Revelation 8
The Book of Revelation
܀ ܓܠܝܢܐ ܕܝܘܚܢܢ ܚ ܀
1- ܘܟܰܕ ܦܬܰܚ ܠܛܰܒܥܳܐ ܗܰܘ ܫܒܺܝܥܳܝܳܐ܆ ܗܘܳܐ ܫܶܬܩܳܐ ܒܰܫܡܰܝܳܐ. ܐܰܝܟ ܦܶܠܓܽܘܬ ܫܳܥܬܳܐ܀
2- ܘܰܚܙܺܝܬ ܠܗܳܠܶܝܢ ܫܰܒܥܳܐ ܡ̈ܰܠܰܐܟܶܐ܆ ܗܳܢܽܘܢ ܕܰܩܕܳܡ ܐܰܠܳܗܳܐ ܩܳܝܡܺܝܢ ܗ̱ܘܰܘ. ܘܶܐܬܺܝܗܶܒܘ ܠܗܽܘܢ ܫܰܒܥܳܐ ܫܺܝܦܽܘܪ̈ܶܐ.
3- ܘܰܐ̱ܚܪܺܢܳܐ ܡܰܠܰܐܟܳܐ ܢܦܰܩ ܐܶܬܳܐ ܘܩܳܡ ܥܰܠ ܡܰܕܒܚܳܐ. ܘܺܐܝܬ ܠܶܗ ܦܺܝܪܡܳܐ ܕܕܰܗܒܳܐ. ܘܶܐܬܺܝܗܶܒ ܠܶܗ ܒܶܣ̈ܡܶܐ ܣܰܓܺܝ̈ܶܐܐ܆ ܐܰܝܟܰܢܳܐ ܕܢܶܬܶܠ ܒܰܨܠܰܘ̈ܳܬܳܐ ܕܟܽܠܗܽܘܢ ܩܰܕܺܝ̈ܫܶܐ܇ ܥܰܠ ܡܰܕܒܚܳܐ ܕܕܰܗܒܳܐ ܗܰܘ ܕܰܩܕܳܡ ܬܪܽܘܢܽܘܣ.
4- ܘܰܣܠܶܩ ܥܶܛܪܳܐ ܕܒܶܣ̈ܡܶܐ ܕܰܨܠܰܘ̈ܳܬܳܐ ܕܩܰܕܺܝ̈ܫܶܐ܆ ܡܶܢ ܐܺܝܕܶܗ ܕܡܰܠܰܐܟܳܐ ܩܕܳܡ ܐܰܠܳܗܳܐ.
5- ܘܢܰܣܒܶܗ ܗܰܘ ܡܰܠܰܐܟܳܐ ܠܦܺܝܪܡܳܐ܆ ܘܰܡܠܳܝܗ̱ܝ ܡܶܢ ܢܽܘܪܳܐ ܕܡܰܕܒܚܳܐ܆ ܘܰܐܪܡܺܝ ܒܰܐܪܥܳܐ. ܘܰܗܘܰܘ ܪ̈ܰܥܡܶܐ ܘܩ̈ܳܠܶܐ ܘܒܰܪ̈ܩܶܐ ܘܙܰܘܥܳܐ܀
6- ܘܗܳܢܽܘܢ ܫܰܒܥܳܐ ܡ̈ܰܠܰܐܟܶܐ ܗܳܠܶܝܢ ܕܺܐܝܬ ܠܗܽܘܢ ܠܫܰܒܥܳܐ ܫܺܝܦܽܘܪ̈ܶܐ܇ ܛܰܝܶܒܘ ܗܶܢܽܘܢ ܠܗܽܘܢ ܐܰܝܟܰܢܳܐ ܕܰܢܝܰܒܒܽܘܢ܀
7- ܘܗܰܘ ܩܰܕܡܳܝܳܐ ܝܰܒܶܒ. ܘܰܗܘܳܐ ܒܰܪܕܳܐ ܘܢܽܘܪܳܐ ܕܰܚܠܺܝܛܺܝܢ ܒܰܕܡܳܐ ܘܶܐܬܪܡܺܝܘ ܒܰܐܪܥܳܐ܆ ܘܬܽܘܠܬܳܗ̇ ܕܰܐܪܥܳܐ ܝܺܩܶܕ. ܘܬܽܘܠܬܳܐ ܕܺܐܝܠܳܢ̈ܶܐ ܝܺܩܶܕ. ܘܟܽܠ ܥܡܺܝܪܳܐ ܝܽܘܪܳܩܳܐ ܝܺܩܶܕ܀
8- ܘܗܰܘ ܬܪܰܝܳܢܳܐ ܡܰܠܰܐܟܳܐ ܝܰܒܶܒ. ܐܰܝܟ ܛܽܘܪܳܐ ܪܰܒܳܐ ܟܰܕ ܒܢܽܘܪܳܐ ܝܺܩܶܕ ܘܶܐܬܪܡܺܝ ܒܝܰܡܳܐ. ܘܰܗܘܳܐ ܐܳܦ ܬܽܘܠܬܶܗ ܕܝܰܡܳܐ ܕܡܳܐ.
