Revelation 1
The Book of Revelation
܀ ܓܠܝܢܐ ܕܝܘܚܢܢ ܐ ܀
1- ܓܶܠܝܳܢܳܐ ܕܝܶܫܽܘܥ ܡܫܺܝܚܳܐ܇ ܗܰܘ ܕܝܰܗ̱ܒ ܠܶܗ ܐܰܠܳܗܳܐ: ܠܰܡܚܰܘܳܝܽܘ ܠܥܰܒܕܳܐ ܕܺܝܠܶܗ. ܗܳܢܶܝܢ ܕܙܳܕܶܩ ܠܡܶܗܘܳܐ ܒܰܥܓܰܠ܆ ܘܫܰܘܕܰܥ ܟܰܕ ܫܠܰܚ ܒܝܰܕ ܡܰܠܰܐܟܳܐ ܕܺܝܠܶܗ. ܠܥܰܒܕܶܗ ܝܽܘܚܰܢܳܢ܇
2- ܗܰܘ ܕܰܐܣܗܶܕ ܠܡܶܠܬܳܐ ܕܰܐܠܳܗܳܐ܇ ܘܰܠܣܳܗܕܽܘܬܶܗ ܕܝܶܫܽܘܥ ܡܫܺܝܚܳܐ܇ ܟܽܠܗܶܝܢ ܗܳܠܶܝܢ ܕܰܚܙܳܐ.
3- ܛܽܘܒܬܳܢܰܐ ܗ̱ܘ ܗܰܘ ܕܩܳܪܶܐ. ܘܗܳܢܽܘܢ ܕܫܳܡܥܺܝܢ ܡ̈ܶܠܶܐ ܕܰܢܒܺܝܽܘܬܳܐ ܗܳܕܶܐ. ܘܢܳܛܪܺܝܢ ܠܗܳܢܶܝܢ ܕܰܟܬܺܝ̈ܒܳܢ ܒܳܗ̇. ܗܽܘ ܓܶܝܪ ܙܰܒܢܳܐ ܩܪܶܒ܀
4- ܝܽܘܚܰܢܳܢ ܠܰܫܒܰܥ ܥ̈ܺܕܳܬܳܐ ܗܳܢܶܝܢ ܕܒܰܐܣܺܝܰܐ. ܛܰܝܒܽܘܬܳܐ ܠܟܽܘܢ ܘܫܰܝܢܳܐ. ܡܶܢ ܗܰܘ ܕܺܐܝܬܰܘܗ̱ܝ܆ ܘܗܰܘ ܕܺܐܝܬܰܘܗ̱ܝ ܗ̱ܘܳܐ܆ ܕܳܐܬܶܐ. ܘܡܶܢ ܫܒܰܥ ܪ̈ܽܘܚܶܐ ܗܳܢܶܝܢ ܕܰܩܕܳܡ ܟܽܘܪܣܝܳܐ ܕܺܝܠܶܗ܆
5- ܘܡܶܢ ܝܶܫܽܘܥ ܡܫܺܝܚܳܐ ܗܰܘ ܣܳܗܕܳܐ܇ ܗܰܘ ܡܗܰܝܡܢܳܐ܇ ܗܰܘ ܒܽܘܟܪܳܐ ܕܡܺܝ̈ܬܶܐ: ܘܪܺܝܫܳܢܳܐ ܕܡ̈ܰܠܟܶܐ ܕܰܐܪܥܳܐ܇ ܗܰܘ ܕܡܰܚܶܒ ܠܰܢ ܘܰܫܪܳܐ ܠܰܢ ܡܶܢ ܚܛܳܗ̈ܶܐ ܕܺܝܠܰܢ ܒܰܕܡܳܐ ܕܺܝܠܶܗ.
6- ܘܰܥܒܰܕ ܠܰܢ ܡܰܠܟܽܘܬܳܐ ܟܳܗܢܳܝܬܳܐ ܠܰܐܠܳܗܳܐ ܘܰܐܒܳܐ ܕܺܝܠܶܗ. ܕܠܶܗ ܬܶܫܒܽܘܚܬܳܐ ܘܽܐܘܚܕܳܢܳܐ ܠܥܳܠܡ̈ܶܐ ܕܥܳܠܡ̈ܶܐ ܐܰܡܺܝܢ.
