Psalms 105
The Book of Psalms
܀ ܡܙܡܘܪܐ ܩܗ ܀
ܡܰܪܬܶܐ ܠܥܰܡܳܐ ܠܰܡܝܰܬܪܽܘܬܳܐ ܘܡܰܠܶܦ ܠܗܽܘܢ ܕܢܰܘܕܽܘܢ ܠܰܐܠܳܗܳܐ ܘܰܡܥܰܗܶܕ ܠܗܽܘܢ ܛܰܝ̈ܒܘܳܬܶܗ ܩܰܕ̈ܡܳܝܳܬܳܐ ܕܶܐܣܬܥܰܪ ܡܶܢܶܗ ܠܘܳܬ ܐܰܒܳܗܰܝ̈ܗܽܘܢ
1 ܐܰܘܕܰܘ ܠܡܳܪܝܳܐ ܘܰܩܪܰܘ ܫܡܶܗ. ܘܚܰܘܰܘ ܒܥܰܡ̱̈ܡܶܐ ܥܒܳܕܰܘ̈ܗܝ̱.
2 ܫܰܒܚܽܘܗ̱ܝ ܘܰܙܡܰܪ ܠܶܗ. ܘܶܐܫܬܰܥܘ ܟܽܠܗܶܝܢ ܬܶܕܡܖ̈ܳܬܶܗ.
3 ܫܰܒܰܚܘ̱ ܠܰܫܡܳܐ ܕܩܽܘܕܫܶܗ. ܢܶܚܕܶܐ ܠܶܒܗܽܘܢ ܕܰܐܝܠܶܝܢ ܕܒܳܥܶܝܢ ܠܡܳܪܝܳܐ.
4 ܒܥܰܘ ܠܡܳܪܝܳܐ ܘܶܐܬܚܰܝܠܘ. ܘܰܒܥܰܘ ܐܰܦܰܘ̈ܗܝ̱ ܒܟܽܠܙܒܰܢ.
5 ܐܶܬܕܟܰܪܘ ܬܶܕܡܖ̈ܳܬܶܗ ܕܰܥܒܰܕ. ܬܶܕܡܖ̈ܳܬܶܗ ܘܕܺܝܢܳܐ ܕܦܽܘܡܶܗ.
6 ܙܰܪܥܶܗ ܕܰܐܒܪܳܗܳܡ ܥܰܒܕܶܗ ܘܰܒܢܰܝ̈ ܝܰܥܩܽܘܒ ܓܒܰܘ̈ܗܝ̱.
7 ܗܽܘܝܽܘ ܡܳܪܝܳܐ ܐܰܠܳܗܰܢ ܕܰܒܟܽܠܳܗ̇ ܐܰܪܥܳܐ ܕܺܝܢܰܘ̈ܗܝ̱.
8 ܐܶܬܕܟܰܪ ܠܥܳܠܰܡ ܩܝܳܡܶܗ. ܡܶܠܬܳܐ ܕܦܰܩܶܕ ܠܳܐܠܶܦ ܕܳܖ̈ܺܝܢ.
9 ܕܰܐܩܺܝܡ ܩܝܳܡܶܗ ܥܰܡ ܐܰܒܪܳܗܳܡ ܘܡܰܘܡܳܬܶܗ ܥܰܡ ܐܺܝܣܚܳܩ.
10 ܘܣܳܗܕܽܘܬܶܗ ܥܰܡ ܝܰܥܩܽܘܒ. ܩܝܳܡܳܐ ܠܺܝܣܪܳܐܶܝܠ ܠܥܳܠܰܡ.
11 ܘܶܐܡܰܪ ܕܠܳܟ ܐܶܬܠܺܝܗ̇ ܐܰܪܥܳܐ ܕܰܟܢܰܥܢ ܚܰܒ̈ܠܶܐ ܕܝܳܪܬܽܘܬܗܽܘܢ.
12 ܟܰܕ ܙܥܽܘܪܺܝܢ ܗ̱ܘܰܝܬܽܘܢ ܒܡܶܢܝܳܢܳܐ. ܩܰܠܺܝܠ ܗܘܰܝܬܽܘܢ ܘܥܳܡܽܘܖ̈ܶܐ ܗ̱ܘܰܝܬܽܘܢ ܒܳܗ̇.
13 ܗܰܠܶܟܘ ܡܶܢ ܥܰܡܳܐ ܠܥܰܡܳܐ ܘܡܶܢ ܡܰܠܟܽܘܬܳܐ ܠܥܰܡܳܐ ܐ̱ܚܪܺܢܳܐ.