9- ܘܡܺܝܬ ܬܽܘܠܬܳܐ ܕܟܽܠܗܶܝܢ ܒܶܪ̈ܝܳܬܳܐ ܕܰܒܝܰܡܳܐ. ܗܳܠܶܝܢ ܕܺܐܝܬ ܠܗܶܝܢ ܢܰܦ̈ܫܳܬܳܐ. ܘܬܽܘܠܬܳܐ ܕܶܐܠܦ̈ܶܐ ܐܶܬܚ̈ܰܒܰܠܶܝܢ܀
10- ܘܗܰܘ ܬܠܺܝܬܳܝܳܐ ܡܰܠܰܐܟܳܐ ܝܰܒܶܒ܆ ܘܰܢܦܰܠ ܡܶܢ ܫܡܰܝ̈ܳܐ ܟܰܘܟܒܳܐ ܪܰܒܳܐ ܟܰܕ ܝܳܩܶܕ ܐܰܝܟ ܠܰܡܦܺܝܕܳܐ. ܘܰܢܦܰܠ ܥܰܠ ܬܽܘܠܬܳܐ ܕܢܰܗܪ̈ܰܘܳܬܳܐ. ܘܥܰܠ ܡܥܺܝ̈ܢܶܐ ܕܡܰܝ̈ܳܐ܆
11- ܘܰܫܡܶܗ ܕܟܰܘܟܒܳܐ ܡܶܬܶܐܡܰܪ ܗ̱ܘܳܐ ܐܰܦܣܺܝܢܬܽܘܣ. ܘܰܗܘܳܐ ܬܽܘܠܬܗܽܘܢ ܕܡܰܝ̈ܳܐ ܠܰܐܦܣܺܝܢܬܽܘܢ. ܘܣܰܓܺܝ̈ܶܐܐ ܒܢܰܝ̈ܢܳܫܳܐ ܡܺܝܬܘ ܡܶܢ ܡܰܝ̈ܳܐ ܡܶܛܽܠ ܕܡܰܪܘ܀
12- ܘܗܰܘ ܪܒܺܝܥܳܝܳܐ ܡܰܠܰܐܟܳܐ ܝܰܒܶܒ܆ ܘܰܒܠܰܥ ܬܽܘܠܬܳܐ ܕܫܶܡܫܳܐ ܘܬܽܘܠܬܳܐ ܕܣܰܗܪܳܐ ܘܬܽܘܠܬܳܐ ܕܟܰܘ̈ܟܒܶܐ. ܐܰܝܟܰܢܳܐ ܕܢܶܚܫܰܟ ܬܽܘܠܬܳܐ ܕܺܝܠܗܽܘܢ܆ ܘܰܚܫܶܟܘ. ܘܝܰܘܡܳܐ ܠܳܐ ܢܗܰܪ ܬܽܘܠܬܳܐ ܕܺܝܠܶܗ. ܘܠܺܠܝܳܐ ܒܳܗ̇ ܒܰܕܡܽܘܬܳܐ.
13- ܘܰܚܙܺܝܬ ܘܫܶܡܥܶܬ ܠܢܶܫܪܳܐ ܚܰܕ ܕܦܳܪܰܚ ܒܰܡܨܰܥܬܳܐ܆ ܕܕܽܘܢܒܳܐ ܕܰܕܡܳܐ ܐܺܝܬ ܠܶܗ܆ ܟܰܕ ܐܳܡܰܪ ܒܩܳܠܳܐ ܪܰܒܳܐ. ܘܳܝ ܘܳܝ ܘܳܝ ܠܗܳܢܽܘܢ ܕܥܳܡܪܺܝܢ ܥܰܠ ܐܰܪܥܳܐ܇ ܡܶܢ ܩܳܠܳܐ ܕܫܰܪܟܳܐ ܕܫܺܝܦܽܘܪ̈ܶܐ ܕܗܳܢܽܘܢ ܬܠܳܬܳܐ ܡ̈ܰܠܰܐܟܶܐ܇ ܗܳܠܶܝܢ ܕܰܥܬܺܝܕܺܝܢ ܠܰܡܝܰܒܳܒܽܘ܀