2 Chronicles 20
The second Book of Chronicles
܀ ܒ ܕܘܒܪ ܝܘܡ̈ܬܐ ܟ ܀
1 ܘܰܗܘܳܐ ܡܶܢ ܒܳܬܰܪ ܗܳܠܶܝܢ. ܐܶܬܰܘ ܒܢܰܝ̈ ܡܽܘܐܳܒ. ܘܰܒܢܰܝ̈ ܥܰܡܽܘܢ. ܘܥܰܡܗܽܘܢ ܓܰܒܖ̈ܶܐ ܩܖ̈ܰܒܬܳܢܶܐ. ܠܡܶܥܒܰܕ ܩܪܳܒܳܐ ܥܰܡ ܝܳܗܽܘܫܳܦܳܛ.
2 ܘܶܐܬܰܘ. ܘܚܰܘܺܝܘ ܠܝܳܗܽܘܫܳܦܳܛ. ܘܳܐܡܪܺܝܢ ܠܶܗ. ܐܶܬܳܐ ܥܠܰܝܟ ܚܰܝܠܳܐ ܣܰܓܺܝ. ܡܶܢ ܥܶܒܪܳܐ ܕܝܰܡܳܐ ܣܽܘܡܳܩܳܐ. ܗܳܐ ܗܶܢܽܘܢ ܫܪܶܝܢ ܒܺܐܝܪܺܝܚܽܘ. ܗܺܝ ܥܺܝܢ ܓܳܕ
3 ܘܰܕܚܶܠ ܘܰܐܪܺܝܡ ܝܳܗܽܘܫܳܦܳܛ ܐܰܦܰܘ̈ܗܝ ܠܰܡܨܰܠܳܝܽܘ ܩܕܳܡ ܡܳܪܝܳܐ. ܘܰܓܙܰܪ ܨܰܘܡܳܐ ܥܰܠ ܟܽܠܗܽܘܢ ܕܒܶܝܬ ܝܺܗܽܘܕܳܐ. ܘܶܐܡܰܪ ܠܗܽܘܢ. ܐܶܬܟܰܢܰܫܘ. ܘܬܰܘ ܢܶܒܥܶܐ ܡܶܢ ܡܳܪܝܳܐ ܐܰܠܳܗܰܢ.
4 ܘܶܐܬܟܰܢܰܫܘ. ܘܶܐܬܰܘ ܟܽܠܗܽܘܢ ܕܒܶܝܬ ܝܺܗܽܘܕܳܐ. ܘܳܐܦ ܡܶܢ ܩܽܘܖ̈ܝܳܐ ܖ̈ܰܚܺܝܩܳܬܳܐ ܘܶܐܬܰܘ ܠܡܶܒܥܳܐ ܡܶܢ ܡܳܪܝܳܐ.
5 ܘܩܳܡ ܝܳܗܽܘܫܳܦܳܛ ܒܓܰܘ ܥܰܡܳܐ ܕܺܝܗܽܘܕܳܐ. ܒܓܰܘ ܒܰܝܬܶܗ ܕܡܳܪܝܳܐ ܕܺܐܝܬ ܒܽܐܘܪܺܫܠܶܡ. ܩܕܳܡ ܬܰܪܥܳܐ ܚܰܕܬܳܐ.
6 ܘܨܰܠܺܝ. ܘܗܳܟܰܢܳܐ ܐܶܡܰܪ. ܡܳܪܝܳܐ ܐܰܠܳܗܳܐ ܕܰܐܒܳܗ̈ܳܬܰܢ. ܐܰܢ̱ܬ ܗ̱ܘ ܐܰܠܳܗܳܐ ܒܰܫܡܰܝܳܐ ܘܰܐܢ̱ܬ ܫܰܠܺܝܛ ܐܰܢ̱ܬ ܒܟܽܠܗܶܝܢ ܡܰܠܟ̈ܘܳܬܳܐ ܕܥܳܠܡܳܐ. ܘܕܺܝܠܳܟ ܗ̱ܘ ܚܰܝܠܳܐ ܘܓܰܢ̱ܒܳܪܽܘܬܳܐ. ܘܶܐܢܳܐ ܩܳܐܶܡ ܐ̱ܢܳܐ ܩܕܳܡܰܝܟ ܡܨܰܠܶܐ ܐ̱ܢܳܐ.