14 ܘܠܳܐ ܫܒܰܩ ܠܒܰܪܢܳܫܳܐ ܕܢܶܛܠܽܘܡ ܐܶܢܽܘܢ. ܐܰܟܶܣ ܡܰܠܟ̈ܶܐ ܥܰܠ ܐܰܦܰܝ̈ܗܽܘܢ.
15 ܕܠܳܐ ܬܶܩܪܒܽܘܢ ܠܰܡܫܺܝ̈ܚܰܝ ܘܠܰܢ̈ܒܺܝܰܝ ܠܳܐ ܬܰܒܐܶܫܽܘܢ.
16 ܘܰܩܪܳܐ ܟܰܦܢܳܐ ܠܐܪܥܳܐ ܘܟܽܠܶܗ ܩܰܢܝܳܐ ܕܰܥܒܽܘܪܗܽܘܢ ܬܰܒܰܪ.
17 ܫܰܕܰܪ ܩܕܳܡܰܝܗܽܘܢ ܓܰܒܪܳܐ. ܠܥܰܒܕܽܘܬܳܐ ܐܶܙܕܰܒܰܢ ܝܰܘܣܶܦ.
18 ܘܶܐܣܰܪܘ ܒܣܽܘ̈ܛܡܶܐ ܖ̈ܶܓܠܰܘܗ̱ܝ ܘܰܒܦܰܪܙܠܳܐ ܥܶܠܰܬ ܢܰܦܫܶܗ.
19 ܥܕܰܡܳܐ ܕܫܶܪܰܬ ܡܶܠܬܶܗ. ܡܺܐܡܪܶܗ ܕܡܳܪܝܳܐ ܒܩܳܝܗܝ̱.
20 ܫܰܕܰܪ ܡܰܠܟܳܐ ܘܰܫܪܳܝܗܝ̱. ܘܥܰܒܕܶܗ ܫܰܠܺܝܛܳܐ ܥܰܠ ܥܰܡܶܗ.
21 ܡܳܪܳܐ ܥܰܠ ܒܰܝܬܶܗ ܘܫܰܠܺܝܛܳܐ ܥܰܠ ܟܽܠܶܗ ܩܶܢܝܳܢܶܗ.
22 ܕܢܶܪܕܶܐ ܠܫܰܠܺܝ̈ܛܶܐ ܐܰܝܟ ܕܨܳܒܶܐ ܘܰܠܩܰܫܺܝ̈ܫܶܐ ܢܚܰܟܶܡ.
23 ܥ̣ܰܠ ܝܺܣܪܳܐܶܝܠ ܠܡܶܨܪܶܝܢ ܘܝܰܥܩܽܘܒ ܥܡܰܪ ܒܡܰܫܟܢܳܐ ܕܚܳܡ.
24 ܐܰܣܓܺܝ ܛܳܒ ܥܰܡܶܗ. ܘܰܐܥܫܢܶܗ ܝܰܬܺܝܪ ܡܶܢ ܒܥܶܠܕ̈ܒܳܒܰܘܗ̱ܝ.
25 ܘܰܗܦܰܟ ܠܶܒܗܽܘܢ ܠܡܶܣܢܝܶܗ ܠܥܰܡܶܗ ܘܰܠܡܶܬܢܟܳܠܽܘ ܥܰܠ ܥܰܒܕܰܘ̈ܗܝ.
26 ܫܰܕܰܪ ܠܡܽܘܫܶܐ ܥܰܒܕܶܗ ܘܠܰܐܗܪܽܘܢ ܕܰܓܒܳܐ.
27 ܥܒܰܕ ܒܗܽܘܢ ܐܳܬܘ̈ܳܬܶܗ ܘܬܶܕܡܖ̈ܳܬܶܗ ܒܰܐܪܥܳܐ ܕܚܳܡ.
28 ܫܰܕܰܪ ܚܶܫܽܘܟܳܐ ܘܰܐܚܫܶܟ ܘܡܰܪܡܰܪܘ ܡܶܠܬܶܗ.
29 ܗܦܰܟ ܡܰܝܰܝ̈ܗܽܘܢ ܠܰܕܡܳܐ ܘܰܐܡܺܝܬ ܢܽܘܢܰܝ̈ܗܽܘܢ.
