܟܺܝܟܽܘܬܳܐ: ܟܒܰܪ ܬܶܣܬܰܬܪܽܘܢ ܒܝܰܘܡܳܐ ܕܪܽܘܓܙܶܗ ܕܡܳܪܝܳܐ.
4 ܡܶܛܽܠ ܕܥܳܐܙܳܐ ܫܒܺܝܩܬܳܐ ܬܶܗܘܶܐ: ܘܰܐܫܩܳܠܽܘܢ ܠܰܚܒܳܠܳܐ: ܠܰܐܫܕܽܘܕ ܒܛܰܗܪܳܐ ܢܶܕܒܪܽܘܢ: ܘܥܶܩܪܽܘܢ ܬܶܬܥܩܰܪ.
5 ܘܳܝ ܠܰܕܥܳܡܪܺܝܢ ܒܰܚܒܶܠ ܝܰܡܳܐ ܘܰܠܥܰܡܳܐ ܕܰܩܖ̈ܶܛܶܐ: ܦܶܬܓܳܡܶܗ ܕܡܳܪܝܳܐ ܥܠܰܝܟܶܝܢ ܟܢܰܥܢ ܘܰܐܪܥܳܐ ܕܰܦܠܶܫܬܳܝ̈ܶܐ: ܘܰܐܘܒܶܕܟܶܝܢ ܡܶܢ ܝܰܬܒܳܐ.
6 ܘܢܶܗܘܶܐ ܚܒܶܠ ܝܰܡܳܐ ܕܰܝܖ̈ܶܐ: ܘܰܩܖ̈ܶܛܶܐ ܒܶܝܬ ܡܰܪܥܺܝܬܳܐ ܠܰܓܙܳܖ̈ܶܐ ܕܥܳܢ̈ܳܐ.
7 ܘܢܶܗܘܶܐ ܚܒܶܠ ܝܰܡܳܐ ܠܫܰܪܟܳܐ ܕܒܶܝܬ ܝܺܗܽܘܕܳܐ: ܘܰܒܗܶܝܢ ܢܶܪܥܽܘܢ: ܘܰܒܒ̈ܳܬܶܐ ܕܰܐܫܩܳܠܽܘܢ ܒܪܰܡܫܳܐ ܢܶܪܒܥܽܘܢ: ܡܶܛܽܠ ܕܢܶܦܩܽܘܕ ܐܶܢܽܘܢ ܡܳܪܝܳܐ ܐܰܠܳܗܗܽܘܢ: ܘܢܰܩܢܶܐ ܫܒܺܝܬܗܽܘܢ.
8 ܫܶܡܥܶ݀ܬ ܚܶܣܕܳܐ ܕܡܽܘܐܳܒ: ܘܓܽܘܕܳܦܳܐ ܕܰܒܢܰܝ̈ ܥܰܡܽܘܢ: ܕܚܰܣܶܕܘ ܠܥܰܡܝ: ܘܶܐܬܪܰܘܪܰܒܘ ܥܰܠ ܬܚܽܘܡܗܽܘܢ.
9 ܡܶܛܽܠ ܗܳܠܶܝܢ ܚܰܝ ܐ̱ܢܳܐ ܐܳܡܰܪ ܡܳܪܝܳܐ ܚܰܝܠܬܳܢܳܐ ܐܰܠܳܗܳܐ ܕܺܝܣܪܳܐܶܝܠ: ܕܡܽܘܐܳܒ ܐܰܝܟ ܣܕܽܘܡ ܬܶܗܘܶܐ: ܘܰܒܢܰܝ̈ ܥܰܡܽܘܢ ܐܰܝܟ ܥܳܡܽܘܪܳܐ: ܕܶܐܬܚܰܒܠܰܬ ܢܶܨܒܰܬܗܶܝܢ: ܘܶܐܒܰܕ ܡܰܠܽܘܚܗܶܝܢ: ܘܰܗܘܰܝ̈ ܚܒܳܠܳܐ ܠܥܳܠܰܡ: ܫܰܪܟܶܗ ܕܥܰܡܝ ܒܶܒܙܽܘܢ ܐܶܢܶܝܢ: ܘܡܶܕܶܡ ܕܶܐܫܬܚܰܪ ܡܶܢ ܥܰܡܝ ܢܺܐܪܬܽܘܢ ܐܶܢܶܝܢ.