7 ܘܰܐܢ̱ܬܽ ܗ̱ܘ ܐܰܠܳܗܰܢ ܐܰܘܒܶܕܬ ܥܳܡܽܘܖ̈ܶܝܗ̇ ܕܰܐܪܥܳܐ ܗܳܕܶܐ. ܩܕܳܡ ܝܺܣܪܳܐܶܝܠ. ܘܝܰܗܒܬܳܗ̇ ܠܙܰܪܥܶܗ ܕܰܐܒܪܳܗܳܡ ܪܳܚܡܳܟ. ܠܥܳܠܰܡ.
8 ܘܺܝܬܶܒܘ ܒܳܗ̇. ܘܰܒܢܰܘ ܒܳܗ̇ ܡܰܩܕܫܳܐ ܠܰܫܡܳܟ. ܘܳܐܡܪܺܝܢ.
9 ܡܶܟܺܝܠ ܕܡܰܩܕܫܳܐ ܐܺܝܬ ܒܰܝܢܳܬܰܢ. ܠܳܐ ܐܳܬܝܳܐ ܥܠܰܝܢ ܒܺܝܫܬܳܐ. ܘܳܐܦܠܳܐ ܚܰܪܒܳܐ. ܘܳܐܦ ܠܳܐ ܕܺܝܢܳܐ. ܘܳܐܦܠܳܐ ܡܰܘܬܳܢܳܐ. ܘܳܐܦܠܳܐ ܟܰܦܢܳܐ. ܘܢܺܐܬܶܐ ܘܰܢܩܽܘܡ ܩܕܳܡ ܒܰܝܬܳܐ ܗܳܢܳܐ. ܘܰܩܕܳܡܰܝܟ. ܡܶܛܽܠ ܕܰܫܡܳܟ ܐܶܬܩܪܺܝ ܒܒܰܝܬܳܐ ܗܳܢܳܐ. ܘܢܺܐܬܶܐ ܘܰܢܨܰܠܶܐ ܩܕܳܡܰܝܟ ܒܒܰܝܬܳܐ ܗܳܢܳܐ. ܘܬܶܫܡܰܥ ܒܩܳܠܳܐ ܕܰܨܠܽܘܬܰܢ. ܘܬܶܦܪܩܰܢ.
10 ܘܳܐܦ ܗܳܫܳܐ ܗܳܐ ܒܢܰܝ̈ ܥܰܡܽܘܢ. ܘܛܽܘܪܳܐ ܕܰܓܒܶܠ. ܘܡܽܘܐܳܒ. ܕܠܳܐ ܝܰܗܒܬ ܐܶܢܽܘܢ ܠܺܝܣܪܳܐܶܝܠ ܠܡܶܬܚܰܠܳܛܽܘ ܥܰܡܗܽܘܢ. ܡܶܛܽܠ ܕܡܶܢ ܐܰܪܥܳܐ ܕܡܶܨܪܶܝܢ ܐܰܦܶܩܬ ܐܶܢܽܘܢ. ܘܰܐܦܪܶܩܬ ܫܽܘܥܒܳܕܳܐ ܕܡܶܨܖ̈ܳܝܶܐ ܡܶܢܗܽܘܢ.
11 ܘܗܳܐ ܗܶܢܽܘܢ ܦܳܪܥܺܝܢ ܠܰܢ ܚܽܘܒܠܰܢ ܘܳܐܬܶܝܢ ܕܢܰܦܩܽܘܢܳܢ ܡܶܢ ܝܳܪܬܽܘܬܳܟ ܕܰܐܘܪܶܬܬܳܢ.
12 ܡܳܪܝܳܐ ܐܰܠܳܗܰܢ ܐܶܬܓܠܰܝ ܘܕܽܘܢ ܐܶܢܽܘܢ. ܡܶܛܽܠ ܕܠܰܝܬ ܒܰܢ ܚܰܝܠܳܐ ܠܰܡܩܳܡ ܩܕܳܡܰܝܗܽܘܢ. ܐܰܝܬܳܐ ܥܠܰܝܗܽܘܢ ܚܰܪܒܳܐ ܕܕܺܝܢܳܟ. ܘܰܚܢܰܢ ܠܳܐ ܝܳܕܥܺܝܢܰܢ ܡܳܢܳܐ ܢܶܥܒܶܕ ܡܶܛܽܠ ܕܥܰܝܢܰܝ̈ܟ ܥܠܰܝܟ ܫܩܺܝ̈ܠܳܢ.