7- ܗܳܐ ܐܳܬܶܐ ܥܰܡ ܥܢܳܢ̈ܶܐ. ܘܢܶܚ̈ܙܝܳܢܳܝܗ̱ܝ ܟܽܠ ܥܰܝܢܳܐ. ܘܳܐܦ ܐ̱ܢܳܫܺܝ̈ܢ ܗܳܢܽܘܢ ܕܕܰܩܪܽܘܗ̱ܝ. ܘܢܰܪ̈ܩܕܳܢ ܥܠܰܘܗ̱ܝ ܟܽܠܗܶܝܢ ܫܰܪ̈ܒܳܬܳܐ ܕܰܐܪܥܳܐ. ܐܺܝܢ ܘܰܐܡܺܝܢ܀
8- ܐܶܢܳܐ ܐܺܝܬܰܝ ܐܳܠܰܦ ܘܳܐܦ ܬܰܘ܇ ܐܳܡܰܪ ܡܳܪܝܳܐ ܐܰܠܳܗܳܐ ܗܰܘ ܕܺܐܝܬܰܘܗ̱ܝ. ܘܗܰܘ ܕܺܐܝܬܰܘܗ̱ܝ ܗ̱ܘܳܐ ܘܗܰܘ ܕܳܐܬܶܐ܇ ܗܰܘ ܐܰܚܺܝܕ ܟܽܠ܀
9- ܐܶܢܳܐ ܝܽܘܚܰܢܳܢ ܗܰܘ ܐܰܚܽܘܟܽܘܢ ܫܰܘܬܳܦܳܐ ܕܺܝܠܟܽܘܢ ܒܽܐܘܠܨܳܢܳܐ ܘܰܒܡܰܠܟܽܘܬܳܐ ܘܒܰܡܣܰܝܒܪܳܢܽܘܬܳܐ ܕܰܒܝܶܫܽܘܥ ܡܫܺܝܚܳܐ܆ ܗܘܺܝܬ ܒܓܳܙܰܪܬܳܐ ܕܡܶܬܩܰܪܝܳܐ ܦܰܛܡܳܘܣ. ܡܶܛܽܠ ܡܶܠܬܳܐ ܕܰܐܠܳܗܳܐ܆ ܘܡܶܛܽܠ ܣܳܗܕܽܘܬܶܗ ܕܝܶܫܽܘܥ ܡܫܺܝܚܳܐ.
10- ܗܘܺܝܬ ܒܪܽܘܚܳܐ ܒܝܰܘܡܳܐ ܡܳܪܳܢܳܝܳܐ. ܘܫܶܡܥܶܬ ܡܶܢ ܒܶܣܬܪܳܐ ܕܺܝܠܝ ܩܳܠܳܐ ܪܰܒܳܐ ܐܰܝܟ ܫܺܝܦܽܘܪܳܐ
11- ܕܳܐܡܰܪ. ܗܰܘ ܡܳܐ ܕܚܳܙܶܐ ܐܰܢ̱ܬ ܟܬܽܘܒ ܒܰܟܬܳܒܳܐ܆ ܘܫܰܕܰܪ ܠܗܳܢܶܝܢ ܫܒܰܥ ܥ̈ܺܕܳܬܳܐ. ܠܶܐܦܶܣܳܘܣ. ܘܠܰܣܡܽܘܪܢܺܐ. ܘܰܠܦܶܪܓܰܡܳܘܣ. ܘܰܠܬܶܐܘܰܛܺܝܪܰܐ. ܘܰܠܣܰܪܕܺܝܣ. ܘܰܠܦܺܝܠܰܕܶܠܦܺܝܰܐ. ܘܰܠܠܰܕܺܝܩܺܝܰܐ܀
12- ܘܶܐܬܦܢܺܝܬ ܠܡܶܚܙܳܐ ܠܩܳܠܳܐ ܗܰܘ ܐܰܝܢܳܐ ܕܡܰܠܶܠ ܥܰܡܝ. ܘܟܰܕ ܐܶܬܦܢܺܝܬ܆ ܚܙܺܝܬ ܫܒܰܥ ܡܢܳܪ̈ܳܬܳܐ ܕܕܰܗܒܳܐ.
13- ܘܒܰܡܨܰܥܬܳܐ ܕܰܡܢܳܪ̈ܳܬܳܐ ܕܕܳܡܶܐ ܠܰܒܪܶܗ ܕܐ̱ܢܳܫܳܐ. ܕܰܠܒܺܝܫ ܐܰܦܽܘܕܳܐ. ܘܰܐܣܺܝܪ ܨܶܝܕ ܬܕܰܘ̈ܗ̱ܝ ܙܽܘܢܺܝܢ ܕܕܰܗܒܳܐ.