10 ܗܳܕܶܐ ܬܶܗܘܶܐ ܠܗܽܘܢ ܚܠܳܦ ܓܰܐܝܽܘܬܗܽܘܢ: ܥܰܠ ܕܚܰܣܶܕܘ ܘܶܐܬܪܰܘܪܰܒܘ ܥܰܠ ܥܰܡܶܗ ܕܡܳܪܝܳܐ ܚܰܝܠܬܳܢܳܐ ܥܰܠ ܝܺܣܪܳܐܶܝܠ.
11 ܐܶܬܓܠܺܝ ܡܳܪܝܳܐ ܥܠܰܝܗܽܘܢ: ܕܢܰܘܒܶܕ ܠܟܽܠܗܽܘܢ ܡܰܠܟܶܝ̈ܗ̇ ܕܰܐܪܥܳܐ: ܘܢܶܣܓܕܽܘܢ ܠܶܗ ܐ̱ܢܳܫ ܡܶܢ ܐܰܬܪܶܗ: ܟܽܠܗܶܝܢ ܓܳܙܖ̈ܳܬܳܐ ܕܝܰܡ̈ܡܶܐ.
12 ܐܳܦ ܐܰܢ̱ܬܽܘܢ ܟܽܘܫܳܝ̈ܶܐ ܩܛܺܝܠܰܝ̈ ܚܰܪܒܳܐ.
13 ܘܰܢܪܺܝܡ ܐܺܝܕܶܗ ܥܰܠ ܓܰܪܒܝܳܝܳܐ: ܘܢܰܘܒܶܕ ܠܳܐܬܽܘܪܳܝܳܐ: ܘܢܶܥܒܕܺܝܗ̇ ܠܢܺܝܢܘܶܐ ܠܰܚܒܳܠܳܐ ܘܰܠܨܰܕܝܳܐ ܐܰܝܟ ܡܰܕܒܪܳܐ.
14 ܘܢܶܪܒܥܽܘܢ ܒܓܰܘܳܗ̇ ܓܙܳܖ̈ܶܐ: ܘܟܽܠܗܶܝܢ ܚܰܝ̈ܘܳܬܳܐ ܕܥܰܡ̈ܡܶܐ: ܐܳܦ ܩܳܩ̈ܶܐ ܘܩܽܘ̈ܦܕܶܐ ܒܒܳܬܶܝ̈ܗ̇ ܢܒܽܘܬܽܘܢ: ܘܚܰܝ̈ܘܳܬܳܐ ܢܶܢܗ̈ܡܳܢ ܒܓܰܘܳܗ̇: ܘܚܰܪܒܳܐ ܒܬܰܖ̈ܥܶܝܗ̇: ܡܶܛܽܠ ܕܥܶܩܳܪܳܗ̇ ܐܶܬܦܰܪܣܺܝ.
15 ܗܳܕܳܐ ܗ̱ܝ ܡܕܺܝܢ̱ܬܳܐ ܥܰܫܺܝܢܬܳܐ ܕܝܳܬܒܳܐ ܗ̱ܘܳܬ ܒܫܶܠܝܳܐ: ܘܳܐܡܪܳܐ ܗ̱ܘܳܬ ܒܠܶܒܳܗ̇ ܐܶܢܳܐ ܐ̱ܢܳܐ ܘܠܰܝܬ ܬܽܘܒ ܐܰܟܘܳܬܝ: ܐܰܝܟܰܢܳܐ ܗܘܳܬ ܠܰܚܒܳܠܳܐ: ܘܒܶܝܬ ܡܰܪܒܥܳܐ ܠܚܰܝ̈ܘܳܬܳܐ: ܟܰܠܡܰܢ ܕܢܶܥܒܰܪ ܥܠܶܝܗ̇ ܢܶܬܡܰܗ: ܘܢܰܫܪܶܩ: ܘܰܢܢܺܝܦ ܒܺܐܝܕܶܗ ܘܢܺܐܡܰܪ.