13 ܘܟܽܠܗܽܘܢ ܕܒܶܝܬ ܝܺܗܽܘܕܳܐ. ܩܳܝܡܺܝܢ ܗܘܰܘ ܩܕܳܡ ܡܳܪܝܳܐ. ܘܳܐܦ ܛܠܳܝܰܝ̈ܗܽܘܢ. ܘܢܶܫܰܝ̈ܗܽܘܢ. ܘܰܒܢܰܝ̈ܗܽܘܢ. ܘܰܒ̈ܢܳܬܗܽܘܢ.
14 ܘܰܚܙܳܐܝܠ ܒܰܪ ܙܟܰܪܝܳܐ. ܒܰܪ ܒܰܢܝܳܐ. ܒܰܪ ܝܽܘܝܳܕܳܥ. ܒܰܪ ܡܬܰܢܝܳܐ. ܠܶܘܳܝܳܐ. ܡܶܢ ܒܢܰܘ̈ܗܝ ܕܳܐܣܳܦ. ܫܪܳܬ ܥܠܰܘܗܝ ܪܽܘܚܳܐ ܕܓܰܢ̱ܒܳܪܽܘܬܳܐ. ܡܶܢ ܩܕܳܡ ܡܳܪܝܳܐ. ܘܗܽܘ ܩܳܐܶܡ ܗܘܳܐ ܩܕܳܡ ܥܰܡܳܐ ܕܺܝܣܪܳܐܶܝܠ.
15 ܘܶܐܡܰܪ. ܫܡܰܥ ܟܽܠܶܗ ܝܺܗܽܘܕܳܐ. ܘܥܳܡܽܘܖ̈ܶܝܗ̇ ܕܽܐܘܪܺܫܠܶܡ. ܘܡܰܠܟܳܐ ܝܳܗܽܘܫܳܦܳܛ ܗܳܟܰܢܳܐ ܐܳܡܰܪ ܡܳܪܝܳܐ ܐܰܠܳܗܟܽܘܢ. ܐܰܢ̱ܬܽܘܢ ܠܳܐ ܬܶܕܚܠܽܘܢ. ܘܠܳܐ ܬܙܽܘܥܽܘܢ. ܡܶܢ ܩܕܳܡ ܚܰܝܠܳܐ ܗܳܢܳܐ ܣܰܓܺܝܐܳܐ. ܡܶܛܽܠ ܕܠܳܐ ܗܘܳܐ ܕܺܝܠܟܽܘܢ ܩܪܳܒܳܐ. ܕܡܳܪܝܰܐ ܗ̱ܘ ܓܶܝܪ ܩܪܳܒܳܐ.
16 ܐܶܣܬܰܪܗܰܒܘ. ܘܚܽܘܬܘ ܥܠܰܝܗܽܘܢ ܗܳܐ ܗܶܢܽܘܢ ܣܳܠܩܺܝܢ ܒܡܰܣܩܳܢܳܐ ܕܨܰܦܪܳܐ. ܘܬܶܫܟܚܽܘܢ ܐܶܢܽܘܢ ܒܰܫܩܺܝܦܳܐ ܕܢܰܚܠܳܐ. ܩܕܳܡ ܡܰܕܒܪܳܐ. ܘܗܶܢܽܘܢ ܣܳܠܩܺܝܢ ܠܡܶܬܟܰܬܳܫܽܘ ܥܰܡܟܽܘܢ.
17 ܘܰܒܗܳܝ ܫܳܥܬܳܐ ܩܽܘܡܘ ܘܰܚܙܰܘ ܦܽܘܪܩܳܢܳܐ ܕܥܳܒܶܕ ܡܳܪܝܳܐ ܥܰܡܟܽܘܢ. ܕܒܶܝܬ ܝܺܗܽܘܕܳܐ. ܘܥܳܡܽܘܖ̈ܶܝܗ̇ ܕܽܐܘܪܺܫܠܶܡ ܠܳܐ ܬܶܕܚܠܽܘܢ. ܐܳܦܠܳܐ ܬܙܽܘܥܽܘܢ ܡܚܳܪ ܦܽܘܩܘ ܩܕܳܡܰܝܗܽܘܢ. ܘܰܐܕܽܘܢܰܝ ܡܳܪܶܐ ܡܳܖ̈ܰܘܳܬܳܐ ܢܶܗܘܶܐ ܒܥܶܕܪܟܽܘܢ.