14- ܗܽܘ ܕܶܝܢ ܪܺܝܫܳܐ ܕܺܝܠܶܗ ܘܣܰܥܪܳܐ܆ ܚܶܘܳܪ̈ܺܝܢ ܐܰܝܟ ܥܰܡܪܳܐ܁ ܚܶܘܳܪܳܐ ܐܰܝܟ ܬܰܠܓܳܐ. ܘܥܰܝ̈ܢܶܐ ܕܺܝܠܶܗ ܐܰܝܟ ܫܰܠܗܶܒܺܝܬܳܐ ܕܢܽܘܪܳܐ.
15- ܘܪ̈ܶܓܠܶܐ ܕܺܝܠܶܗ ܕܕܳܡ̈ܝܳܢ ܠܰܢܚܳܫܳܐ ܠܶܒܢܳܝܳܐ ܕܰܡܫܰܠܗܰܒ ܐܰܝܟ ܕܒܰܐܬܽܘܢܳܐ. ܘܩܳܠܳܐ ܕܺܝܠܶܗ. ܐܰܝܟ ܩܳܠܳܐ ܕܡܰܝ̈ܳܐ ܣܰܓܺܝ̈ܶܐܐ.
16- ܘܺܐܝܬ ܠܶܗ ܒܺܐܝܕܳܐ ܕܺܝܠܶܗ ܕܝܰܡܺܝܢܳܐ܆ ܟܰܘ̈ܟܒܶܐ ܫܰܒܥܳܐ. ܘܡܶܢ ܦܽܘܡܳܐ ܕܺܝܠܶܗ ܣܰܝܦܳܐ ܚܰܪܺܝܦܳܐ ܕܰܬܪܶܝܢ ܦܽܘܡܰܘ̈ܗ̱ܝ ܢܳܦܶܩ. ܘܦܳܐܬܳܐ ܕܺܝܠܶܗ ܐܰܝܟ ܫܶܡܫܳܐ ܡܰܢܗܪܳܐ ܒܚܰܝܠܳܐ ܕܺܝܠܶܗ܀
17- ܘܟܰܕ ܚܙܺܝܬܶܗ. ܢܶܦܠܶܬ ܠܘܳܬ ܪ̈ܶܓܠܰܘܗ̱ܝ ܐܰܝܟ ܡܺܝܬܳܐ. ܘܣܳܡ ܥܠܰܝ ܐܺܝܕܶܗ ܕܝܰܡܺܝܢܳܐ ܟܰܕ ܐܳܡܰܪ܆ ܠܳܐ ܬܶܕܚܰܠ. ܐܶܢܳܐ ܐܺܝܬܰܝ ܗܰܘ ܩܰܕܡܳܝܳܐ ܘܗܰܘ ܐ̱ܚܪܳܝܳܐ.
18- ܘܗܰܘ ܕܚܰܝ ܘܕܰܗܘܺܝܬ ܡܺܝܬܳܐ. ܘܗܳܐ ܚܰܝܳܐ ܐܺܝܬܰܝ ܠܥܳܠܡ̈ܶܐ ܕܥܳܠܡ̈ܶܐ ܐܰܡܺܝܢ. ܘܺܐܝܬ ܠܺܝ ܩܠܺܝ̈ܕܶܐ ܕܡܰܘܬܳܐ ܘܕܰܫܝܽܘܠ.
19- ܟܬܽܘܒ ܗܳܟܺܝܠ ܗܰܘ ܡܳܐ ܕܰܚܙܰܝܬ. ܘܗܳܠܶܝܢ ܕܺܐܝܬܰܝܗܶܝܢ܇ ܘܗܳܢܶܝܢ ܕܰܥܬܺܝ̈ܕܳܢ ܠܡܶܗܘܳܐ܁ ܒܳܬܰܪ ܗܳܠܶܝܢ.
20- ܠܐܪܳܙܳܐ ܕܫܰܒܥܳܐ ܟܰܘ̈ܟܒܶܐ܇ ܗܳܢܽܘܢ ܕܰܚܙܰܝܬ ܒܝܰܡܺܝܢܳܐ ܕܺܝܠܝ܆ ܘܠܰܫܒܰܥ ܡܢܳܪ̈ܳܬܳܐ ܕܕܰܗܒܳܐ. ܗܳܢܽܘܢ ܫܰܒܥܳܐ ܟܰܘ̈ܟܒܶܐ܆ ܡ̈ܰܠܰܐܟܶܐ ܕܰܫܒܰܥ ܥ̈ܺܕܳܬܳܐ ܐܺܝܬܰܝܗܽܘܢ. ܘܗܳܢܶܝܢ ܡܢܳܪ̈ܳܬܳܐ ܫܒܰܥ܆ ܫܒܰܥ ܥ̈ܺܕܳܬܳܐ ܐܺܝܬܰܝܗܶܝܢ܀