Numbers 36
The Book of Numbers
܀ ܡܢܝܢܐ ܠܘ ܀
1 ܘܰܩܪܶܒܘ ܖ̈ܺܝܫܰܝ ܐܰܒܳܗ̈ܶܐ ܕܫܰܪܒܬܳܐ ܕܰܒܢܰܝ̈ ܓܶܠܥܳܕ. ܒܰܪ ܡܳܟܺܝܪ. ܒܰܪ ܡܢܰܫܶܐ. ܡܶܢ ܫܰܪܒܬܳܐ ܕܰܡܢܰܫܶܐ ܒܰܪ ܝܰܘܣܶܦ. ܘܡܰܠܶܠܘ ܩܕܳܡ ܡܽܘܫܶܐ. ܘܰܩܕܳܡ ܐܶܠܺܝܥܳܙܳܪ ܟܳܗܢܳܐ. ܘܰܩܕܳܡ ܪܰܘܖ̈ܒܳܢܶܐ ܕܰܟܢܽܘܫܬܳܐ. ܪܺܝܫܐ ܕܰܐܒܳܗ̈ܶܐ ܕܰܒܢܰܝ̈ ܝܺܣܪܳܐܶܝܠ.
2 ܘܶܐܡܰܪܘ. ܠܡܳܪܰܢ ܦܰܩܶܕ ܡܳܪܝܳܐ ܠܡܶܬܰܠ ܐܰܪܥܳܐ ܠܝܽܘܪܬܳܢܳܐ ܒܦܶܨ̈ܶܐ ܠܰܒܢܰܝ̈ ܝܺܣܪܳܐܶܝܠ. ܘܡܳܪܰܢ ܐܶܬܦܰܩܰܕ ܡܶܢ ܡܳܪܝܳܐ. ܕܢܶܬܶܠ ܝܳܪܬܽܘܬܶܗ ܕܰܨܠܶܦܚܰܕ ܐܰܚܽܘܢ ܠܰܒ̈ܢܳܬܶܗ.
3 ܘܶܐܢ ܢܶܗܘ̈ܝܳܢ ܠܚܰܕ ܡܶܢ ܫܰܒ̈ܛܶܐ ܕܰܒܢܰܝ̈ ܝܺܣܪܳܐܶܝܠ ܢܶܫ̈ܶܐ. ܬܶܬܒܰܨܰܪ ܝܳܪܬܽܘܬܗܶܝܢ ܡܶܢ ܝܳܪܬܽܘܬܳܐ ܕܰܐܒܽܘܗܶܝܢ. ܘܬܶܬܘܣܰܦ ܥܰܠ ܝܳܪܬܽܘܬܳܐ ܕܫܰܒ̈ܛܶܐ ܕܢܶܗܘ̈ܝܳܢ ܠܗܽܘܢ. ܡܶܢ ܦܶܨܬܳܐ ܕܝܳܪܬܽܘܬܰܢ ܬܶܬܒܰܨܰܪ.
4 ܘܶܐܢ ܢܶܗܘܶܐ ܦܽܘܢܳܝܳܐ ܠܰܒܢܰܝ̈ ܝܺܣܪܳܐܶܝܠ. ܬܶܬܰܘܣܰܦ ܝܳܪܬܽܘܬܗܶܝܢ ܥܰܠ ܝܳܪܬܽܘܬܳܐ ܕܫܰܒ̈ܛܶܐ ܕܢܶܗܘ̈ܝܳܢ ܠܗܽܘܢ. ܡܶܢ ܝܳܪܬܽܘܬܳܐ ܕܫܰܒܛܳܐ ܕܰܐܒܽܘܗܶܝܢ ܬܶܬܒܰܨܰܪ ܝܳܪܬܽܘܬܗܶܝܢ.
5 ܘܦܰܩܶܕ ܡܽܘܫܶܐ ܠܰܒܢܰܝ̈ ܝܺܣܪܳܐܶܝܠ ܥܰܠ ܡܶܠܰܬ ܦܽܘܡܶܗ ܕܡܳܪܝܳܐ. ܘܶܐܡܰܪ. ܟܺܐܢܳܐܺܝܬ ܡܡܰܠܶܠ ܫܰܒܛܳܐ ܕܰܒܢܰܝ̈ ܝܰܘܣܶܦ.