18 ܘܰܢܦܰܠ ܝܳܗܽܘܫܳܦܳܛ ܥܰܠ ܐܰܦܰܘ̈ܗܝ ܥܰܠ ܐܰܪܥܳܐ ܘܰܣܓܶܕ. ܘܟܽܠܗܽܘܢ ܕܒܶܝܬ ܝܺܗܽܘܕܳܐ ܘܥܳܡܽܘܖ̈ܶܝܗ̇ ܕܽܐܘܪܺܫܠܶܡ. ܢܦܰܠܘ ܣܓܶܕܘ ܩܕܳܡ ܡܳܪܝܳܐ.
19 ܘܩܳܡܘ ܠܶܘ̈ܳܝܶܐ ܡܶܢ ܒܢܰܝ̈ ܩܳܗܳܬ. ܘܡܶܢ ܒܢܰܝ̈ ܩܽܘܪܰܚ. ܠܰܡܫܰܒܳܚܽܘ ܠܡܳܪܝܳܐ ܐܰܠܳܗܳܐ ܕܺܝܣܪܳܐܶܝܠ. ܒܩܳܠܳܐ ܪܳܡܳܐ.
20 ܘܩܰܕܶܡܘ ܒܨܰܦܪܳܐ. ܘܰܢܦܰܩܘ ܠܡܰܕܒܪܳܐ ܕܰܬܩܽܘܥ ܘܟܰܕ ܢܦܰܩܘ. ܩܳܡ ܝܳܗܽܘܫܳܦܳܛ. ܘܶܐܡܰܪ. ܫܽܘܡܥܽܘܢܝ ܕܒܶܝܬ ܝܺܗܽܘܕܳܐ. ܘܥܳܡܽܘܖ̈ܶܝܗ̇ ܕܽܐܘܪܺܫܠܶܡ ܘܗܰܝܡܶܢܘ ܒܡܳܪܝܳܐ ܐܰܠܳܗܟܽܘܢ. ܘܬܶܬܗܰܝܡܢܽܘܢ ܗܰܝܡܶܢܘ ܒܰܢܒܺܝܰܘ̈ܗܝ. ܘܬܶܬܦܰܪܩܽܘܢ.
21 ܘܩܳܡ ܒܡܶܨܥܰܬ ܥܰܡܳܐ. ܘܶܐܡܰܪ. ܬܰܘ ܢܰܘܕܶܐ ܠܡܳܪܝܳܐ. ܘܰܢܫܰܒܰܚ ܠܗܶܕܪܳܐ ܕܩܰܕܺܝܫܽܘܬܶܗ. ܟܰܕ ܢܳܦܶܩ ܩܕܳܡ ܚܰܝܠܰܘ̈ܳܬܰܢ. ܘܥܳܒܶܕ ܠܰܢ ܩܪܳܒܳܐ ܥܰܡ ܒܥܶܠܕܒܳܒܰܝ̈ܢ. ܘܳܐܡܪܺܝܢ. ܐܰܘܕܰܘ ܠܡܳܪܝܳܐ ܕܛܳܒ ܗ̱ܘ. ܘܰܠܥܳܠܰܡ ܛܰܝܒܽܘܬܶܗ. ܖ̈ܳܡܳܬܳܐ ܫܰܖ̈ܺܝ ܡܫܰܒ̈ܚܳܢ. ܘܛܽܘܖ̈ܶܐ ܫܰܪܺܝܘ ܕܳܝܨܺܝܢ.
22 (ܠܝܬ)
23 (ܠܝܬ)
24 ܘܺܝܗܽܘܕܳܐ ܐܶܬܳܐ ܠܶܗ ܠܛܽܘܪܳܐ ܕܕܰܘ̈ܩܶܐ ܕܡܰܕܒܪܳܐ ܘܰܚܙܰܘ ܘܗܳܐ ܟܽܠܗܽܘܢ ܦܰܓܖ̈ܰܝܗܽܘܢ ܡܺܝܬܺܝܢ. ܘܰܪܡܶܝܢ ܥܰܠ ܐܰܪܥܳܐ ܘܠܳܐ ܐܺܝܬ ܐ̱ܢܳܫ ܕܰܦܠܰܛ ܡܶܢܗܽܘܢ.
