2 Chronicles 4
The second Book of Chronicles
܀ ܒ ܕܘܒܪ ܝܘܡ̈ܬܐ ܕ ܀
1 ܘܰܥܒܰܕ ܡܰܕܒܚܳܐ ܕܰܢܚܳܫܳܐ. ܥܣܰܪ ܐܰܡܺܝ̈ܢ ܐܽܘܪܟܶܗ. ܘܰܥܣܰܪ ܐܰܡܺܝ̈ܢ ܦܬܳܝܶܗ. ܘܰܥܣܰܪ ܐܰܡܺܝ̈ܢ ܪܰܘܡܶܗ.
2 ܘܰܥܒܰܕ ܝܰܡܳܐ ܕܢܶܣܟܬܳܐ. ܥܣܰܪ ܐܰܡܺܝ̈ܢ ܡܶܢ ܣܶܦܬܶܗ ܠܣܶܦܬܶܗ. ܡܪܰܒܥ ܟܰܕ ܚܳܕܰܪ. ܘܚܰܡܶܫ ܐܰܡܺܝ̈ܢ ܪܰܘܡܶܗ. ܘܚܽܘܛܳܐ ܕܰܬܠܳܬܺܝܢ ܐܰܡܺܝ̈ܢ ܚܳܕܰܪ ܠܶܗ ܡܶܢ ܟܽܠܗܽܘܢ ܓܰܒܰܘ̈ܗܝ.
3 (ܠܝܬ)
4 ܘܗܽܘ ܩܳܐܶܡ ܥܰܠ ܬܪܶܥܣܰܪ ܬܰܘܖ̈ܺܝܢ. ܬܠܳܬܳܐ ܦܳܢܶܝܢ ܠܓܰܪܒܝܳܐ. ܘܰܬܠܳܬܳܐ ܦܳܢܶܝܢ ܠܡܰܥܪܒܳܐ. ܘܰܬܠܳܬܳܐ ܦܳܢܶܝܢ ܠܬܰܝܡܢܳܐ. ܘܰܬܠܳܬܳܐ ܦܳܢܶܝܢ ܠܡܰܕܢܚܳܐ ܘܝܰܡܳܐ ܠܥܶܠ ܡܶܢܗܽܘܢ ܡܶܢ ܠܥܶܠ. ܘܟܽܠܗܶܝܢ ܐ̱ܚܖ̈ܳܝܳܬܗܽܘܢ ܡܶܢ ܠܓܰܘ.
5 ܘܰܥܒܳܝܶܗ ܦܫܶܟ. ܘܣܶܦܬܶܗ ܕܝܰܡܳܐ. ܐܰܝܟ ܣܶܦܬܳܐ ܕܟܳܣܳܐ ܓܠܺܝܠܳܐ. ܘܗܽܘ ܫܰܦܺܝܪ ܛܳܒ. ܘܰܥܒܰܕ ܩܽܘ̈ܦܶܐ ܥܶܣܪܳܐ. ܘܝܰܗܒ ܚܰܡܫܳܐ ܡܶܢ ܝܰܡܺܝܢܳܐ. ܘܚܰܡܫܳܐ ܡܶܢ ܣܶܡܳܠܳܐ. ܠܡܶܫܩܰܠ ܒܗܽܘܢ ܡܰܕܒܚܳܐ ܕܰܥܠܳܬܳܐ.
6 ܘܰܥܒܰܕ ܠܰܩܢ̈ܶܐ ܥܣܰܪ. ܘܝܰܗܒ ܚܰܡܶܫ ܡܶܢ ܝܰܡܺܝܢܳܐ. ܘܚܰܡܶܫ ܡܶܢ ܣܶܡܳܠܳܐ. ܠܰܡܫܳܓܽܘ ܒܗܶܝܢ ܟܳܗ̈ܢܶܐ ܐܺܝܕܰܝ̈ܗܽܘܢ ܘܖ̈ܶܓܠܰܝܗܽܘܢ.
7 ܘܰܥܒܰܕ ܡܢܳܖ̈ܳܬܳܐ ܕܕܰܗܒܳܐ ܥܣܰܪ. ܐܰܝܟ ܢܳܡܽܘܣܰܝ̈ܗܽܘܢ. ܘܝܰܗܒ ܐܶܢܶܝܢ ܒܗܰܝܟܠܳܐ. ܚܰܡܶܫ ܡܶܢ ܝܰܡܺܝܢܳܐ. ܘܚܰܡܶܫ ܡܶܢ ܣܶܡܳܠܳܐ.
8 ܘܬܽܘܒ ܥܒܰܕ ܦܳܬܽܘܖ̈ܶܐ ܥܶܣܪܳܐ. ܘܣܳܡ ܐܶܢܽܘܢ ܒܗܰܝܟܠܳܐ. ܚܰܡܫܳܐ ܡܶܢ ܝܰܡܺܝܢܳܐ. ܘܚܰܡܫܳܐ ܡܶܢ ܣܶܡܳܠܳܐ. ܘܰܥܒܰܕ ܫܳܚ̈ܠܶܐ ܕܕܰܗܒܳܐ ܕܰܟܝܳܐ. ܡܳܐܐ ܘܥܶܣܪܺܝܢ.
9 ܘܰܥܒܰܕ ܕܳܪܬܳܐ ܚܕܳܐ ܪܰܒܬܳܐ ܠܟܳܗ̈ܢܶܐ ܘܰܠܠܶܘ̈ܳܝܶܐ. ܘܰܩܪܰܡ ܬܰܖ̈ܥܶܐ ܘܣܽܘܟܖ̈ܶܐ. ܢܚܳܫܳܐ.
10 ܘܝܰܡܳܐ ܣܳܡ ܡܶܢ ܓܰܒܳܐ ܕܓܰܒܳܐ ܓܰܪܒܝܳܝܳܐ. ܘܚܳܐܰܪ ܠܪܽܘܚ ܬܰܝܡܢܳܐ.
11 (ܠܝܬ)
12 ܘܰܥܒܰܕ ܫܠܶܝܡܽܘܢ ܟܽܠܗܽܘܢ ܡܳܐܢ̈ܶܐ ܗܳܠܶܝܢ ܕܣܰܓܺܝܐܺܝܢ ܛܳܒ. ܘܠܳܐ ܗܘܳܐ ܡܶܢܝܳܢܳܐ ܠܡܰܬܩܳܠܳܐ ܕܰܢܚܳܫܳܐ ܕܡܳܐܢ̈ܶܐ ܗܳܠܶܝܢ ܕܰܥܒܰܕ ܫܠܶܝܡܽܘܢ.