Numbers 1
The Book of Numbers
܀ ܡܢܝܢܐ ܐ ܀
1 ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ ܒܡܰܕܒܪܳܐ ܕܣܺܝܢܰܝ. ܒܡܰܫܟܰܢ ܙܰܒܢܳܐ. ܒܚܰܕ ܒܝܰܪܚܳܐ ܬܶܢܝܳܢܳܐ. ܒܰܫܢܰܬ ܬܰܪܬܶܝܢ. ܟܰܕ ܢܦܰܩܘ ܒܢܰܝ̈ ܝܺܣܪܳܐܶܝܠ ܡܶܢ ܐܰܪܥܳܐ ܕܡܶܨܪܶܝܢ. ܘܶܐܡܰܪ ܠܶܗ.
2 ܩܰܒܶܠ ܚܽܘܫܒܳܢܳܐ ܕܡܶܢܝܳܢܳܐ ܕܪܺܝܫܳܐ ܕܟܽܠܳܗ̇ ܟܢܽܘܫܬܳܐ ܕܒܢܰܝ̈ ܝܺܣܪܳܐܶܝܠ. ܠܫܰܖ̈ܒܳܬܗܽܘܢ. ܠܒܶܝܬ ܐܰܒܳܗܰܝ̈ܗܽܘܢ. ܒܡܶܢܝܳܢܳܐ ܕܰܫܡܳܗ̈ܶܐ. ܟܽܠ ܕܶܟܪܳܐ ܠܖ̈ܺܝܫܰܝܗܽܘܢ.
3 ܡܶܢ ܒܰܪ ܥܶܣܪܺܝܢ ܫܢܺܝ̈ܢ ܘܰܠܥܶܠ. ܟܽܠ ܕܢܳܦܶܩ ܒܚܰܝܠܳܐ ܒܺܝܣܪܳܐܶܝܠ. ܬܶܡܢܶܐ ܐܶܢܽܘܢ ܒܚܰܝܠܗܽܘܢ. ܐܰܢ̱ܬ ܘܰܐܗܪܽܘܢ ܐܰܚܽܘܟ.
4 ܘܥܰܡܟܽܘܢ ܢܶܗܘܽܘܢ ܓܰܒܪܳܐ ܓܰܒܪܳܐ ܡܶܢ ܫܰܒܛܳܐ. ܓܒܰܪ ܪܺܝܫܐ ܕܒܶܝܬ ܐܰܒܽܘܗܝ .
5 ܘܗܳܠܶܝܢ ܫܡܳܗ̈ܶܐ ܕܓܰܒܖ̈ܶܐ ܕܰܢܩܽܘܡܽܘܢ ܥܰܡܟܽܘܢ. ܕܪܽܘܒܺܝܠ. ܐܶܠܺܝܨܽܘܪ ܒܰܪ ܫܰܕܐܪ.
6 ܕܫܶܡܥܽܘܢ. ܫܰܠܡܽܘܐܶܝܠ ܒܰܪ ܨܽܘܪܺܝܫܰܐܕܰܝ.
7 ܕܺܝܺܗܽܘܕܳܐ. ܢܶܚܫܽܘܢ ܒܰܪ ܥܰܡܺܝܢܳܕܳܒ.
8 ܕܺܐܝܣܳܟܳܪ. ܢܰܬܢܺܝܐܶܝܠ ܒܰܪ ܨܽܘܥܳܪ.
9 ܕܰܙܒܽܘܠܽܘܢ. ܐܶܠܝܰܐܒ ܒܰܪ ܚܰܠܽܘܢ.
10 ܕܰܒܢܰܝ̈ ܝܰܘܣܶܦ. ܕܰܐܦܪܶܝܡ. ܐܶܠܺܝܫܡܰܥ ܒܰܪ ܥܰܡܺܝܗܽܘܕ. ܕܰܡܢܰܫܶܐ. ܓܰܡܰܠܺܝܐܶܝܠ ܒܰܪ ܦܰܪܨܽܘܪ.
11 ܕܒܶܢܝܳܡܶܝܢ. ܐܳܒܝܕܳܢ ܒܰܪ ܓܶܕܥܽܘܢܺܝ.
12 ܕܕܳܢ. ܐܰܚܺܝܥܳܙܳܪ ܒܰܪ ܥܰܡܺܝܫܰܕܰܝ.