25 ܘܶܐܬܳܐ ܝܳܗܽܘܫܳܦܳܛ ܘܥܰܡܳܐ ܕܺܝܣܪܳܐܶܝܠ. ܠܡܶܒܰܙ ܒܶܙܬܗܽܘܢ ܘܶܐܫܟܰܚܘ ܒܗܽܘܢ ܒܶܙܬܳܐ ܣܽܘܓܳܐܐ ܕܛܳܒ. ܘܩܶܢܝܳܢܳܐ ܘܰܦܓܽܘ̈ܕܶܐ. ܘܖ̈ܰܟܫܳܐ. ܘܡܳܐܢ̈ܶܐ ܕܪܶܓܬܳܐ. ܘܰܫܩܰܠܘ ܠܗܽܘܢ ܡܶܕܶܡ ܕܰܨܒܰܘ.
26 ܘܰܗܘܳܐ ܒܳܬܰܪ ܬܠܳܬܳܐ ܝܰܘܡܺܝ̈ܢ. ܟܰܕ ܒܰܙܘ ܒܶܙܬܳܐ. ܡܶܛܽܠ ܕܣܰܓܺܝܐܐ ܗܘܳܬ ܛܳܒ. ܘܰܒܝܰܘܡܳܐ ܕܰܐܪܒܥܳܐ ܐܶܬܟܰܢܰܫܘ ܠܰܦܩܰܥܬܳܐ ܕܒܽܘܪܟܬܳܐ ܡܶܛܽܠ ܕܬܰܡܳܢ ܒܰܪܶܟܘ ܠܡܳܪܝܳܐ ܐܰܠܳܗܳܐ. ܘܡܶܛܽܠ ܗܳܢܳܐ ܐܶܬܩܪܺܝ ܫܡܳܗ̇ ܕܕܽܘܟܬܳܐ ܗܳܝ ܒܽܘܪܟܬܳܐ ܥܕܰܡܳܐ ܠܝܰܘܡܳܢܳܐ.
27 ܘܰܗܦܰܟܘ ܟܽܠܗܽܘܢ ܕܒܶܝܬ ܝܺܗܽܘܕܳܐ ܠܽܐܘܪܺܫܠܶܡ. ܘܝܳܗܽܘܫܳܦܳܛ ܒܖ̈ܺܝܫܰܝܗܽܘܢ ܡܶܛܽܠ ܕܳܐܬܶܝܢ ܗܘܰܘ ܓܶܝܪ ܠܽܐܘܪܺܫܠܶܡ ܒܚܰܕܽܘܬܳܐ. ܡܶܛܽܠ ܕܚܰܕܺܝ ܐܶܢܽܘܢ ܡܳܪܝܳܐ ܡܶܢ ܒܥܶܠܕܒܳܒܰܝ̈ܗܽܘܢ.
28 ܘܶܐܬܰܘ ܠܽܐܘܪܺܫܠܶܡ. ܒܬܶܫܒ̈ܚܳܬܳܐ. ܘܰܒܟܶܢܳܖ̈ܶܐ. ܘܰܒܩܰܖ̈ܢܳܬܳܐ ܟܦܺܝ̈ܦܳܬܳܐ ܘܰܦܫܺܝ̈ܛܳܬܳܐ. ܘܶܐܬܰܘ ܠܒܰܝܬܶܗ ܕܡܳܪܝܳܐ.
29 ܘܢܶܦܠܰܬ ܕܶܚܠܬܶܗ ܕܡܳܪܝܳܐ ܥܰܠ ܟܽܠܗܶܝܢ ܡܕܺܝ̈ܢܳܬܳܐ. ܘܥܰܠ ܡܰܠ̈ܟܘܳܬܗܶܝܢ. ܟܰܕ ܫܡܰܥ ܕܡܳܪܝܳܐ ܡܶܬܟܰܬܰܫ ܥܰܡ ܒܥܶܠܕܒܳܒܰܘ̈ܗܝ ܕܺܝܣܪܳܐܶܝܠ.
30 ܘܶܐܬܬܢܺܝܚܰܬ ܡܰܠܟܽܘܬܶܗ ܕܝܳܗܽܘܫܳܦܳܛ ܘܰܐܢܺܝܚܶܗ ܡܳܪܝܳܐ ܡܶܢ ܚܕܳܖ̈ܰܘܗܝ.