30 ܐܰܪܚܶܫ ܒܰܐܪܥܗܽܘܢ ܐܽܘܖ̈ܕܥܶܐ ܘܰܒܬܰܘܳܢ̈ܶܐ ܕܡܰܠܟܰܝ̈ܗܽܘܢ.
31 ܐܶܡܰܪ ܘܰܐܝܬܺܝ ܚܰܠܽܘܛܳܐ ܘܩܰܠܡܳܐ ܒܟܽܠܶܗ ܬܚܽܘܡܗܽܘܢ.
32 ܥܒܰܕ ܡܶܛܪܗܽܘܢ ܒܰܪܕܳܐ ܘܢܽܘܪܳܐ ܐܶܬܓܰܘܙܠܰܬ ܒܰܐܪܥܗܽܘܢ.
33 ܡܚܳܐ ܓܽܘܦܢܰܝ̈ܗܽܘܢ ܘܬܺܐܢܰܝ̈ܗܽܘܢ ܘܬܰܒܰܪ ܐܺܝ̈ܠܳܢܶܐ ܕܰܬܚܽܘܡܰܝ̈ܗܽܘܢ.
34 ܐܶܡܰܪ ܘܰܐܝܬܺܝ ܩܰܡܨܳܐ ܘܙܳܚܠܳܐ ܕܠܳܐ ܡܶܢܝܳܢ ܒܟܽܠܳܗ̇ ܐܰܪܥܗܽܘܢ.
35 ܐܶܟܰܠܘ ܟܽܠܶܗ ܥܶܣܒܳܐ ܘܦܺܐܖ̈ܶܐ ܕܰܐܖ̈ܥܳܬܗܽܘܢ.
36 ܩܰܛܶܠ ܟܽܠ ܒܽܘܟܖ̈ܶܐ ܕܡܶܨܪܶܝܢ ܪܺܝܫ ܟܽܠܶܗ ܝܰܠܕܗܽܘܢ.
37 ܐܰܦܶܩ ܐܶܢܽܘܢ ܒܣܺܐܡܳܐ ܘܰܒܕܰܗܒܳܐ ܘܠܰܝܬ ܒܫܰܖ̈ܒܳܬܗܽܘܢ ܕܰܟܪܺܝܗ.
38 ܚܶܕܝܰܬ ܡܶܨܪܶܝܢ ܒܡܰܦܰܩܬܗܽܘܢ ܡܶܛܽܠ ܕܢܶܦܠܰܬ ܕܶܚܠܰܬܗܽܘܢ ܥܠܰܝܗܽܘܢ.
39 ܦܪܰܣ ܥܠܰܝܗܽܘܢ ܥܢܳܢܳܐ ܘܛܰܠܶܠ ܐܶܢܽܘܢ ܘܢܽܘܪܳܐ ܠܡܰܢܗܳܪܽܘ ܒܠܺܠܝܳܐ.
40 ܫܐܶܠܘ ܘܰܐܝܬܺܝ ܠܗܽܘܢ ܡܶܐܟܽܘܠܬܳܐ ܘܠܰܚܡܳܐ ܕܰܫܡܰܝܳܐ ܣܰܒܰܥ ܐܶܢܽܘܢ.
41 ܦܬܰܚ ܛܰܪܳܢܳܐ ܘܰܪܕܰܘ ܡܰܝ̈ܳܐ ܘܗܰܠܶܟܘ ܡܰܝ̈ܳܐ ܒܰܐܬܪܳܐ ܨܶܗܝܳܐ.
42 ܡܶܛܽܠ ܕܶܐܬܕܟܰܪ ܡܶܠܬܳܐ ܕܩܽܘܕܫܶܗ ܕܰܐܒܪܳܗܳܡ ܥܰܒܕܶܗ.
43 ܐܰܦܶܩ ܠܥܰܡܶܗ ܒܚܰܕܽܘܬܳܐ ܘܰܒܬܶܫܒܽܘܚܬܳܐ ܠܓܰܕܽܘ̈ܕܰܘܗ̱ܝ.
44 ܝܰܗܒ ܠܗܽܘܢ ܐܰܖ̈ܥܳܬܳܐ ܕܥܰܡ̈ܡܶܐ ܘܥܰܡܠܳܐ ܕܶܐܡ̈ܘܳܬܳܐ ܝܺܪܶܬܘ.
45 ܕܢܶܙܕܰܗܪܽܘܢ ܒܦܽܘܩܕܳܢܰܘ̈ܗܝ̱ ܘܢܳܡܽܘ̈ܣܰܘܗ̱ܝ ܢܶܛܪܽܘܢ.