13 ܕܳܐܫܺܝܪ. ܦܰܓܥܳܐܶܝܠ ܒܰܪ ܥܰܟܪܳܢ.
14 ܕܓܳܕ. ܐܶܠܝܳܐܣܳܦ ܒܰܪ ܪܰܥܽܘܐܶܝܠ.
15 ܕܢܰܦܬܳܠܺܝ. ܐܰܚܺܝܕܳܥ ܒܰܪ ܥܰܝܢܳܢ.
16 ܗܳܠܶܝܢ ܩܖ̈ܺܝܚܶܐ ܕܰܟܢܽܘܫܬܳܐ. ܪܰܘܖ̈ܒܳܢܶܐ ܕܫܰܒ̈ܛܶܐ ܕܒܶܝܬ ܐܰܒܳܗܰܝ̈ܗܽܘܢ. ܖ̈ܺܝܫܶܐ ܐܶܢܽܘܢ ܕܰܐܠܦ̈ܶܐ ܕܺܝܣܪܳܐܶܝܠ.
17 ܘܰܕܒܰܪܘ ܐܶܢܽܘܢ ܡܽܘܫܶܐ ܘܰܐܗܪܽܘܢ ܠܓܰܒܖ̈ܶܐ ܗܳܠܶܝܢ ܕܶܐܬܦܪܶܫܘ ܒܰܫܡܳܗ̈ܶܐ.
18 ܘܟܰܢܶܫܘ ܠܟܽܠܳܗ̇ ܟܢܽܘܫܬܳܐ ܒܚܰܕ ܒܝܰܪܚܳܐ ܬܶܢܝܳܢܳܐ. ܘܶܐܬܡܢܺܝܘ ܠܫܰܖ̈ܒܳܬܗܽܘܢ ܠܒܶܝܬ ܐܰܒܳܗܰܝ̈ܗܽܘܢ. ܒܡܶܢܝܳܢܳܐ ܕܰܫܡܳܗ̈ܶܐ ܡܶܢ ܒܰܪ ܥܶܣܪܺܝܢ ܫܢܺܝ̈ܢ ܘܰܠܥܶܠ ܠܖ̈ܺܝܫܰܝܗܽܘܢ.
19 ܐܰܝܟ ܕܦܰܩܶܕ ܡܳܪܝܳܐ ܠܡܽܘܫܶܐ. ܘܰܡܢܳܐ ܐܶܢܽܘܢ ܒܡܰܕܒܪܳܐ ܕܣܺܝܢܰܝ.
20 ܘܰܗܘܰܘ ܒܢܰܘ̈ܗܝ ܕܪܽܘܒܺܝܠ ܒܽܘܟܪܶܗ ܕܺܝܣܪܳܐܶܝܠ. ܒܬܰܘܠ̈ܕܳܬܗܽܘܢ ܠܫܰܖ̈ܒܳܬܗܽܘܢ. ܠܒܶܝܬ ܐܰܒܳܗܰܝ̈ܗܽܘܢ. ܒܡܶܢܝܳܢܳܐ ܕܰܫܡܳܗ̈ܶܐ. ܟܽܠ ܕܶܟܪܳܐ ܠܖ̈ܺܝܫܰܝܗܽܘܢ. ܡܶܢ ܒܰܪ ܥܶܣܪܺܝܢ ܫܢܺܝ̈ܢ ܘܰܠܥܶܠ. ܟܽܠ ܕܢܳܦܶܩ ܒܚܰܝܠܳܐ ܒܺܝܣܪܳܐܶܝܠ.
21 ܡܶܢܝܳܢܗܽܘܢ ܕܫܰܒܛܳܐ ܕܪܽܘܒܺܝܠ. ܐܰܪܒܥܺܝܢ ܘܶܫܬܳܐ ܐܰܠܦܺܝ̈ܢ ܘܚܰܡܶܫܡܳܐܐ.
22 ܘܰܒܢܰܝ̈ ܫܶܡܥܽܘܢ. ܒܬܰܘܠ̈ܕܳܬܗܽܘܢ. ܠܫܰܖ̈ܒܳܬܗܽܘܢ. ܠܒܶܝܬ ܐܰܒܳܗܰܝ̈ܗܽܘܢ. ܒܡܶܢܝܳܢܳܐ ܕܰܫܡܳܗ̈ܶܐ. ܟܽܠ ܕܶܟܪܳܐ ܠܖ̈ܺܝܫܰܝܗܽܘܢ. ܡܶܢ ܒܰܪ ܥܶܣܪܺܝܢ ܫܢܺܝ̈ܢ ܘܰܠܥܶܠ. ܟܽܠ ܕܢܳܦܶܩ ܒܚܰܝܠܳܐ ܒܺܝܣܪܳܐܶܝܠ.