31 ܘܰܐܡܠܶܟ ܝܳܗܽܘܫܳܦܳܛ ܥܰܠ ܝܺܗܽܘܕܳܐ. ܒܰܪ ܬܠܳܬܺܝܢ ܗܘܳܐ ܘܚܰܡܶܫ ܫܢܺܝ̈ܢ ܝܳܗܽܘܫܳܦܳܛ. ܟܰܕ ܩܳܡ ܒܡܰܠܟܽܘܬܳܐ. ܘܥܶܣܪܺܝܢ ܘܚܰܡܶܫ ܫܢܺܝ̈ܢ. ܐܰܡܠܶܟ ܒܽܐܘܪܺܫܠܶܡ ܘܰܫܡܳܐ ܕܶܐܡܶܗ ܥܪܽܘܒܳܐ ܒܰܪܬ ܫܰܠܚܺܝ.
32 ܘܗܰܠܶܟ ܒܟܽܠܗܶܝܢ ܐܽܘܖ̈ܚܳܬܶܗ ܕܳܐܣܳܐ ܐܰܒܽܘܗܝ. ܘܠܳܐ ܗܦܰܟ ܡܶܢܗܶܝܢ ܠܡܶܥܒܰܕ ܕܫܰܦܺܝܪ ܩܕܳܡ ܡܳܪܝܳܐ.
33 ܒܰܠܚܽܘܕ ܥܠܰܘ̈ܳܬܳܐ ܠܳܐ ܐܰܥܒܰܪ. ܥܕܰܡܳܐ ܠܗܳܫܳܐ. ܘܥܰܡܳܐ ܠܳܐ ܐܰܬܩܶܢܘ ܠܶܒܗܽܘܢ ܠܰܐܠܳܗܳܐ ܕܰܐܒܳܗ̈ܳܬܗܽܘܢ.
34 ܘܫܰܪܟܳܐ ܕܦܶܬܓܳܡܰܘ̈ܗܝ ܕܝܳܗܽܘܫܳܦܳܛ ܩܰܕܡܳܝ̈ܶܐ ܘܰܐ̱ܚܖ̈ܳܝܶܐ ܗܳܐ ܗܶܢܽܘܢ ܟܬܺܝܒܺܝܢ ܒܦܶܬܓܳܡܰܘܗܝ ܕܝܳܗܽܘ ܒܰܪ ܚܰܢܢ. ܕܰܟܬܺܝܒ ܒܰܣܦܰܪ ܡܰܠܟܰܝ̈ ܝܺܣܪܳܐܶܝܠ.
35 ܘܒܳܬܰܪ ܗܳܠܶܝܢ ܐܶܬܩܰܪܰܒ ܝܳܗܽܘܫܳܦܳܛ ܡܰܠܟܳܐ ܕܺܝܗܽܘܕܳܐ. ܠܘܳܬ ܐܶܚܰܙܝܳܐ ܡܰܠܟܳܐ ܕܺܝܣܪܳܐܶܝܠ. ܗܰܘ ܪܰܫܺܝܥܳܐ. ܕܰܐܣܓܺܝ ܠܡܶܥܒܰܕ ܒܺܝܫܬܳܐ ܡܶܢ ܟܽܠܗܽܘܢ ܡܰܠ̈ܟܶܐ ܕܺܝܣܪܳܐܶܝܠ.
36 ܘܶܐܬܩܰܪܰܒ ܠܘܳܬܶܗ ܠܡܶܥܒܰܕ ܣܦܺܝܢ̈ܶܐ ܕܳܐܙܳܠ̱̈ܢ ܠܬܰܪܫܺܝܫ ܘܰܥܒܰܕܘ ܣܦܺܝܢ̈ܶܐ ܒܥܺܝܨܺܝܢܽܘ ܓܒܰܪ ܡܕܺܝܢܬܳܐ.
37 ܘܶܐܬܢܰܒܺܝ ܐܶܠܺܝܥܳܙܳܪ ܒܰܪܕܳܕܶܗ ܒܡܶܐܪܫܳܐ ܡܕܺܝܢܬܳܐ. ܥܰܠ ܝܳܗܽܘܫܳܦܳܛ. ܘܶܐܡܰܪ ܠܶܗ. ܒܫܰܘܬܳܦܽܘܬܳܟ ܕܥܰܡ ܐܶܚܰܙܝܳܐ. ܩܰܠܩܶܠ ܡܳܪܝܳܐ ܟܽܠܗܽܘܢ ܥܒܳܕܰܝ̈ܟ ܘܶܐܬܬܰܒܰܖ̈ܝ ܣܦܺܝܢ̈ܶܐ. ܘܠܳܐ ܐܶܫܟܰܚ̈ܝ ܠܡܺܐܙܰܠ ܠܬܰܪܫܺܝܫ.