Psalms 50
The Book of Psalms
܀ ܡܙܡܘܪܐ ܢܢ ܀
ܡܰܟܣܳܢܽܘܬܳܐ ܕܰܠܘܳܬ ܝܺܗܽܘܕܳܝ̈ܶܐ ܥܰܠ ܐܰܦܰܝ̈ ܡܒܰܣܪܳܢܽܘܬܗܽܘܢ ܕܥܰܠ ܘܳܠܺܝܬܳܐ
1 ܐܰܠܳܗܝ ܐܰܠܳܗܺܝ̈ܢ ܡܳܪܝܳܐ ܡܰܠܶܠ. ܘܰܩܪܳܗ̇ ܠܰܐܪܥܳܐ ܡܶܢ ܡܰܕܢܳܚܰܘ̈ܗܝ̱ ܕܫܶܡܫܳܐ ܘܰܥܕܰܡܳܐ ܠܡܰܥܖ̈ܳܒܰܘܗ̱ܝ.
2 ܡܶܢ ܨܶܗܝܽܘܢ ܟܠܺܝܠܳܐ ܡܫܰܒܚܳܐ ܐܰܠܳܗܳܐ ܚܰܘܺܝ.
3 ܢܺܐܬܶܐ ܐܰܠܳܗܳܐ ܘܠܳܐ ܢܶܫܬܽܘܩ. ܘܢܽܘܪܳܐ ܬܶܐܟܽܘܠ ܩܕܳܡܰܘܗ̱ܝ. ܘܰܚܕܳܪܰܘܗ̱ܝ ܬܶܬܓܰܘܙܰܠ ܛܳܒ.
4 ܢܶܩܪܶܐ ܠܰܫܡܰܝܳܐ ܡܶܢ ܠܥܶܠ. ܘܰܐܪܥܳܐ ܠܰܡܕܳܢ ܥܰܡܶܗ.
5 ܐܶܬܟܰܢܰܫܘ ܠܘܳܬܶܗ ܓܒܰܘ̈ܗܝ̱. ܕܰܡܩܺܝܡܺܝܢ ܩܝܳܡܶܗ ܥܰܠ ܕܶܒܚܬܳܐ.
6 ܢܚܰܘܽܘܢ ܫܡܰܝ̈ܳܐ ܙܰܕܺܝܩܽܘܬܶܗ. ܡܶܛܽܠ ܕܰܐܠܳܗܰܐ ܗ̱ܘ ܕܰܝܳܢܳܐ.
7 ܫܡܰܥ ܥܰܡܝ̱ ܘܺܐܡܰܪ ܠܳܟ. ܘܺܐܝܣܪܳܐܝܠ ܐܶܣܰܗܶܕ ܒܳܟ. ܐܶܢܳܐ ܐ̱ܢܳܐ ܐܰܠܳܗܳܐ ܐܰܠܳܗܳܟ.
8 ܠܳܐ ܥܰܠ ܕܶܒܚܰܝ̈ܟ ܐܰܟܣܳܟ. ܘܰܥܠܰܘ̈ܳܬܳܟ ܠܽܘܩܒܰܠܝ̱ ܐܶܢܶܝܢ ܒܟܽܠܙܒܰܢ.
9 ܠܳܐ ܐܶܣܰܒ ܡܶܢ ܒܰܝܬܳܟ ܬܰܘܖ̈ܶܐ. ܐܳܦܠܳܐ ܡܶܢ ܓܙܳܪܳܟ ܓܕܰܝ̈ܳܐ.
10 ܡܶܛܽܠ ܕܕܺܝܠܝ̱ ܗܺܝ ܟܽܠܳܗ̇ ܚܰܝܽܘܬܳܐ ܕܕܰܒܪܳܐ. ܘܰܒܥܺܝܪܳܐ ܕܰܒܛܽܘܖ̈ܶܐ ܘܬܰܘܖ̈ܶܐ.
11 ܝܳܕܰܥ ܐ̱ܢܳܐ ܟܽܠܳܗ̇ ܦܳܪܰܚܬܳܐ ܕܰܫܡܰܝܳܐ. ܘܚܰܝܽܘܬܳܐ ܕܕܰܒܪܳܐ ܕܺܝܠܝ̱ ܗܺܝ.