23 ܡܶܢܝܳܢܗܽܘܢ ܕܫܰܒܛܳܐ ܕܫܶܡܥܽܘܢ. ܚܰܡܫܺܝܢ ܘܬܶܫܥܳܐ ܐܰܠܦܺܝ̈ܢ ܘܬܠܳܬܡܳܐܐ.
24 ܘܒܢܰܝ̈ ܓܳܕ. ܒܬܰܘܠ̈ܕܳܬܗܽܘܢ. ܠܫܰܖ̈ܒܳܬܗܽܘܢ. ܠܒܶܝܬ ܐܰܒܳܗܰܝ̈ܗܽܘܢ. ܒܡܶܢܝܳܢܳܐ ܕܰܫܡܳܗ̈ܶܐ. ܟܽܠ ܕܶܟܪܳܐ ܠܖ̈ܺܝܫܰܝܗܽܘܢ. ܡܶܢ ܒܰܪ ܥܶܣܪܺܝܢ ܫܢܺܝ̈ܢ ܘܰܠܥܶܠ. ܟܽܠ ܕܢܳܦܶܩ ܒܚܰܝܠܳܐ ܒܺܝܣܪܳܐܶܝܠ.
25 ܡܶܢܝܳܢܗܽܘܢ ܕܫܰܒܛܳܐ ܕܓܳܕ. ܐܰܪܒܥܺܝܢ ܘܚܰܡܫܳܐ ܐܰܠܦܺܝ̈ܢ. ܘܫܶܬܡܳܐܐ ܘܚܰܡܫܺܝܢ.
26 ܘܒܢܰܝ̈ ܝܺܗܽܘܕܳܐ. ܒܬܰܘܠ̈ܕܳܬܗܽܘܢ. ܠܫܰܖ̈ܒܳܬܗܽܘܢ. ܠܒܶܝܬ ܐܰܒܳܗܰܝ̈ܗܽܘܢ. ܒܡܶܢܝܳܢܳܐ ܕܰܫܡܳܗ̈ܶܐ. ܡܶܢ ܒܰܪ ܥܶܣܪܺܝܢ ܫܢܺܝ̈ܢ ܘܰܠܥܶܠ. ܟܽܠ ܕܢܳܦܶܩ ܒܚܰܝܠܳܐ ܒܺܝܣܪܳܐܶܝܠ.
27 ܡܶܢܝܳܢܗܽܘܢ ܕܫܰܒܛܳܐ ܕܝܺܗܽܘܕܳܐ. ܫܰܒܥܺܝܢ ܘܰܐܪܒܥܳܐ ܐܰܠܦܺܝ̈ܢ ܘܫܶܬܡܳܐܐ.
28 ܘܰܒܢܰܝ̈ ܐܺܝܣܳܟܳܪ. ܒܬܰܘܠ̈ܕܳܬܗܽܘܢ. ܠܫܰܖ̈ܒܳܬܗܽܘܢ. ܠܒܶܝܬ ܐܰܒܳܗܰܝ̈ܗܽܘܢ. ܒܡܶܢܝܳܢܳܐ ܕܰܫܡܳܗ̈ܶܐ. ܡܶܢ ܒܰܪ ܥܶܣܪܺܝܢ ܫܢܺܝ̈ܢ ܘܰܠܥܶܠ. ܟܽܠ ܕܢܳܦܶܩ ܒܚܰܝܠܳܐ ܒܺܝܣܪܳܐܶܝܠ.
29 ܡܶܢܝܳܢܗܽܘܢ ܕܫܰܒܛܳܐ ܕܺܐܝܣܳܟܳܪ. ܚܰܡܫܺܝܢ ܘܰܐܪܒܥܳܐ ܐܰܠܦܺܝ̈ܢ ܘܰܐܪܒܰܥܡܳܐܐ.