6 ܗܳܢܳܐ ܦܶܬܓܳܡܳܐ ܕܦܰܩܶܕ ܡܳܪܝܳܐ ܥܰܠ ܒ̈ܢܳܬܶܗ ܕܰܨܠܶܦܚܰܕ. ܘܶܐܡܰܪ. ܕܰܠܡܰܢ ܕܫܳܦܰܪ ܒܥܰܝܢܰܝ̈ܗܶܝܢ ܢܶܗܘ̈ܝܳܢ ܢܶܫ̈ܶܐ. ܒܪܰܡ ܠܫܰܒܛܳܐ ܕܫܰܪܒܬܳܐ ܕܰܐܒܽܘܗܶܝܢ ܢܶܗܘ̈ܝܳܢ.
7 ܘܠܐ ܬܶܬܟܪܶܟ ܝܳܪܬܽܘܬܳܐ ܕܰܒܢܰܝ̈ ܝܺܣܪܳܐܶܝܠ ܡܶܢ ܫܰܒܛܳܐ ܠܫܰܒܛܳܐ ܐ̱ܚܪܺܢܳܐ. ܐܶܠܳܐ ܓܒܰܪ ܒܝܳܪܬܽܘܬܳܐ ܕܫܰܒܛܳܐ ܕܰܐܒܽܘܗܝ ܢܶܬܢܰܩܦܽܘܢ ܒܢܰܝ̈ ܝܺܣܪܳܐܶܝܠ.
8 ܘܟܽܠ ܒܰܪܬܳܐ ܕܝܳܪܬܳܐ ܝܽܘܪܬܳܢܳܐ ܡܶܢ ܫܰܒ̈ܛܶܐ ܕܰܒܢܰܝ̈ ܝܺܣܪܳܐܶܝܠ. ܠܚܰܕ ܡܶܢ ܫܰܒܛܳܐ ܕܫܰܪܒܬܳܐ ܕܰܐܒܽܘܗ̇ ܬܶܗܘܶܐ ܐܰܢ̱ܬܬܳܐ. ܘܢܺܐܪܬܽܘܢ ܒܢܰܝ̈ ܝܺܣܪܳܐܶܝܠ ܐ̱ܢܳܫ ܝܳܪܬܽܘܬܳܐ ܕܰܐܒܽܘܗܝ.
9 ܘܠܳܐ ܬܶܬܟܪܶܟ ܝܳܪܬܽܘܬܳܐ ܡܶܢ ܫܰܒܛܳܐ ܠܫܰܒܛܳܐ ܐ̱ܚܪܺܢܳܐ. ܐܶܠܳܐ ܓܒܰܪ ܒܝܳܪܬܽܘܬܶܗ ܢܶܬܢܰܩܦܽܘܢ ܫܰܒ̈ܛܶܐ ܕܰܒܢܰܝ̈ ܝܺܣܪܳܐܶܝܠ.
10 ܘܰܐܝܟܰܢܳܐ ܕܦܰܩܶܕ ܡܳܪܝܳܐ ܠܡܽܘܫܶܐ. ܗܳܟܰܢܳܐ ܥܒܰܕܝ̈ ܒ̈ܢܳܬܶܗ ܕܰܨܠܶܦܚܰܕ.
11 ܘܰܗܘܰܝ̈ ܡܰܚܠܳܐ. ܘܬܰܪܨܳܐ. ܘܚܰܓܠܳܐ. ܘܡܶܠܟܳܐ. ܘܝܰܥܳܐ. ܒ̈ܢܳܬܶܗ ܕܰܨܠܶܦܚܰܕ. ܠܰܒܢܰܝ̈ ܕܳܕܰܝ̈ܗܶܝܢ.
12 ܠܫܰܖ̈ܒܳܬܳܐ ܕܰܒܢܰܝ̈ ܡܢܰܫܶܐ ܒܰܪ ܝܰܘܣܶܦ ܗܘܰܝ̈. ܘܰܗܘܳܬ ܝܳܪܬܽܘܬܗܶܝܢ ܥܰܠ ܫܰܒܛܳܐ ܕܫܰܪܒܬܳܐ ܕܰܐܒܽܘܗܶܝܢ.
13 ܗܳܠܶܝܢ ܦܽܘܩ̈ܕܳܢܶܐ ܘܢܳܡܽܘܣ̈ܶܐ ܘܕܺܝܢ̈ܶܐ ܕܦܰܩܶܕ ܡܳܪܝܳܐ ܒܺܐܝܕܳܐ ܕܡܽܘܫܶܐ ܥܰܠ ܒܢܰܝ̈ ܝܺܣܪܳܐܶܝܠ. ܒܥܰܪܒܽܘܬ ܡܽܘܐܳܒ ܕܥܰܠ ܝܽܘܪܕܢܳܢ ܕܺܐܝܪܺܝܚܽܘ.