12 ܐܶܢ ܟܳܦܶܢ ܐ̱ܢܳܐ ܠܳܐ ܐܺܡܰܪ ܠܳܟ. ܡܶܛܽܠ ܕܕܺܝܠܝ̱ ܗܺܝ ܬܺܒܶܝܠ ܒܰܡܠܳܐܳܗ̇.
13 ܠܳܐ ܐܳܟܶܠ ܐ̱ܢܳܐ ܒܶܣܪܳܐ ܕܰܐܖ̈ܘܳܢܶܐ. ܘܰܕܡܳܐ ܕܰܓܕܰܝ̈ܳܐ ܠܳܐ ܫܳܬܶܐ ܐ̱ܢܳܐ.
14 ܕܰܒܰܚ ܠܰܐܠܳܗܳܐ ܬܰܘܕܺܝܬܳܐ. ܘܫܰܠܶܡ ܠܰܡܪܰܝܡܳܐ ܢܶܕܖ̈ܰܝܟ.
15 ܘܰܩܪܺܝܢܝ̱ ܒܝܰܘܡܳܐ ܕܽܐܘܠܨܳܢܳܐ. ܐܶܥܰܫܢܳܟ ܘܰܬܫܰܒܚܰܢܝ̱.
16 ܠܚܰܛܳܝܳܐ ܐܳܡܰܪ ܠܶܗ ܐܰܠܳܗܳܐ. ܡܳܐ ܠܳܟ ܘܠܰܟܬܳܒ̈ܶܐ ܕܦܽܘ̈ܩܕܳܢܰܝ. ܕܰܫܩܰܠܬ ܩܝܳܡܝ̱ ܒܦܽܘܡܳܟ.
17 ܐܰܢ̱ܬ ܕܶܝܢ ܣܢܰܝܬ ܡܰܪܕܽܘܬܝ̱. ܘܰܫܕܰܝܬ ܡܶܠܰܝ̈ ܠܒܶܣܬܪܳܟ.
18 ܐܶܢ ܚܳܙܶܐ ܗ̱ܘܰܝܬ ܓܰܢܳܒܳܐ ܪܳܗܶܛ ܗ̱ܘܰܝܬ ܥܰܡܶܗ. ܘܥܰܡ ܓܰܝܳܪܳܐ ܡܢܳܬܳܟ ܣܳܐܶܡ ܗ̱ܘܰܝܬ.
19 ܦܽܘܡܳܟ ܡܡܰܠܶܠ ܗ̱ܘܳܐ ܒܺܝ̈ܫܳܬܳܐ. ܘܠܶܫܳܢܳܟ ܡܡܰܠܶܠ ܢܶܟܠܳܐ.
20 ܝܳܬܶܒ ܗ̱ܘܰܝܬ ܘܪܳܢܶܐ ܒܰܐܚܽܘܟ. ܘܰܒܒܰܪ ܐܶܡܳܟ ܡܡܰܝܶܩ ܗ̱ܘܰܝܬ.
21 ܗܳܠܶܝܢ ܟܽܠܗܶܝܢ ܥܒܰܕܬ ܘܫܶܬܩܶܬ ܠܳܟ. ܣܒܰܪܬ ܥܰܘܳܠܳܐ ܕܰܐܟܘܳܬܳܟ ܐܶܗܘܶܐ. ܐܰܟܣܳܟ ܕܶܝܢ ܘܶܐܣܕܽܘܪ ܐܶܢܶܝܢ ܠܥܺܢܰܝ̈ܟ.
22 ܐܶܣܬܰܟܰܠܘ ܒܗܳܕܶܐ ܐܰܝܠܶܝܢ ܕܛܳܥܶܝܢ ܠܰܐܠܳܗܳܐ. ܕܰܠܡܳܐ ܢܶܬܒܰܪܟܽܘܢ ܘܠܰܝܬ ܕܰܡܦܰܨܶܐ.
23 ܐܰܝܢܳܐ ܕܕܳܒܰܚ ܬܰܘܕܺܝܬܳܐ ܗܽܘ ܢܫܰܒܚܰܢܝ̱. ܘܬܰܡܳܢ ܐܶܚܰܘܶܝܘܗ̱ܝ ܐܽܘܪܚܳܐ ܕܦܽܘܪܩܳܢܶܗ ܕܰܐܠܳܗܰܢ.