30 ܘܰܒܢܰܝ̈ ܙܒܳܘܠܽܘܢ. ܒܬܰܘܠ̈ܕܳܬܗܽܘܢ. ܠܫܰܖ̈ܒܳܬܗܽܘܢ. ܠܒܶܝܬ ܐܰܒܳܗܰܝ̈ܗܽܘܢ. ܒܡܶܢܝܳܢܳܐ ܕܰܫܡܳܗ̈ܶܐ. ܡܶܢ ܒܰܪ ܥܶܣܪܺܝܢ ܫܢܺܝ̈ܢ ܘܰܠܥܶܠ. ܟܽܠ ܕܢܳܦܶܩ ܒܚܰܝܠܳܐ ܒܺܝܣܪܳܐܶܝܠ.
31 ܡܶܢܝܳܢܗܽܘܢ ܕܫܰܒܛܳܐ ܕܰܙܒܳܘܠܽܘܢ. ܚܰܡܫܺܝܢ ܘܫܰܒܥܳܐ ܐܰܠܦܺܝ̈ܢ ܘܰܐܪܒܰܥܡܳܐܐ.
32 ܘܒܢܰܝ̈ ܝܰܘܣܶܦ. ܒܢܰܝ̈ ܐܰܦܪܶܝܡ. ܒܬܰܘܠ̈ܕܳܬܗܽܘܢ. ܠܫܰܖ̈ܒܳܬܗܽܘܢ. ܠܒܶܝܬ ܐܰܒܳܗܰܝ̈ܗܽܘܢ. ܒܡܶܢܝܳܢܳܐ ܕܰܫܡܳܗ̈ܶܐ. ܡܶܢ ܒܰܪ ܥܶܣܪܺܝܢ ܫܢܺܝ̈ܢ ܘܰܠܥܶܠ. ܟܽܠ ܕܢܳܦܶܩ ܒܚܰܝܠܳܐ ܒܺܝܣܪܳܐܶܝܠ.
33 ܡܶܢܝܳܢܗܽܘܢ ܕܫܰܒܛܳܐ ܕܰܐܦܪܶܝܡ. ܐܰܪܒܥܺܝܢ ܐܰܠܦܺܝ̈ܢ ܘܚܰܡܶܫܡܳܐܐ.
34 ܘܒܢܰܝ̈ ܡܢܰܫܶܐ. ܒܬܰܘܠ̈ܕܳܬܗܽܘܢ. ܠܫܰܖ̈ܒܳܬܗܽܘܢ. ܠܒܶܝܬ ܐܰܒܳܗܰܝ̈ܗܽܘܢ. ܒܡܶܢܝܳܢܳܐ ܕܰܫܡܳܗ̈ܶܐ. ܡܶܢ ܒܰܪ ܥܶܣܪܺܝܢ ܫܢܺܝ̈ܢ ܘܰܠܥܶܠ. ܟܽܠ ܕܢܳܦܶܩ ܒܚܰܝܠܳܐ ܒܺܝܣܪܳܐܶܝܠ.
35 ܡܶܢܝܳܢܗܽܘܢ ܕܫܰܒܛܳܐ ܕܰܡܢܰܫܶܐ. ܬܠܳܬܺܝܢ ܘܰܬܪܶܝܢ ܐܰܠܦܺܝ̈ܢ ܘܡܰܐܬܶܝܢ.
36 ܘܰܒܢܰܝ̈ ܒܶܢܝܡܳܝܶܢ. ܒܬܰܘܠ̈ܕܳܬܗܽܘܢ. ܠܫܰܖ̈ܒܳܬܗܽܘܢ. ܠܒܶܝܬ ܐܰܒܳܗܰܝ̈ܗܽܘܢ. ܒܡܶܢܝܳܢܳܐ ܕܰܫܡܳܗ̈ܶܐ. ܡܶܢ ܒܰܪ ܥܶܣܪܺܝܢ ܫܢܺܝ̈ܢ ܘܰܠܥܶܠ. ܟܽܠ ܕܢܳܦܶܩ ܒܚܰܝܠܳܐ ܒܺܝܣܪܳܐܶܝܠ.
37 ܡܶܢܝܳܢܗܽܘܢ ܕܫܰܒܛܳܐ ܕܒܶܢܝܳܡܶܝܢ. ܬܠܳܬܺܝܢ ܘܚܰܡܫܳܐ ܐܰܠܦܺܝ̈ܢ ܘܰܐܪܒܰܥܡܳܐܐ.
38 ܘܰܒܢܰܝ̈ ܕܳܢ. ܒܬܰܘܠ̈ܕܳܬܗܽܘܢ. ܠܫܰܖ̈ܒܳܬܗܽܘܢ. ܠܒܶܝܬ ܐܰܒܳܗܰܝ̈ܗܽܘܢ. ܒܡܶܢܝܳܢܳܐ ܕܰܫܡܳܗ̈ܶܐ. ܡܶܢ ܒܰܪ ܥܶܣܪܺܝܢ ܫܢܺܝ̈ܢ ܘܰܠܥܶܠ. ܟܽܠ ܕܢܳܦܶܩ ܒܚܰܝܠܳܐ ܒܺܝܣܪܳܐܶܝܠ.
39 ܡܶܢܝܳܢܗܽܘܢ ܕܫܰܒܛܳܐ ܕܕܳܢ. ܫܬܺܝܢ ܘܰܬܪܶܝܢ ܐܰܠܦܺܝ̈ܢ ܘܰܫܒܰܥܡܳܐܐ.
40 ܘܰܒܢܰܝ̈ ܐܳܫܺܝܪ. ܒܬܰܘܠ̈ܕܳܬܗܽܘܢ. ܠܫܰܖ̈ܒܳܬܗܽܘܢ. ܠܒܶܝܬ ܐܰܒܳܗܰܝ̈ܗܽܘܢ. ܒܡܶܢܝܳܢܳܐ ܕܰܫܡܳܗ̈ܶܐ. ܡܶܢ ܒܰܪ ܥܶܣܪܺܝܢ ܫܢܺܝ̈ܢ ܘܰܠܥܶܠ. ܟܽܠ ܕܢܳܦܶܩ ܒܚܰܝܠܳܐ ܒܺܝܣܪܳܐܶܝܠ.
41 ܡܶܢܝܳܢܗܽܘܢ ܕܫܰܒܛܳܐ ܕܳܐܫܺܝܪ. ܐܰܪܒܥܺܝܢ ܘܚܰܕ ܐܰܠܦܺܝ̈ܢ ܘܚܰܡܶܫܡܳܐܐ.
42 ܘܒܢܰܝ̈ ܢܰܦܬܳܠܺܝ. ܒܬܰܘܠ̈ܕܳܬܗܽܘܢ. ܠܫܰܖ̈ܒܳܬܗܽܘܢ. ܠܒܶܝܬ ܐܰܒܳܗܰܝ̈ܗܽܘܢ. ܒܡܶܢܝܳܢܳܐ ܕܰܫܡܳܗ̈ܶܐ. ܡܶܢ ܒܰܪ ܥܶܣܪܺܝܢ ܫܢܺܝ̈ܢ ܘܰܠܥܶܠ. ܟܽܠ ܕܢܳܦܶܩ ܒܚܰܝܠܳܐ ܒܺܝܣܪܳܐܶܝܠ.
43 ܡܶܢܝܳܢܗܽܘܢ ܕܫܰܒܛܳܐ ܕܢܰܦܬܳܠܺܝ. ܚܰܡܫܺܝܢ ܘܰܬܠܳܬܳܐ ܐܰܠܦܺܝ̈ܢ ܘܰܐܪܒܰܥܡܳܐܐ.
44 ܗܳܠܶܝܢ ܡܶܢܝܳܢ̈ܶܐ ܕܰܡܢܳܐ ܡܽܘܫܶܐ ܘܰܐܗܪܽܘܢ. ܘܪܰܘܖ̈ܒܳܢܶܐ ܕܺܝܣܪܳܐܶܝܠ ܬܪܶܥܣܰܪ ܓܰܒܖ̈ܺܝܢ. ܚܰܕ ܚܰܕ ܓܰܒܪܳܐ ܡܶܢ ܒܶܝܬ ܐܰܒܽܘܗܝ.
45 ܘܰܗܘܰܘ ܟܽܠܗܽܘܢ ܡܶܢܝܳܢ̈ܶܐ ܕܒܢܰܝ̈ ܝܺܣܪܳܐܶܝܠ. ܠܒܶܝܬ ܐܰܒܳܗܰܝ̈ܗܽܘܢ. ܡܶܢ ܒܰܪ ܥܶܣܪܺܝܢ ܫܢܺܝ̈ܢ ܘܰܠܥܶܠ. ܟܽܠ ܕܢܳܦܶܩ ܒܚܰܝܠܳܐ ܒܺܝܣܪܳܐܶܝܠ.
46 ܘܰܗܘܰܘ ܟܽܠܗܽܘܢ ܡܶܢܝܳܢ̈ܶܐ ܕܒܢܰܝ̈ ܝܺܣܪܳܐܶܝܠ. ܫܶܬܡܳܐܐ ܘܰܬܠܳܬܳܐ ܐܰܠܦܺܝ̈ܢ ܘܚܰܡܶܫܡܳܐܐ ܘܚܰܡܫܺܝܢ.
47 ܘܠܶܘܳܝ̈ܶܐ ܘܫܰܒ̈ܛܶܐ ܕܰܐܒܳܗܰܝ̈ܗܽܘܢ. ܠܳܐ ܐܶܬܡܢܺܝܘ ܒܰܝܢܳܬܗܽܘܢ.
48 ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ. ܘܶܐܡܰܪ ܠܶܗ.
49 ܠܫܰܒܛܳܐ ܕܠܶܘܺܝ ܠܳܐ ܬܶܡܢܶܐ. ܘܚܽܘܫܒܳܢܗܽܘܢ ܠܳܐ ܬܩܰܒܶܠ ܒܓܰܘ ܒܢܰܝ̈ ܝܺܣܪܳܐܶܝܠ.
50 ܐܶܠܳܐ ܐܰܫܠܶܛ ܠܠܶܘܳܝ̈ܶܐ. ܥܰܠ ܡܰܫܟܢܳܐ ܕܣܳܗܕܽܘܬܳܐ. ܘܥܰܠ ܟܽܠܗܽܘܢ ܡܳܐܢܰܘ̈ܗܝ. ܘܥܰܠ ܟܽܠ ܡܶܕܶܡ ܕܺܐܝܬ ܒܶܗ. ܗܶܢܽܘܢ ܢܶܫܩܠܽܘܢܶܗ ܠܡܰܫܟܢܳܐ. ܘܰܠܟܽܠܗܽܘܢ ܡܳܐܢܰܘ̈ܗܝ. ܘܗܶܢܽܘܢ ܢܫܰܡܫܽܘܢܶܗ. ܘܰܚܕܳܪ ܡܰܫܟܢܳܐ ܢܶܗܘܽܘܢ ܫܪܶܝܢ.
51 ܘܡܳܐ ܕܫܳܩܶܠ ܡܰܫܟܢܳܐ. ܢܰܪܟܢܽܘܢܶܗ ܠܶܘܳܝ̈ܶܐ. ܘܡܳܐ ܕܫܳܪܶܐ ܡܰܫܟܢܳܐ. ܢܩܺܝܡܽܘܢܶܗ ܠܶܘܳܝ̈ܶܐ. ܘܢܽܘܟܪܳܝܳܐ ܕܩܳܪܶܒ ܠܶܗ. ܢܶܬܩܛܶܠ.
52 ܘܢܶܫܪܽܘܢ ܒܢܰܝ̈ ܝܺܣܪܳܐܶܝܠ ܓܒܰܪ ܒܡܰܫܪܺܝܬܶܗ. ܘܰܓܒܰܪ ܒܛܽܘܠܩܶܗ ܒܚܰܝܠܰܘ̈ܳܬܗܽܘܢ.
53 ܘܠܶܘܳܝ̈ܶܐ ܢܶܗܘܽܘܢ ܫܪܶܝܢ ܚܕܳܪ ܡܰܫܟܢܳܐ ܕܣܳܗܕܽܘܬܳܐ. ܘܠܳܐ ܢܶܗܘܶܐ ܪܽܘܓܙܳܐ ܥܰܠ ܟܢܽܘܫܬܳܐ ܕܰܒܢܰܝ̈ ܝܺܣܪܳܐܶܝܠ. ܘܢܶܛܪܽܘܢ ܠܶܘܳܝ̈ܶܐ ܡܰܛܰܪܬܳܐ ܕܡܰܫܟܢܳܐ ܕܣܳܗܕܽܘܬܳܐ.
54 ܘܰܥܒܰܕܘ ܒܢܰܝ̈ ܝܺܣܪܳܐܶܝܠ. ܐܰܝܟ ܕܦܰܩܶܕ ܡܳܪܝܳܐ ܠܡܽܘܫܶܐ. ܗܳܟܰܢܳܐ ܥܒܰܕܘ.